മാര്ക്സിസ്റ്റ് പാര്ട്ടി അടവച്ചു വിരിയിച്ച കുഞ്ഞുങ്ങള്; അലനെയും താഹയെയും മാവോയിസ്റ്റാക്കിയത് മുഖ്യമന്ത്രി പിണറായി വിജയനാണെന്ന് എഴുത്തുകാരി കെ.ആര് മീര
പന്തീരാങ്കാവ് യുഎപിഎ കേസില് വിദ്യാര്ത്ഥികളായ അലന്, താഹ എന്നിവരെ യു.എ.പി.എ ചുമത്തി അറസ്റ്റ് ചെയ്ത സംഭവത്തില് മുഖ്യമന്ത്രിക്കെതിരെ രൂക്ഷ വിമർശനവുമായി എഴുത്തുകാരി കെ.ആര് മീര. മുഖ്യമന്ത്രി പിണറായി വിജയനാണ് അവരെ ‘മാവോയിസ്റ്റുകള്’ ആക്കിത്തീര്ക്കുന്നതെന്നാണ് മീരയുടെ വിമര്ശനം. ഫേസ്ബുക്കിലൂടെയാണ് മീരയുടെ വിമര്ശനം.
ഫേസ്ബുക്പോസ്റ്റ് ഇങ്ങനെ;
ഒരു പത്തൊമ്പതു വയസ്സുകാരനെ അഞ്ചു കൊല്ലമായി നിരീക്ഷിച്ച് നിരീക്ഷിച്ച് പഠിച്ചതിനുശേഷമാണ് അറസ്റ്റ് എന്ന് പോലീസ് പറയുന്നതു വിശ്വസിക്കാം. എന്തുകൊണ്ട് ഈ അഞ്ചു കൊല്ലത്തിനിടയില് അവനെ തിരുത്താനും രക്ഷകര്ത്താക്കളെയും അധ്യാപകരെയും ഇടപെടുത്താനും ശ്രമിക്കാതിരുന്നത് എന്നു ചോദിക്കാതിരിക്കാം. എന്നാലും ചില നിര്ണായക ചോദ്യങ്ങള് ബാക്കിയാണല്ലോ. അലന് ഷുഹൈബ്, താഹ ഫസല് എന്നീ ചെറുപ്പക്കാര് ലഘുലേഖ കൈവശം വച്ചതിന് അപ്പുറം എന്തെങ്കിലും രാജ്യദ്രോഹപ്രവൃത്തികള് ചെയ്തിരുന്നോ? അവര് പൊതുമുതല് നശിപ്പിക്കുകയോ നരഹത്യ നടത്തുകയോ ചെയ്തിരുന്നോ? അവരുടെ പക്കല് നിന്ന് ആയുധശേഖരമോ രാജ്യസുരക്ഷയ്ക്ക് ഭീഷണിയുയര്ത്തുന്ന ആക്രമണപദ്ധതികളുടെ ബ്ലൂ പ്രിന്റുകളോ പിടിച്ചെടുത്തിരുന്നോ?
അറസ്റ്റ് ചെയ്ത് രണ്ടു മാസമാകാറാകുമ്പോഴെങ്കിലും അവരുടെ പേരില് യു.എ.പി.എ. ചുമത്താന് ഇടയാക്കിയ തെളിവുകള് പുറത്തു വരേണ്ടതല്ലേ? അവര് മാവോയിസ്റ്റുകളാണ് എന്നു നിസ്സാരമായും ആത്മവിശ്വാസത്തോടെയും പ്രഖ്യാപിച്ച മുഖ്യമന്ത്രി അതിനുള്ള കാരണങ്ങള് വെളിപ്പെടുത്തേണ്ടതായിരുന്നില്ലേ?
ഇനി ഒരു ചോദ്യം കൂടിയുണ്ട്. മാര്ക്സിസ്റ്റ് പാര്ട്ടി അടവച്ചു വിരിയിച്ച കുഞ്ഞുങ്ങള് എന്തുകൊണ്ട് മാവോയിസ്റ്റുകളാകുന്നു എന്ന ചോദ്യം.അതിന്റെ മാത്രം ഉത്തരം അന്വേഷിച്ചു ബുദ്ധിമുട്ടേണ്ടതില്ല. ഉത്തരം എല്ലാവര്ക്കും അറിയാം. മുഖ്യമന്ത്രി പിണറായി വിജയനാണ് അവരെ ‘മാവോയിസ്റ്റുകള്’ ആക്കിത്തീര്ക്കുന്നത്.
കോഴിക്കോട്ട് പന്തീരാങ്കാവിൽ മാവോവാദിബന്ധം ആരോപിച്ച് അലൻ,താഹ എന്നീ വിദ്യാർത്ഥികളെ യു.എ.പി.എ. ചുമത്തി അറസ്റ്റുചെയ്ത പോലീസ് നടപടി ജനാധിപത്യസമൂഹത്തിനുമുന്നിൽ ഉയർത്തുന്നത്ഒ ട്ടേറെ ചോദ്യങ്ങളാണ്. കോഴിക്കോട്ടെ പോലീസ് നടപടിക്കെതിരേ പുറത്തു ള്ളതുപോലെ തന്നെസി.പി.എമ്മിനകത്തും പൊതുവികാരം ഉയർന്നുവന്നത് സർക്കാരിനെ പ്രതിരോധത്തിലാക്കിയിരുന്നു.. പാർട്ടി സംസ്ഥാന സെക്രട്ടേറിയറ്റുതന്നെ ഈ ചെറുപ്പക്കാരുടെപേരിൽ യു.എ.പി.എ. ചുമത്തരുത് എന്നാവശ്യപ്പെട്ടു രംഗത്ത് വരികയും ചെയ്തിരുന്നു. അലനും താഹയ്ക്കുമെതിരായ യു.എ.പി.എ കേസ് കൊച്ചി എന്.ഐ.എ സംഘം ഡിസംബര് 19 നാണ് ഏറ്റെടുത്തത്. മാവോയിസ്റ്റ് ബന്ധം ആരോപിച്ചാണ് അലന്, താഹ എന്നിവരെ പന്തീരാങ്കാവ് പൊലീസ് അറസ്റ്റ് ചെയ്തത്. ജാമ്യാപേക്ഷ തള്ളിയതിനെ തുടര്ന്ന് ഇവര് ജുഡീഷ്യല് കസ്റ്റഡിയിലാണ്.
നിരോധിക്കപ്പെട്ട മാവോയിസ്റ്റ് സംഘടന പ്രസിദ്ധീകരിച്ച പുസ്തകവും ലഘുലേഖകളും ഇവരുടെ പക്കല് നിന്നും കണ്ടെടുത്തുവെന്ന് ചൂണ്ടിക്കാട്ടിയാണ് നവംബര് ഒന്നിന് ഇവരെ പൊലീസ് അറസ്റ്റ് ചെയ്തത്.
യുവാക്കള്ക്കെതിരെ യു.എ.പി.എ ചുമത്തിയ നടപടിക്കെതിരെ പോളിറ്റ്ബ്യൂറോ അംഗങ്ങളായി പ്രകാശ് കാരാട്ടും എം.എ. ബേബിയും അടക്കുമുള്ളവര് രംഗത്തെത്തിയിരുന്നു. എന്നാല് അലനും താഹയും മാവോയിസ്റ്റുകളാണെന്നും അവര് സി.പി.ഐ.എം പ്രവര്ത്തകരല്ലെന്നും മുഖ്യമന്ത്രി പിണറായി വിജയന് വാര്ത്താ സമ്മേളനത്തില് തുറന്നടിച്ചിരുന്നു.
’കോഴിക്കോട്ട് മാവോയിസ്റ്റ് പ്രവര്ത്തനവുമായി ബന്ധപ്പെട്ട് കേരള പോലീസ് ചാര്ജ് ചെയ്ത കേസ് കേന്ദ്ര സര്ക്കാര് ഇടപെട്ട് എന്ഐഎ യെ ഏല്പ്പിച്ചതിനെതിരെ വൻ പ്രതിഷേധമാണ് ഉയരുന്നത്. . ഈ കേസില് വ്യക്തമായ അന്വേഷണവുമായി സംസ്ഥാന പോലീസ് മുന്നോട്ടുപോകവെയാണ് കേന്ദ്ര സര്ക്കാര് അന്വേഷണം എന്ഐഎ യെ ഏല്പ്പിച്ചിരിക്കുന്നത്. ക്രമസമാധാനം സംസ്ഥാന സര്ക്കാരിന്റെ ചുമതലയായിരിക്കെ സംസ്ഥാന സര്ക്കാരുമായി ആലോചന പോലും നടത്താതെ കേസ് എന്ഐഎ യെ ഏല്പ്പിച്ച കേന്ദ്ര സര്ക്കാരിന്റെ നടപടിഎത്രത്തോളം സാധൂകരിക്കാന്സാധിക്കും. ഫെഡറല് സംവിധാനത്തെ ദുര്ബലപ്പെടുത്താന് മാത്രമേ ഇത് സഹായിക്കുകയുള്ളൂഎന്നായിരുന്നു സിപിഐ(എം) സംസ്ഥാന സെക്രട്ടറിയേറ്റിന്റെ പ്രസ്താവന.
https://www.facebook.com/Malayalivartha
