ജന്മദിനം എല്ലാവര്ക്കും സന്തോഷിക്കാനുള്ള വേദിയാണ്.എന്നാൽ കോൺഗ്രസിന്റെ ജന്മദിനത്തിൽ ചിരിക്കണോ കരയണോ എന്നറിയാത്ത അവസ്ഥയിലായിരുന്നു നേതാക്കന്മാർ. ഇന്ത്യൻ നാഷണൽ കോൺഗ്രസ്‌ സ്ഥാനപകദിനത്തിൽ കെപിസിസി ആസ്ഥാനത്ത്‌ കൊടി ഉയർത്താനാവാതെ ആകെ പുലിവാല് പിടിച്ച അവസ്ഥയിലായി കെപിസിസി അധ്യക്ഷനും നേതാക്കളും. മുല്ലപ്പള്ളി രാമചന്ദ്രൻ, കൊടിക്കുന്നിൽ സുരേഷ്‌ എംപി, രാജ്‌മോഹൻ ഉണ്ണിത്താൻ എംപി അടക്കമുള്ള നേതാക്കൾ കൊടി ഉയർത്താനെത്തിയപ്പോളാണ്‌ കയറിൽ കുടുങ്ങി കൊടി ഉയരാതെയായത്‌.

സേവാദൾ പ്രവർത്തകരാണ്‌ പതാകയും മറ്റും സജ്ജീകരിച്ചിരുന്നത്‌. കൊടിയുയർത്തുന്ന രംഗം ചിത്രീകരിക്കാൻ മാധ്യമങ്ങൾ തയ്യാറായി നിന്ന്‌ മിനുട്ടുകൾ കഴിഞ്ഞിട്ടും കൊടി ഉയർത്താൻ പറ്റാതായതോടെ നേതാക്കൾ ക്ഷുഭിതരായി. പല്ലിറുമ്മി കട്ടക്കലിപ്പിൽ കെ പി സി സി അധ്യക്ഷനും. കോടി ഉയർത്താൻ പറ്റാത്ത രീതിയിൽ കുരുക്കിട്ട സേവാദൾ പ്രവർത്തകരെ കണക്കിന് ശകാരിച്ചശേഷം നേതാക്കൾ ആസ്ഥാനത്തിന്‌ അകത്തേക്ക്‌ പോകുകയായിരുന്നു. കൊടി കുടുങ്ങിയതോടെ മാധ്യമങ്ങളെ തടയാനും ശ്രമമുണ്ടായി. അതിനിടെ കൊടി അല്പം താഴ്ത്തികെട്ടിയാലും കുഴപ്പമൊന്നുമില്ലെന്ന വിചിത്ര വാദവുമായി സേവാദൾ പ്രവർത്തകൻ തന്റെ അറിവ് പ്രകടിപ്പിക്കാനുള്ള വേദിയായും ഈ അവസരത്തെ വിനിയോഗിച്ചു .

പൗരത്വ നിയമ ഭേദഗതിക്കെതിരെ സര്‍ക്കാര്‍ വിളിച്ച സര്‍വകക്ഷി യോഗത്തില്‍ കെപിസിസി പ്രസിഡന്റ് മുല്ലപ്പള്ളി രാമചന്ദ്രന്‍ പങ്കെടുക്കില്ല എന്ന് അദ്ദേഹം തന്റെ നിലപാട് വ്യക്തമാക്കി.മുല്ലപ്പള്ളിയുടെ ഈ തീരുമാനത്തിന് പിന്നില്‍ മുഖ്യമന്ത്രിയുമായുള്ള വിയോജിപ്പെന്നാണ് സൂചന. പകരം പ്രതിനിധിയായി വര്‍ക്കിങ് പ്രസിഡന്റ് കൊടിക്കുന്നില്‍ സുരേഷ് എംപിയെ അയയ്ക്കുമെന്നു അഭ്യൂഹമുണ്ട്.

പാർട്ടിയുടെ സ്ഥാപക ദിനമായ ഇന്ന് സർക്കാരിനെതിരെ സംസ്ഥാന തലസ്ഥാനങ്ങളിൽ പിസിസി ഘടകങ്ങൾ ഫ്ലാഗ് മാർച്ച് സംഘടിപ്പിക്കുന്നുണ്ട്.. ഭരണഘടന സംരക്ഷിക്കൂ, ഇന്ത്യയെ രക്ഷിക്കൂ’ എന്ന മുദ്രാവാക്യമുയർത്തിയുള്ള പ്രകടനങ്ങൾക്കു ദേശീയ നേതാക്കളാ ണ് നേതൃത്വം നൽകുന്നത്.

പൗരത്വ നിയമത്തിനെതിരെയും ദേശീയ പൗര റജിസ്റ്ററിനെതിരെയും (എൻആർസി) വിദ്യാർഥികളുടെ നേതൃത്വത്തിൽ നടക്കുന്ന പ്രക്ഷോഭങ്ങൾക്ക് ഐക്യദാർഢ്യം അർപ്പിക്കാൻ കൂടി ലക്ഷ്യമിട്ടാണു പ്രകടനങ്ങൾ.

പൗരത്വ നിയമത്തിനെതിരെ രാംലീലാ മൈതാനത്ത് ഈ മാസം 14നു പ്രതിഷേധ സമ്മേളനവും 23നു രാജ്ഘട്ടിൽ സത്യഗ്രഹവും കോൺഗ്രസ് സംഘടിപ്പിച്ചിരുന്നു. പൗരത്വ വിഷയത്തിൽ കേന്ദ്രത്തിനെതിരെ ജനരോഷമുയരുന്ന സാഹചര്യത്തിൽ തുടർച്ചയായ പ്രക്ഷോഭ പരിപാടികൾ സംഘടിപ്പിക്കണമെന്നാണു ദേശീയ നേതൃത്വത്തിന്റെ നിലപാട്.