എസ്എന്‍ഡിപി ജനറല്‍ സെക്രട്ടറി വെള്ളാപ്പള്ളി നടേശനും മകനും ബിഡിജെഎസ് നേതാവുമായ തുഷാര്‍ വെള്ളാപ്പള്ളിയും മൗന വ്രതത്തിലാണ്. വേറെയാരെങ്കിലും വെള്ളാപ്പള്ളി നടേശനേയോ മകനേയോ എന്തെങ്കിലും പറഞ്ഞെങ്കില്‍ കാണാമായിരുന്നു. പക്ഷെ വെള്ളാപ്പള്ളിയുമായി തെറ്റിയ സുഭാഷ് വാസു എന്ത് പറഞ്ഞിട്ടും മറുപടിയില്ല. ശക്തമായ ആരോപണമാണ് സുഭാഷ് വാസു ഉന്നയിച്ചുകൊണ്ടിരിക്കുന്നത്. നിയമനങ്ങളിലൂടെ മാത്രം വെള്ളാപ്പള്ളി നടശേന്‍ കോടികളുടെ സ്വത്ത് സമ്പാദിച്ചെന്ന് സുഭാഷ് വാസു വ്യക്തമാക്കുന്നത്. കഴിഞ്ഞകൊല്ലം മാത്രം നേടിയത് 11.5 കോടി രൂപയാണ്. വാങ്ങിയ പണത്തിന് രേഖകള്‍ നല്‍കിയില്ല, കണക്കുകളും അവതരിപ്പിക്കാറില്ലെന്നു സുഭാഷ് വാസു ആരോപിച്ചു. നിയമനത്തിന് പണം നല്‍കിയവരെ മാധ്യമങ്ങള്‍ക്ക് മുന്നിലെത്തിക്കും. തുഷാറിന്റെ മക്കാവുവിലെ ഫ്‌ലാറ്റിനെക്കുറിച്ച് രേഖകളുണ്ടെന്നും സുഭാഷ് വാസു വെളിപ്പെടുത്തി.

വെള്ളാപ്പള്ളി കുടുംബത്തെ എസ്എന്‍ഡിപി യില്‍ നിന്ന് പിഴുതെറിയുമെന്ന പ്രഖ്യാപനവുമായിയാണ് സുഭാഷ് വാസു കഴിഞ്ഞ ദിവസം രംഗത്തെത്തിയത്. വെള്ളാപ്പള്ളി നടേശനും തുഷാറും സമുദായത്തിന്റെ രക്തം ഊറ്റികുടിക്കുന്ന ഡ്രാക്കുളകളാണെന്നും സുഭാഷ് വാസു തുറന്നടിച്ചു. തുഷാറിന്റെ വഴിവിട്ട ബന്ധങ്ങളെകുറിച്ചും ചില കൊലപാതകത്തിലെ വെള്ളാപ്പള്ളിയുടെ പങ്കിനെക്കുറിച്ചും വൈകാതെ വെളിപ്പെടുത്തും. ടി.പി സെന്‍കുമാറിന്റെയും ചില ബിജെപി നേതാക്കളുടെടെയും പിന്തുണയോടെയാണ് തന്റെ പോരാട്ടമെന്നും സുഭാഷ് വാസു തുറന്നുപറഞ്ഞു.
സമുദായവും രാഷ്ട്രീയവും കടന്ന് വ്യക്തിപരമായ ആരോപണങ്ങളിലൂടെ നേരിട്ടുള്ള പോരാട്ടത്തിനുള്ള വെല്ലുവിളിയുമായാണ് സുഭാഷ് വാസു വാര്‍ത്ത സമ്മേളനം നടത്തിയത്. ആനയെന്നാണ് വെള്ളാപ്പള്ളി സ്വയം കരുതുന്നത്. എന്നാല്‍ തനിക്ക് ഒരു കുഴിയാന പോലുമല്ല. വെള്ളാപ്പള്ളി കുടുംബത്തിനു കോടികളുടെ അനധികൃത സ്വത്തുക്കള്‍ ഉണ്ട്. എസ്എന്‍ഡിപി വഴി സമ്പാദിച്ചവയാണ് അധികവും. ഇവ സംരക്ഷിക്കാന്‍ ആണ് ബിജെപി ബന്ധം തുടരുന്നത്.

ബിഡിജെഎസിന്റെ ചെയര്‍മാന്‍ തുഷാര്‍ അല്ലെന്നും താന്‍ ആണെന്നും സുഭാഷ് വാസു പറഞ്ഞു. തുഷാറിന് പാര്‍ട്ടി മെമ്പര്‍ഷിപ്പ് ഉണ്ടോ എന്ന് സംശയമാണെന്നും പരിഹസിച്ചു. തനിക്ക് ലഭിച്ച സ്ഥാനങ്ങള്‍ വെള്ളാപ്പള്ളിയുടെ ഔദാര്യം അല്ല. സ്‌പൈസസ് ബോര്‍ഡ് ചെയര്‍മാന്‍ സ്ഥാനം രാജിവെക്കില്ല. തുഷാര്‍ വിദേശത്ത് നടത്തിയ സാമ്പത്തിക തട്ടിപ്പില്‍ താനും ഇരയാണ്. തനിക്കെതിരെ ഉയര്‍ന്ന സാമ്പത്തിക ആരോപണങ്ങള്‍ കള്ളമാണെന്നും നിയമപരമായി നേരിടുമെന്നും സുഭാഷ് വാസു പറഞ്ഞു.

അതേസമയം വെള്ളാപ്പള്ളിമാരെ കളിയാക്കി അഡ്വ. ജയശങ്കര്‍ രംഗത്തെത്തിയത് ഏറെ ശ്രദ്ധേയമായി. യേശുദേവനെ യൂദാസ് ഒറ്റുകൊടുത്തു പത്രോസ് കോഴി കൂവുംമുമ്പ് മൂന്നു തവണ തളളിപ്പറഞ്ഞു എന്നാണ് ചരിത്രമെന്നാണ് ജയശങ്കര്‍ പറയുന്നത്.
വെളളാപ്പളളി നടേശന്റെ കാര്യവും വ്യത്യസ്തമല്ല. ആദ്യം എംബി ശ്രീകുമാര്‍, പിന്നെ സികെ വിദ്യാസാഗര്‍, അതു കഴിഞ്ഞ് ഗോകുലം ഗോപാലന്‍, ഏറ്റവും അവസാനം സുഭാഷ് വാസു.

ഡോ പല്‍പ്പുവിന്റെ സമുദായ സ്‌നേഹവും ടികെ മാധവന്റെ സംഘാടന വൈഭവവും സഹോദരന്‍ അയ്യപ്പന്റെ പുരോഗമന വാഞ്ഛയും ആര്‍ ശങ്കറിന്റെ കര്‍മകുശലതയും കുമാരനാശാന്റെ കാവ്യഭാവനയും ഒത്തിണങ്ങിയ മഹാപുരുഷനാണ് വീരശ്രീ വെളളാപ്പളളി നടേശന്‍.

ശ്രീനാരായണ ഗുരുദേവന്റെ അനുഗ്രഹവും സര്‍വ്വാഭീഷ്ട വരദായിനിയായ കണിച്ചുകുളങ്ങര ഭഗവതിയുടെ കരുണാകടാക്ഷവും അഡ്വ രാജന്‍ബാബുവിന്റെ നിയമോപദേശവും ഉളളിടത്തോളം കാലം വെളളാപ്പളളിയെ തൊടാന്‍ ആര്‍ക്കും കഴിയില്ല. അതുകൊണ്ടാണ് മുമ്പ് അദ്ദേഹത്തെ കളളന്‍, കളളുകച്ചവടക്കാരന്‍ എന്നൊക്കെ ആക്ഷേപിച്ച വിപ്ലവകാരികള്‍ ഇപ്പോള്‍ നവോത്ഥാന നായകനാക്കി തോളിലേറ്റി നടക്കുന്നത്. എന്നാണ് ജയശങ്കര്‍ പറയുന്നത്.