മുത്തങ്ങ വന്യജീവി സങ്കേതത്തിലെ വനപ്രദേശത്ത് പ്ലാസ്റ്റിക്കുകളും ഭക്ഷണാവശിഷ്ടങ്ങളും ഉപേക്ഷിക്കുന്നവര്‍ക്കെതിരെ കര്‍ശന നടപടി സ്വീകരിക്കുമെന്നും അധികൃതര്‍ മുന്നറിയിപ്പ് നല്‍കി. വന്യജീവി സങ്കേതത്തിലൂടെ കടന്നു പോകുന്ന റോഡിന്റെ വശങ്ങളിലും മറ്റ് വനപ്രദേശങ്ങളിലും വാഹനങ്ങള്‍ നിര്‍ത്തിയിടുന്നതിനും യാത്രക്കാര്‍ വന്യ മൃഗങ്ങള്‍ക്ക് തീറ്റ കൊടുക്കുന്നതിനും നിരോധനം ഏര്‍പ്പെടുത്തിയിരിക്കുകയാണ്. 

നിയമം ലംഘിക്കുന്നവരില്‍ നിന്നും 2000 രൂപ വരെ പിഴ ഈടാക്കും. പിഴ അടക്കുന്നതില്‍ വീഴ്ച്ച വരുത്തിയാല്‍ വന്യജീവി സംരക്ഷണ നിയമ പ്രകാരം കേസെടുക്കുമെന്നും അധികൃതര്‍ അറിയിച്ചു. ഇത് സംബന്ധിച്ച നിര്‍ദ്ദേശങ്ങള്‍ ജനങ്ങളെ അറിയിക്കുന്നതിനായി പാതയോരത്ത് വനംവകുപ്പ് മുന്നറിയിപ്പ് ബോര്‍ഡുകള്‍ സ്ഥാപിച്ചിട്ടുണ്ട്. യാത്രക്കാര്‍ക്ക് നോട്ടീസും വനംവകുപ്പ് ഉദ്യോഗസ്ഥര്‍ വിതരണം ചെയ്യുന്നുണ്ട്.
കര്‍ണാടകയില്‍ നിന്നും കേരളത്തിലേക്കുള്ള പ്രധാന പാതയായ മുത്തങ്ങ വഴി വിനോദ സഞ്ചാരികളടക്കം ആയിരക്കണക്കിന് യാത്രക്കാര്‍ കടന്നു പോകുന്നുണ്ട്. ഇതില്‍ പലരും വന്യജീവികളെ കാണുന്നതിനും ഫോട്ടോ എടുക്കുന്നതിനുമായി വാഹനങ്ങള്‍ റോഡരികില്‍ നിര്‍ത്തിയിടാറുണ്ട്. ഇവര്‍ വന്യമൃഗങ്ങള്‍ക്ക് തീറ്റ കൊടുക്കാറുമുണ്ട്. ഇത് വന്യമൃഗങ്ങള്‍ക്ക് ആരോഗ്യ പ്രശ്‌നങ്ങള്‍ ഉണ്ടാക്കുന്നതിനാലാണ് നിരോധനം ഏര്‍പ്പെടുത്താന്‍ വനംവകുപ്പ് തീരുമാനിച്ചത്. വയനാട് വന്യജീവി സങ്കേതത്തിലെ മുത്തങ്ങ റെയ്ഞ്ചില്‍ ഈ നിയമം നടപ്പാക്കിയതിനുശേഷം സങ്കേതത്തിനുകീഴിലുള്ള മറ്റ് റെയ്ഞ്ചുകളിലേക്കും വ്യാപിപ്പിക്കാന്‍ ആലോചനയുണ്ട്.