മകളുടെ കല്യാണത്തിനും വീടുപണിക്കുമായി എടുത്ത ബാങ്ക് വായ്പ തിരിച്ചടയ്ക്കാന്‍ നിവൃത്തിയില്ലാഞ്ഞപ്പോള്‍, എല്ലാം ശരിയാകാന്‍ ഒരു വഴി തെളിഞ്ഞിരുന്നെങ്കില്‍ എന്ന് കൂലിപ്പണിക്കാരനായ പൊരുന്നന്‍ രാജന്‍ മനസ്സു നൊന്ത് ആഗ്രഹിച്ചു. അതു ഫലിച്ചതാകട്ടെ,​ സംസ്ഥാന ഭാഗ്യക്കുറിയുടെ ചരിത്രത്തിലെ ഏറ്റവും ഉയര്‍ന്ന സമ്മാനത്തിലൂടെ. കൂലിപ്പണി ചെയ്തിട്ടും കടവും ദുരിതവുമായിരുന്നു മാലൂര്‍, പുരളിമല കുറിച്യ കോളനിയിലെ താമസക്കാരനായ പെരുന്നോന്‍ രാജന് ഉണ്ടായിരുന്നത്. പണി കഴിഞ്ഞു വരുംവഴി ലോട്ടറിയെടുക്കുന്ന ശീലമുണ്ട്. സമ്മാനാര്‍ഹമായ ടിക്കറ്റെടുത്തത് കൂത്തുപറമ്പ് സനീഷ് ഏജന്റില്‍ നിന്നായിരുന്നു. ബംബര്‍ സമ്മാനം താനെടുത്ത ST 269609 നമ്ബര്‍ ടിക്കറ്റിനാണെന്ന് തിങ്കളാഴ്ച വൈകിട്ടു തന്നെ മനസ്സിലായെങ്കിലും രാജന്‍ ആരോടും പറഞ്ഞില്ല.

ഏറ്റവും ഉയര്‍ന്ന സമ്മാനം സ്വന്തമാക്കിയ രാജന് ആകട്ടെ ഉള്ളത് നിസാര സ്വപ്‌നങ്ങളും. അടച്ചുറപ്പുള്ള ഒരു വീട്ടില്‍ അന്തിയുറങ്ങുക, ഒപ്പം മകളുടെ വിവാഹത്തിനായി ബാങ്കില്‍ നിന്നെടുത്ത ഏഴ് ലക്ഷം രൂപ അടച്ചുതീര്‍ക്കുക. ലഭിക്കുന്ന പണത്തില്‍ ഒരു വിഹിതം പാവങ്ങളെ സഹായിക്കാനായി മാറ്റി വെക്കണമെന്നും രാജന്‍ പറയുന്നു. സമ്മാനാര്‍ഹമായ ടിക്കറ്റ് കണ്ണൂര്‍ ജില്ലാ സഹകരണ ബാങ്കില്‍ ഏല്‍പിച്ചു. ഇടയ്ക്കിടെ ലോട്ടറിയില്‍ ഭാഗ്യം പരീക്ഷിക്കാറുണ്ടെങ്കിലും ഭാഗ്യദേവത ഇതുവരെ കനിഞ്ഞിരുന്നില്ല. പ്രതിക്ഷയില്ലാതെയാണ് ക്രിസ്മസ്- പുതുവത്സര ബംപറും എടുത്തത്. കണ്ണൂര്‍, കൂത്തുപറമ്പിലെ പയ്യന്‍ ലോട്ടറി ഏജന്‍സിയില്‍ നിന്ന് ടിക്കറ്റ് വാങ്ങി.

കൂത്തുപറമ്പിൽ വിറ്റ ടിക്കറ്റിന് ഒന്നാം സമ്മാനം ലഭിച്ചെന്ന് ഇന്നലെ വൈകീട്ടോടെ അറിഞ്ഞിരുന്നെങ്കിലും രാജന്‍ ഫലം നോക്കിയില്ല. രാവിലെ സമീപത്തെ ചായക്കടയിലെത്തി പത്രത്തില്‍ ഫലം നോക്കി, ഒന്നാം സമ്മാനം ഉറപ്പിച്ചതോടെ എന്തു ചെയ്യണമെന്നറിയാതെ തളര്‍ന്നിരുന്ന രാജനെ നാട്ടുകാരിടപെട്ട് ബാങ്കില്‍ എത്തിക്കുകയായിരുന്നു. തിരുവനന്തപുരം ഗോർക്കി ഭവനിലാണ് ക്രിസ്മസ് ബമ്പർ നറുക്കെടുപ്പ് നടന്നത്. രണ്ടാം സമ്മാനം അഞ്ച് കോടി രൂപയാണ്. മുപ്പത്തി ആറ് ലക്ഷത്തി എൺപത്തി അയ്യായിരം ടിക്കറ്റുകളാണ് ഇത്തവണത്തെ ക്രിസ്തുമസ്- പുതുവത്സര ബമ്പറിനായി അച്ചടിച്ചത്. ഇതിൽ മൂന്നുലക്ഷത്തിലധികം ടിക്കറ്റുകളാണ് ബാക്കി വന്നതെന്ന് പബ്ലിസിറ്റി ഓഫീസർ അറിയിച്ചു. 50 ലക്ഷം വീതം പത്ത് പേര്‍ക്കായി 5 കോടി രൂപയാണ് രണ്ടാം സമ്മാനം. പത്ത് ലക്ഷം വീതം പത്ത് പേര്‍ക്കാണ് മൂന്നാം സമ്മാനം. നാലാം സമ്മാനം 5 ലക്ഷം വീതം 20 പേര്‍ക്കായി ഒരു കോടി രൂപയാണ്. ഒരു ലക്ഷം രൂപയാണ് അഞ്ചാം സമ്മാനം.

ഒന്നാം സമ്മാനമായ 12 കോടിയില്‍ നിന്നും പത്ത് ശതമാനം ഏജന്റിന് കമ്മീഷനായി ലഭിക്കും. 30 ശതമാനം നികുതിയും ഏജന്റ് കമ്മീഷനും കഴിഞ്ഞുള്ള തുക രാജന് ലഭിക്കും. സമ്മാനാര്‍ഹമായ ടിക്കറ്റ് തൃക്കടാരിപ്പൊയിലിലെ തോലമ്പ്ര സര്‍വീസ് സഹകരണ ബാങ്കില്‍ ഏല്പിച്ചു.ബാങ്ക് സെക്രട്ടറി കെ.ദാമോദരന്‍,പ്രസിഡന്റ് കെ.ജനാര്‍ദ്ദനന്‍ എന്നിവര്‍ക്ക് രാജനും ഭാര്യ രജനിയും മക്കളും ചേര്‍ന്ന് ടിക്കറ്റ് കൈമാറി.ദരിദ്ര കുടുംബാംഗമായ രാജന്‍ കോളനിയിലെ ചെറിയൊരു വീട്ടിലാണ് കഴിയുന്നത്.
വോളിബോള്‍ താരം കൂടിയായ രഗില്‍,​ വിദ്യാര്‍ത്ഥിയായ അക്ഷര,​ ആതിര എന്നിവരാണ് മക്കള്‍.