വ്യാജ രേഖകൾ ഉപയോഗിച്ച് സിൽക്ക് കൈത്തറി സഹകരണ സംഘം രജിസ്റ്റർ ചെയ്ത് ഒന്നേ കാൽ കോടി രൂപ അപഹരിച്ചെടുത്ത വിജിലസ് കേസിൽ സംസ്ഥാന വ്യവസായ വകുപ്പ് സെക്രട്ടറിയടക്കമുള്ള പത്തു പ്രതികൾ കുറ്റം ചുമത്തലിന് ഹാജരാകാൻ തിരുവനന്തപുരം വിജിലൻസ് കോടതി ഉത്തരവിട്ടു. വിചാരണക്ക് മുന്നോടിയായുള്ള കുറ്റം ചുമത്തലിനായി മാർച്ച് 23 ന് എല്ലാ പ്രതികളും ഹാജരാകാനാണ് വിജിലൻസ് സ്പെഷ്യൽ ജഡ്ജി എം.ബി. സ്നേഹലതയുടെ ഉത്തരവ്. കുറ്റ സ്ഥാപനത്തിൽ രണ്ട് വർഷത്തിന് മേൽ ശിക്ഷിക്കാവുന്ന വാറണ്ട് വിചാരണ കേസായതിനാൽ വിജിലൻസ് കുറ്റപത്രം , സാക്ഷിമൊഴികൾ , അനുബന്ധ രേഖകൾ എന്നിവ പരിശോധിച്ച് കോടതി നേരിട്ട് തയ്യാറാക്കുന്ന കുറ്റപത്രം പ്രതികളെ വായിച്ചു കേൾപ്പിച്ചാണ് പ്രതികൾക്ക് മേൽ കോടതി കുറ്റം ചുമത്തുന്നത്.

സംസ്ഥാന വ്യവസായ (സി) വകുപ്പ് സെക്രട്ടറി പി.എ. ഇസ്ഹാക്ക്, തിരുവനന്തപുരം താലൂക്ക് ഇന്റഗ്രേറ്റഡ് സിൽക്ക് ഹാന്റ്ലൂം വീവേഴ്സ് കോ-ഓപ്പറേറ്റീവ് സൊസൈറ്റി, ബാലരാമപുരം എന്ന പേരിൽ രജിസ്റ്റർ ചെയ്ത സഹകരണ സംഘം സെക്രട്ടറി എം.മാജിദ , സൊസൈറ്റിയുടെ പ്രസിഡന്റും ബാലരാമപുരം പഞ്ചായത്ത് മുൻ പ്രസിഡന്റുമായ പാറക്കുഴി സുരേന്ദ്രൻ, ഡയറക്ടർ ബോർഡംഗങ്ങളായ ഗോപാല പണിക്കർ , വിജയകുമാരി , സുരേഷ് , ശിവരാജൻ , മണിയൻനാടാർ , ബിജിത് കുമാർ , ചീഫ് പ്രൊമോട്ടർ മോഹനൻ എന്നിവരാണ് വിജിലൻസ് കുറ്റപത്രത്തിലെ പത്തു പ്രതികൾ.

2009-10 കാലയളവിലാണ് കേസിനാസ്പദമായ സംഭവം നടന്നത്. പ്രതികൾ ഗൂഢാലോചന നടത്തി വ്യാജരേഖകൾ ഉപയോഗിച്ച് സിൽക്ക് കൈത്തറി സംഘം രജിസ്റ്റർ ചെയ്ത് സിൽക്ക് കൈത്തറി വ്യവസായ വികസനത്തിന് ദേശീയ സഹകരണ വികസന കോർപ്പറേഷനിൽ (എൻ. സി.ഡി.സി.) നിന്നും രണ്ടു കോടി രൂപ സഹായ മാർജിൻ തുകയായി നേടിയെടുക്കുകയായിരുന്നു. സംഘം രജിസ്റ്റർ ചെയ്യുന്നതിലേക്കായി വ്യാജ വസ്തുതകൾ ഉൾക്കൊള്ളിച്ച പ്രോജക്റ്റ് റിപ്പോർട്ട് , വ്യാജപ്പേരും വിലാസങ്ങളും രേഖപ്പെടുത്തിയ അംഗത്വ രജിസ്റ്റർ എന്നിവ ഹാജരാക്കിയതായും കുറ്റപത്രത്തിൽ പറയുന്നു. സംഘത്തിന് 11, 22, 754 രൂപയുടെ സാമ്പത്തിക സഹായത്തിനേ അർഹതയുള്ളുവെന്ന ഹാൻറ് ലൂം ഡയറക്ടറുടെയും ജില്ലാ വ്യവസായ കേന്ദ്രം ജനറൽ മാനേജരുടെയും യോഗ്യതാ ശുപാർശക്കത്ത് അവഗണിച്ച് നിയമങ്ങളും ചട്ടങ്ങളും കാറ്റിൽ പറത്തിയാണ് വ്യവസായ വകുപ്പ് സെക്രട്ടറി ഇസ്ഹാക്ക് ഉത്തരവ് ഇറക്കിയത്. ഇസ്ഹാക്ക് പൊതുതാൽപര്യത്തിന്റെ പേരിൽ 1,75, 20, 000 രൂപാ മാർജിൻ തുക സഹായത്തിന്റെ മൂന്നാം ഗഡുവായി നൽകാൻ അഴിമതിയിലൂടെ അനുകൂല ഉത്തരവ് നൽകിയതായും വിജിലൻസ് കുറ്റപത്രം ചൂണ്ടിക്കാട്ടുന്നു.

അനുവദിച്ച തുക മുഴുവൻ സഹകരണ സംഘത്തിന്റെ മറവിൽ ഒമ്പത് പ്രതികൾ കൈപ്പറ്റിയ ശേഷം ഇസ്ഹാക്കിന്റെ അറിവോടെ അസംസ്കൃത വസ്തുക്കൾ വിവിധ സ്ഥാപനങ്ങളിൽ നിന്ന് വാങ്ങിയതായും ആയതിലേക്ക് പണം നൽകിയതായും വ്യാജ രേഖകൾ ഉണ്ടാക്കുകയായിരുന്നു. ഇതിലേക്കായി അംഗത്വ രജിസ്റ്റർ , ഇൻവോയ്സ് രജിസ്റ്റർ , മിനിറ്റ്സ് ബുക്ക് , നൂൽ അസ്വാൻസ് രജിസ്റ്റർ , ദിന ബുക്ക് തുടങ്ങിയവയിൽ വ്യാജ രേഖപ്പെടുത്തലുകൾ വരുത്തി. ഇപ്രകാരം എൻ.സി.ഡി.സിയിൽ നിന്ന് ലഭിച്ച രണ്ടു കോടിയിൽ നിന്നും 1,15 , 45, 612 രൂപ പ്രതികൾ വഞ്ചനയിലൂടെ അപഹരിച്ചെടുത്ത് സർക്കാരിന് അന്യായ നഷ്ടം വരുത്തിയെന്നാണ് കേസ്. 163 രേഖകളോടൊപ്പം 152 പേരടങ്ങുന്ന സാക്ഷിപ്പട്ടികയും വിജിലൻസ് കോടതിയിൽ ഹാജരാക്കിയിട്ടുണ്ട്.