യുപിഎ സര്‍ക്കാരിന്റെ കാലത്തുണ്ടായ പിടിപ്പുകേടുകളാണ് ജനങ്ങള്‍ ഇപ്പോഴും അനുഭവിക്കുന്നതെന്ന് രാജീവ് ചന്ദ്രശേഖര്‍ എംപി. ബജറ്റ് ചര്‍ച്ചയ്ക്കിടെ മുന്‍ ധനമന്ത്രി പി. ചിദംബരത്തിന്റെ പ്രസ്താവനയ്ക്ക് നല്‍കിയ മറുപടിയിലാണ് ഇക്കാര്യം അറിയിച്ചത്.

പ്രാപ്തി കുറഞ്ഞവര്‍ ധനകാര്യം ഭരിക്കുന്നതിനാല്‍ രാജ്യത്തെ സാമ്പത്തിക രംഗം താളം തെറ്റിയിരിക്കുകയാണ്. ധനകാര്യം കൈകാര്യം ചെയ്യാന്‍ കോണ്‍ഗ്രസ്സിന് പ്രത്യേക കഴിവുണ്ടെന്നുമായിരുന്നു ചിദംബരത്തിന്റെ പ്രസ്താവന. എന്നാല്‍ യുപിഎ ഭരണകാലത്ത് സാമ്പത്തിക മാനേജ്മെന്റ് സമ്പൂര്‍ണ്ണ പരാജയമായിരുന്നെന്നും രാജീവ് ചന്ദ്രശേഖര്‍ രൂക്ഷമായി വിമര്‍ശിച്ചു. ദേശീയ സുരക്ഷ അടക്കമുള്ള കാര്യങ്ങളില്‍ വിട്ടുവീഴ്ച ചെയ്തു. മന്‍ മോഹന്‍സിങ് സര്‍ക്കാരിന്റെ പിടിപ്പുകേടുകളാണ് ജനം ഇപ്പോള്‍ അനുഭവിക്കുന്നത്.

യുപിഎ സര്‍ക്കാര്‍ നികുതി പിരിവില്‍ വീഴ്ച വരുത്തി. പൊതു മേഖലാ സ്ഥാപനങ്ങളെ തകര്‍ത്തു. അഴിമതി നടത്തി ഖജനാവിന് കോടികളുടെ നഷ്ടങ്ങള്‍ വരുത്തിവെച്ചു. പൊതു മേഖലാ ബാങ്കുകളെ കരകയറ്റാനായി ഏകദേശം അഞ്ചരലക്ഷം കോടി സര്‍ക്കാരിന് അധികമായി നല്‍കേണ്ടിവന്നു. ഇതൊക്കെയായിരുന്നു മന്‍മോഹന്‍ സിങ് സര്‍ക്കാരിന്റെ പ്രവര്‍ത്തന മികവെന്നും രാജീവ് ചന്ദ്രശേഖര്‍ അറിയിച്ചു.

കേന്ദ്രധമന്ത്രി നിര്‍മലത സീതാരാമന്‍ അവതരിപ്പിച്ച ബജറ്റില്‍ എല്ലാ ജന വിഭാഗങ്ങളുടേയും വികസനമാണ് ലക്ഷ്യമിടുന്നത്. ജനോപകാര പ്രദമായ പദ്ധതികളാണ് മോദി സര്‍ക്കാര്‍ ആവിഷ്‌കരിച്ച് നടപ്പാക്കിയിട്ടുള്ളത്. ഭരണത്തിലും ഐക്യത്തിലും ചോദ്യം ചെയ്യപ്പെടാനാകാത്തവിധത്തിലുള്ള പ്രകടനമാണ് എന്‍ഡിഎ സര്‍ക്കാര്‍ കാഴ്ചവെയ്ക്കുന്നത്.

പുനര്‍നിര്‍മാണത്തിനും ശുചീകരണത്തിനും ശേഷം വിശാലമായ വികസനം ലക്ഷ്യമിട്ടാണ് ബജറ്റ് അവതരിപ്പിച്ചിരിക്കുന്നത്. 2014ന് മുമ്പ് തകര്‍ന്ന സാമ്പത്തികാവസ്ഥയെ മെച്ചപ്പെടുത്താനുള്ള പദ്ധതികളാണ് ഒന്നാം മോദി സര്‍ക്കാര്‍ ആവിഷ്‌കരിച്ചത്. അതിന്റെ പ്രവര്‍ത്തനങ്ങളുടെ തുടര്‍ച്ചയായാണ് ഈ ബജറ്റെന്നും അദ്ദേഹം കുട്ടിച്ചേര്‍ത്തു.