കേരള പോലീസിലെ അഴിമതികൾ കോടതി കയറുമോ? ബഹറയുടെ സഹപ്രവർത്തകരായിരുന്നവർ വിഷയം കോടതിയിൽ എത്തിക്കാനുള്ള നീക്കങ്ങൾ അണിയറയിൽ ആരംഭിച്ചു. സി എ ജി അല്ല കർത്താവ് തമ്പുരാൻ നേരിട്ട് വന്നാലും ബഹ്റയെ മുഖ്യമന്ത്രി തൊടില്ലെന്ന ഉറപ്പിലാണ് ശുതുക്കൾ കോടതിയെ സമീപിക്കാൻ ഒരുങ്ങുന്നത്.

ബി ജെ പി കേന്ദ്രനേത്യത്വവുമായുള്ള തന്റെ അടുപ്പം മുതലാക്കി സി എ ജി റിപ്പോർട്ടിലെ പരാമർശങ്ങളിൽ നിന്ന് തലയൂരാനുള്ള ശ്രമങ്ങൾ ബഹ്റയും ആരംഭിച്ചിട്ടുണ്ട്. ബഹ്റക്ക് രണ്ട് പ്രബല ശത്രുക്കൾ കേരള പോലീസിൽ ഉണ്ട്. അത് റ്റി. പി. സെൻകുമാറും ജേക്കബ് തോമസുമാണ്. സെൻകുമാറിനെ കസേരയിൽ നിന്നും ഇറക്കിവിട്ടിട്ടാണ് ബഹ്റ സംസ്ഥാന പോലീസ് മേധാവി സ്ഥാനത്ത് അവരോധിതനായത്. ഇതോടെ കേരള പോലീസിലെ ഒരു വലിയ വിഭാഗം അദ്ദേഹത്തിന് എതിരായി. ജേക്കബ് തോമസിനെ വെള്ളത്തിലാക്കിയതും ബഹ്റ തന്നെ.

നരേന്ദ്ര മോദിയുമായുള്ള അടുപ്പമാണ് അന്ന് ബഹ്റയെ സഹായിച്ചത്. മുഖ്യമന്ത്രി പദം ഏറ്റെടുത്തയുടനെ ഇക്കാര്യത്തിൽ മോദി പിണറായി നിർദ്ദേശം നൽകിയിരുന്നുവെന്നാണ് വിവരം. ഇത് മുൻ കേന്ദ്ര ആഭ്യന്തര സഹമന്ത്രി മുല്ലപ്പള്ളി രാമചന്ദ്രൻ വെളിപ്പെടുത്തിയിരുന്നു.

12601 വെടിയുണ്ടകളും 25 റൈഫിളുകളും കേരള പോലീസിൽ നിന്നും കാണാതായ സംഭവം അതീവഗൗരവമായി മാറിയിരിക്കുകയാണ്. ഒപ്പം സർക്കാർ പണം ധൂർത്തടിച്ച് കമ്മീഷൻ അടിക്കുന്നു എന്ന വിവാദം പോലീസ് സേനക്ക് ആകമാനം നാറ്റകേസായി മാറി.

മുഖ്യമന്ത്രി പിണറായി വിജയന്റെ അറിവോടും സമ്മതത്തോടും കൂടിയാണ് ഡി.ജി.പി ലോക്‌നാഥ് ബഹ്‌റ വന്‍ അഴിമതി നടത്തിയതെന്നു കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ ഉൾപ്പെടെയുള്ളവർ കുറ്റപ്പെടുത്തിയതോടെ സർക്കാർ പ്രതിരോധത്തിലായി . അന്വേഷണം പ്രഖ്യാപിച്ച് ബഹറയെ തൽസ്ഥാനത്ത് നിന്ന് നീക്കം ചെയ്താൽ തീരാവുന്ന വിവാദം കത്തി പടരാൻ ആവശ്യമായ സാഹചര്യമാണ് സർക്കാർ ഒരുക്കി കൊടുക്കുന്നത്.

ഡി.ജി.പിയെ ഉടനടി തല്‍സ്ഥാനത്ത് നിന്നു മാറ്റി വിശ്വാസയോഗ്യതയുള്ള ഏജന്‍സി അന്വേഷിക്കണമെന്ന ആവശ്യം അംഗീകരിക്കാതിരിക്കാൻ വയ്യ എന്ന അവസ്ഥയിലാണ് സർക്കാർ എത്തി ചേർന്നിരിക്കുന്നത്.
ദേശീയ സുരക്ഷയെപ്പോലും ബാധിക്കുന്ന ക്രമക്കേടാണ് പോലീസിലുണ്ടായത് എന്നാണു സി.എ.ജി റിപ്പോര്‍ട്ട്.

മവോയിസ്റ്റ് മേഖലയില്‍ തണ്ടര്‍ബോള്‍ട്‌സ് സേനാംഗങ്ങള്‍ക്ക് ക്വാര്‍ട്ടേഴ്‌സ് പണിയാന്‍ നല്‍കിയ തുകപോലും വകമാറ്റിയെന്നത് അതീവ ഗുരുതരമാണ്. കേരള പോലീസിന്റെ ചരിത്രത്തില്‍ ഇതുപോലെ അഴിമതി നിറഞ്ഞ കാലം ഉണ്ടായിട്ടില്ല. അതിനിടെ എല്‍.ഡി.എഫ് സര്‍ക്കാര്‍ കഴിഞ്ഞ നാലുവര്‍ഷമായി നടത്തിയ അഴിമതിയുടെ എല്ലാ തെളിവുകളും കോണ്‍ഗ്രസ് ശേഖരിച്ചുവരികയാണെന്നു മുല്ലപ്പള്ളി പറഞ്ഞു. പിണറായിക്ക് അനഭിതനായ ഒരാൾ അധികാരത്തിലെത്തിയാൽ ഇടതുസർക്കാർ വെള്ളംകുടിക്കുമെന്ന കാര്യത്തിൽ സംശയം വേണ്ട.

രണ്ടു സീനിയര്‍ ഉദ്യോഗസ്ഥരെ മറികടന്നാണ് മുഖ്യമന്ത്രി ബഹ്‌റയെ ഡി.ജി.പിയാക്കിയത്. പ്രധാനമന്ത്രിയെ ഡല്‍ഹിയില്‍ സന്ദര്‍ശിച്ച ശേഷം മുഖ്യമന്ത്രി തിരുവനന്തപുരത്തെത്തി ഒപ്പിട്ട ആദ്യഫയല്‍ ഇതായിരുന്നു. ഡി.ജി.പിക്ക് ആഭ്യന്തരവകുപ്പില്‍ പൂര്‍ണ്ണ സ്വാതന്ത്ര്യവും നല്‍കി. അലനും താഹയ്ക്കുമെതിരെ യു.എ.പി.എ ചുമത്തിയപ്പോള്‍ അതുപോലീസ് നടപടിയാണെന്ന് പറഞ്ഞ് മുഖ്യമന്ത്രി ഒഴിയേണ്ടിവന്നു. ചരിത്രത്തില്‍ ആദ്യമാണ് ഒരു ആഭ്യന്തരവകുപ്പ് മന്ത്രി നിസഹായനായത്.

അലനും താഹക്കും എതിരെ യു എ പി എ ചുമത്തിയത് പോലും മുഖ്യമന്ത്രിയുടെ അറിവോടെയല്ല. കേസ് എൻ ഐ എക്ക് കൈമാറിയതും മുഖ്യമന്ത്രി അറിഞ്ഞിട്ടല്ല. പക്ഷേ ബഹ്റയെ മുഖ്യമന്ത്രിക്ക് പേടിയാണ് എന്നാണ് പൊതുവിലുള്ള ആക്ഷേപം.