ഒന്ന് അന്തിയുറങ്ങാനോ താമസിക്കാനോ ഒരു വീടില്ലാതെ വാർധക്യത്തിൽ ദുരിതമനുഭവിക്കുന്ന ജന്മങ്ങൾക്ക് താങ്ങായി മുഖ്യമന്ത്രി പിണറായി വിജയൻ. ദിവസവും 50 കിലോമീറ്റർ യാത്ര ചെയ്ത് ഗുരുവായൂരിലെത്തി ക്ഷേത്രത്തിൽ അന്തിയുറങ്ങുന്ന അമ്മയ്ക്കും മകൾക്കും ആശ്വാസമേകിയിരിക്കുകയാണ് മുഖ്യമന്ത്രി പിണറായി വിജയന്റെ നടപടി.

ഇവർക്ക് വേണ്ട അടിയന്തര സഹായം നൽകാൻ മുഖ്യമന്ത്രി പിണറായി വിജയൻ പാലക്കാട് ജില്ലാ കലക്ടറെ ചുമതലപ്പെടുത്തി. ഇവരെക്കുറിച്ചുള്ള വിവരങ്ങള്‍ ശേഖരിച്ചു റിപ്പോര്‍ട്ട് നല്‍കാന്‍ കലക്ടര്‍ എഡിഎമ്മിനോട് ആവശ്യപ്പെട്ടിട്ടുണ്ട്.

80 വയസ്സുള്ള അമ്മിണിയും 52 വയസ്സുള്ള മകൾ കാമാക്ഷിയും എന്നും രാത്രി ഷൊർണൂരിൽനിന്നു ബസ് കയറി 50 കിലോമീറ്റർ അകലെയുള്ള ഗുരുവായൂർ ക്ഷേത്രത്തിൽ എത്തിയാണ് അന്തിയുറങ്ങുന്നത്. ക്ഷേത്രത്തിന്റെ നടപ്പന്തലിൽ കിടന്നുറങ്ങി അടുത്ത ദിവസം കണ്ണനെ കണ്ടു തൊഴുത് ഷൊർണൂരിലേക്കു മടങ്ങും. പരിചയമുള്ള കടകളിലും വീടുകളിലും ചെറിയ ജോലികൾ ചെയ്തു പകൽ ചെലവിടും. വീണ്ടും രാത്രി ഗുരുവായൂരിലേക്ക് തിരിക്കും.

ചുഡുവാലത്തൂരിൽ പണ്ട് വീടും അഞ്ചേക്കറോളം സ്ഥലവും അമ്മിണിക്കുണ്ടായിരുന്നു. എന്നാൽ, എല്ലാം പല കാലത്ത് പല കാരണങ്ങളാൽ അന്യാധീനപ്പെട്ടുപോയി. കാമാക്ഷിക്ക് രാജൻ എന്നൊരു മകനുണ്ട്. കുട്ടിക്കാലത്തുണ്ടായ അപകടത്തിൽ ശരീരം തളർന്ന രാജൻ, കളിമണ്ണിൽ കരകൗശല വസ്തുക്കളുണ്ടാക്കും. ഷൊർണൂർ കാരക്കാട്ടെ സന്നദ്ധ സംഘടന ‘ജീവഥ’ നൽകിയ ബങ്ക് ഷോപ്പിൽ ലോട്ടറി വിൽക്കുകയാണ്. മൺപാത്ര തൊഴിലാളി വ്യവസായ സഹകരണ സംഘം ഓഫിസിന്റെ തിണ്ണയിലാണ് ഉറക്കം. മുഖ്യമന്ത്രി പിണറായി വിജയൻറെ ഇടപെടലിൽ ഏറെ സന്തോഷാതിലാണ് അമ്മിണിയും മകൾ കാമാക്ഷിയും.