ഗുരുവായൂർ കിഴക്കേനടയിലെ കല‌്പക ഫ്ലാറ്റിൽ വൃദ്ധസഹോദരിമാരെ അവശനിലയിൽ കണ്ടെത്തി. മാവേലിക്കര സ്വദേശികളായ തൊണ്ണൂറുകാരി രാജമ്മയേയും ഓമനയേയുമാണ് അവശനിലയിൽ കണ്ടെത്തിയത്. മുറിവുള്ള കാലിൽ ഉറുമ്പരിച്ച നിലയിലാണ് രാജമ്മയെ കണ്ടെത്തിയത്. നഗരസഭ ആരോഗ്യ വിഭാഗം ജീവനക്കാരും പൊലീസുമെത്തി ഇവരെ ആശുപത്രിയിൽ എത്തിക്കുകയായിരുന്നു . ഇവരുടെ ബന്ധുക്കൾക്കായി അന്വേഷണം തുടങ്ങിയിട്ടുണ്ട്.

ആറുമാസം മുമ്പ് ബന്ധുക്കളെന്ന് പരിചയപ്പെടുത്തിയ രണ്ടുപേരാണ് ഇവരെ ഫ്ലാറ്റിലെത്തിച്ചതെന്ന് സമീപവാസികൾ പറയുന്നു. എന്നാൽ പിന്നീട് ഈ ഫ്ലാറ്റിൽ ഇവരെ തിരക്കി ആരും വന്നില്ല . ദിവസവും ഗുരുവായൂരിൽ ദർശനം നടത്താനാണ് ഫ്ലാറ്റെടുത്തത്. മാവേലിക്കരയിലുള്ള ഇവരുടെ വീട് വിറ്റാണ് ഈ ഫ്ലാറ്റ് വാങ്ങിയത് എന്നാണ് സൂചന.ഇരുവരും അവിവാഹിതരാണ്. രാജമ്മയെ പരിചരിക്കാൻ കഴിയാത്ത വിധം അവശയാണ് ഓമന. സമീപകാലംവരെയും ഇവർ സ്ഥിരമായി അമ്പലത്തിൽ പോകാറുണ്ടായിരുന്നു. പ്രായമായവരെ ഇത്തരത്തിൽ തനിച്ചാക്കി പോയത് ഗൗരവമായാണ് കാണുന്നതെന്നും കുറ്റക്കാരെ ഉടൻ കണ്ടെത്തുമെന്നും പോലീസ് അറിയിച്ചു.