കൂടത്തായി കൊലപാതക പരമ്പരയില് നിര്ണ്ണായക വഴിത്തിരിവ്... സിലിയുടെ മൃതദേഹാവശിഷ്ടത്തില് സയനൈഡ് കണ്ടെത്തിയെന്ന് ചൂണ്ടിക്കാട്ടുന്ന കെമിക്കല് ലാബിന്റെ അന്തിമ റിപ്പോര്ട്ട് ഫയല് ചെയ്തു
കൂടത്തായി കൊലപാതക പരമ്പരയില് നിര്ണ്ണായക വഴിത്തിരിവ്. സിലിയുടെ മൃതദേഹാവശിഷ്ടത്തില് സയനൈഡ് കണ്ടെത്തിയെന്ന് ചൂണ്ടിക്കാട്ടുന്ന കെമിക്കല് ലാബിന്റെ അന്തിമ റിപ്പോര്ട്ട് ഫയല് ചെയ്തു. സയനൈഡ് നല്കിയാണ് സിലിയെ ജോളി കൊന്നെന്ന വാദത്തെ സാധൂകരിക്കുന്ന റിപ്പോര്ട്ട് കേസിലെ നിര്ണ്ണായക വഴിത്തിരിവാണ്. താമരശ്ശേരി മജിസ്ട്രേട്ട് കോടതിയിലാണ് ക്രൈം ബ്രാഞ്ച് റിപ്പോര്ട്ട് സമര്പ്പിച്ചത്.സിലിയെ അപസ്മാര രോഗമുണ്ടെന്ന് പറഞ്ഞ് ഓമശ്ശേരിയിലെ ആശുപത്രിയില് എത്തിക്കുകയും മഷ്റൂം ഗുളികയില് സയനൈഡ് കലര്ത്തി കൊലപ്പെടുത്തുകയും ചെയ്യുകയായിരുന്നു.
ഒപ്പം കുടിക്കാന് നല്കിയ വെള്ളത്തിലും സയനൈഡ് കലര്ത്തിയെന്നാണ് കണ്ടെത്തല്. സിലിക്ക് ഗുളിക കൊടുത്ത ശേഷം തളര്ന്ന അമ്മയെ സിലിയുടെ മകന് കണ്ടപ്പോള് മകനെ ഐസ്ക്രീം വാങ്ങാന് പണം കൊടുത്ത് ജോളി പുറത്തേക്ക് പറഞ്ഞയച്ചു. സംശയം തോന്നിയ മകന് തിരികെ വന്നപ്പോള്, സിലി മറിഞ്ഞ് വീഴുന്നത് കണ്ടുവെന്നും മൊഴിയുണ്ട്. ഈ കണ്ടെത്തലുകള്ക്ക് ബലം നല്കുന്നതാണ് കെമിക്കല് ലാബിന്റെ അന്തിമ റിപ്പോര്ട്ട്. കൂടത്തായി കൊലപാതക പരമ്ബരയില് ഏറ്റവും അവസാനം മരിച്ചത് സിലിയാണ്-2016 ജനുവരിയില്. സിലിയുടെ മൃതദേഹാവശിഷ്ടത്തില്നിന്ന് സയനൈഡിന്റെ അംശം കണ്ടെത്താന് കഴിയുമെന്ന പ്രതീക്ഷ അന്വേഷണസംഘത്തിനുണ്ടായിരുന്നു. മരണകാരണം വ്യക്തമാക്കുന്ന ശാസ്ത്രീയപരിശോധനാഫലം മാത്രമാണ് സിലി കേസിന്റെ കുറ്റപത്രം സമര്പ്പിക്കുമ്പോള് ഇല്ലാതിരുന്നത്. ഇതുകൂടി കിട്ടിയതോടെ ഏറ്റവും ശക്തമായ കേസായി ഇത് മാറിയെന്നാണ് പോലീസിന്റെ വിലയിരുത്തല്.
ആല്ഫൈന്, അന്നമ്മ തോമസ്, ടോംതോമസ്, മാത്യു മഞ്ചാടിയില് എന്നിവരുടെ മൃതദേഹാവശിഷ്ടങ്ങളുടെ രാസപരിശോധനാഫലമാണ് ഇനി പുറത്തുവരാനുളളത്.ജോളിയുടെ ഇപ്പോഴത്തെ ഭര്ത്താവായ ഷാജുവിന്റെ ആദ്യഭാര്യ സിലിയുടെ മരണവുമായി ബന്ധപ്പെട്ട കുറ്റപത്രം അന്വേഷണ ഉദ്യോഗസ്ഥര് നേരത്തെ താമരശ്ശേരി കോടതിയില് സമര്പ്പിച്ചിരുന്നു. ജോളിയാണ് ഈ കേസിലും ഒന്നാം പ്രതി. മാത്യുവാണ് രണ്ടും സ്വര്ണപ്പണിക്കാരന് പ്രജികുമാര് മൂന്നാം പ്രതിയുമാണ്. അതേസമയം, കൂടത്തായി റോയി വധക്കേസില് ജോളിയുടെ ജാമ്യാപേക്ഷയില് ഈ മാസം 19-ന് വിധി പറയും. കേസ് ഡിറ്റക്ടീവ് കഥ മാത്രമാണെന്നും റോയി തോമസ് മരിച്ചത് ഹൃദയാഘാതം കൊണ്ടാണെന്നും ജോളിയുടെ അഭിഭാഷകന് ബിഎ ആളൂര് വാദിച്ചു.
"
https://www.facebook.com/Malayalivartha