സംസ്ഥാനത്ത് മൂന്നു പേര്‍ക്ക് കൂടി കോവിഡ്-19 സ്ഥിരീകരിച്ചു. മലപ്പുറത്ത് രണ്ടു പേര്‍ക്കും കാസര്‍ഗോഡ് ഒരാള്‍ക്കുമാണ് രോഗം സ്ഥിരീകരിച്ചത്. 12,470 പേര്‍ നിരീക്ഷണത്തില്‍ കഴിയുന്നതായും 1639 പേരുടെ ഫലം നെഗറ്റീവാണെന്നും മുഖ്യമന്ത്രി . സംസ്ഥാനത്ത് 24 പേര്‍ക്കാണ് ഇതുവരെ കോവിഡ്-19 ബാധിച്ചിരിക്കുന്നത്. 72 പേരെ ഇന്ന് ആശുപത്രിയില്‍ പ്രവേശിപ്പിച്ചു. സൗദി, ദുബായ് എന്നിവിടങ്ങളില്‍ നിന്ന് വന്നവരെ വീടുകളില്‍ നിരീക്ഷണത്തില്‍ പാര്‍പ്പിച്ചിരുന്നു. അതില്‍ മൂന്ന് പേര്‍ക്കാണ് രോഗം സ്ഥിരീകരിച്ചത്.
അതേസമയം, നിയന്ത്രണങ്ങളെ തുടര്‍ന്ന് സംസ്ഥാനം വലിയ സാമ്പത്തിക പ്രതിസന്ധിയിലേക്കാണ് നീങ്ങുന്നത്. വ്യാപാര, തൊഴില്‍ മേഖല സ്തംഭനാവസ്ഥയിലാണ്. ജനങ്ങളുടെ ദൈനംദിന ജീവിതത്തെ പോലും പ്രതിസന്ധി ബാധിച്ചിരിക്കുന്നുവെന്നും മുഖ്യമന്ത്രി. വിനോദ സഞ്ചാര മേഖല കടുത്ത പ്രതിസന്ധിയിലാണ്. കെഎസ്ആര്‍ടിസി കോടികളുടെ നഷ്ടത്തിലാണ് ദിനംപ്രതി പ്രവര്‍ത്തിക്കുന്നത്. ബസ്, ഓട്ടോ യാത്രസംവിധാനങ്ങളെല്ലാം യാത്രാക്കാരില്ലാതെ പ്രതിസന്ധിയിലാണ്. ഇക്കാര്യങ്ങളില്‍ എന്തുചെയ്യാന്‍ സാധിക്കുമെന്ന് സര്‍ക്കാര്‍ പരിശോധിച്ചു വരികയാണെന്നും മുഖ്യമന്ത്രി പറഞ്ഞു. സര്‍വകക്ഷിയോഗം കോവിഡ്-19 പ്രതിരോധ പ്രവര്‍ത്തനങ്ങള്‍ ചര്‍ച്ച ചെയ്തുവെന്നും മാരക വൈറസിനെതിരെയുള്ള പ്രതിരോധത്തില്‍ എല്ലാവരും ഒരുമിച്ചു നില്‍ക്കുന്നുണ്ടെന്നും മുഖ്യമന്ത്രി പറഞ്ഞു.

കോവിഡ-്-19 ന്റെ മുന്‍കരുതല്‍ സംസ്ഥാനത്തെ സാമൂഹിക ജീവിതത്തെ ബാധിക്കരുതെന്നും ജനങ്ങള്‍ ജാഗ്രത പാലിച്ചാല്‍ മതിയെന്നും മുഖ്യമന്ത്രി കൂട്ടിച്ചേര്‍ത്തു. വിമാനത്താവളങ്ങളില്‍ തിരക്ക് കുറക്കണം.വിവാഹ ചടങ്ങുകളില്‍ പങ്കെടുക്കുന്നവരുടെ എണ്ണം പരമാവധി നൂറ് എന്ന തരത്തില്‍ പരിമിതപ്പെടുത്തണമെന്നും മുഖ്യമന്ത്രി ആവശ്യപ്പെട്ടു. വിനോദ സഞ്ചാരികളോട് മാന്യമായി പെരുമാറണമെന്നും മുഖ്യമന്ത്രി പറഞ്ഞു. മാര്‍ച്ച് മാസമായതിനാല്‍ വായ്പാ തിരിച്ചടവുകള്‍ക്ക് സാവകാശം നല്‍കാന്‍ ബാങ്കുകളോട് ആവശ്യപ്പെടുമെന്നും അദ്ദേഹം പറഞ്ഞു.