വിദേശത്തു നിന്നെത്തിയ മൂന്നു പേര്‍ക്കുകൂടി സംസ്ഥാനത്തു കോവിഡ്19 സ്ഥിരീകരിച്ചിരിക്കുകയാണ്. ഇതോടെ സംസ്ഥാനത്തു നിലവില്‍ കോവിഡ് ബാധിതരുടെ എണ്ണം 24 ആയി. പ്രതിരോധ പ്രവര്‍ത്തനങ്ങളുടെ ഭാഗമായി മതസ്ഥാപനങ്ങള്‍ക്കും ചടങ്ങുകള്‍ക്കും ഏര്‍പ്പെടുത്തിയിരിക്കുന്ന നിയന്ത്രണങ്ങള്‍ തുടരേണ്ടി വരുമെന്നാണ് മുഖ്യമന്ത്രി പിണറായി വിജയന്‍ പറഞ്ഞത്.

വിവിധ ജില്ലകളിലായി 12,740 പേര്‍ നിരീക്ഷണത്തിലാണ്. ഇവരില്‍ 12,470 പേര്‍ വീടുകളിലും 270 പേര്‍ ആശുപത്രികളിലുമാണു കഴിയുന്നത്. രോഗലക്ഷണങ്ങള്‍ ഉള്ള 2,297 വ്യക്തികളുടെ സാമ്പിള്‍ പരിശോധനയ്ക്ക് അയച്ചിട്ടുണ്ട്. ഇതില്‍ ലഭ്യമായ 1693 സാമ്പിളുകളുടെ പരിശോധനാ ഫലം നെഗറ്റിവ് ആണ്. സംസ്ഥാനത്ത് ഇതുവരെ 27 പേരില്‍ കോവിഡ് സ്ഥിരീകരിച്ചിട്ടുണ്ട്. ആദ്യത്തെ മൂന്നു പേര്‍ ചികിത്സയിലൂടെ സുഖപ്പെട്ടു.

കൊറോണ രോഗം സ്ഥിരീകരിച്ചു കഴിഞ്ഞാല്‍ അയാളുമായി ബന്ധപ്പെട്ടവരുടെ കോണ്ടാക്ട് ലിസ്റ്റ് തയ്യാറാക്കുകയാണ് ആദ്യം ചെയ്യുന്നത്. നേരിട്ട് ബന്ധമുള്ളവരെ പ്രൈമറി കോണ്ടാക്ടായും അല്ലാത്തവരെ സെക്കന്ററി കോണ്ടാക്ടായുമാണ് കണക്കാക്കുന്നത്. രോഗി സഞ്ചരിച്ച വഴികള്‍ തയ്യാറാക്കി അവിടെ പോയവരെ കണ്ടെത്തി നിരീക്ഷണത്തിലാക്കി വരികയാണ് ആരോഗ്യ വകുപ്പ്. ഇത് വിജയിക്കുകയും ചെയ്തുവരുന്നു.

അതേസമയം കോവിഡ് 19 സ്ഥിരീകരിച്ച വ്യക്തികള്‍ പോയ സ്ഥലങ്ങളില്‍ അതേ സമയത്ത് നിങ്ങളും ചെന്നിരുന്നോ എന്നറിയാന്‍ ഗൂഗിള്‍ മാപ് സഹായിക്കും. ഇതേ സൗകര്യം ഉപയോഗിച്ച് രോഗിയുടെ സഞ്ചാരവഴികളും കണ്ടെത്താനാകും. രോഗി പോയ സഞ്ചാരപഥം സര്‍ക്കാര്‍ പ്രസിദ്ധീകരിക്കും. എന്നാല്‍ സമയത്ത് തന്നെ നമ്മള്‍ അവിടെയുണ്ടായിരുന്നോ എന്നു ഓര്‍ത്തിരിക്കുക എളുപ്പമല്ല. ഇക്കാരണത്താല്‍ ആശയക്കുഴപ്പങ്ങളും ഏറെയാണ്.

പലരും ഊഹം വച്ച് ടെന്‍ഷനുമാകും. ഗൂഗിള്‍ മാപ്പിന്റെ ലൊക്കേഷന്‍ ടൈംലൈന്‍ എന്ന ഫീച്ചര്‍ ഉപയോഗിച്ചാല്‍ ഈ പ്രശ്‌നത്തിനു പരിഹാരമാകും. ജിപിഎസ് ഉള്ള ഫോണുകളില്‍ ലൊക്കേഷന്‍ ഹിസ്റ്ററി ഓണ്‍ ആക്കിയിട്ടാല്‍ നമ്മള്‍ ഓരോ ദിവസവും പോകുന്ന പ്രധാന സ്ഥലങ്ങള്‍ തനിയെ റെക്കോര്‍ഡ് ആകും. ലൊക്കേഷന്‍ ഹിസ്റ്ററിയും രോഗിയുടെ സഞ്ചാരപഥവും താരതമ്യം ചെയ്താല്‍ ചോദ്യത്തിന് ഉത്തരമാകും.

ആദ്യം ഫോണില്‍ ഗൂഗിള്‍ മാപ്‌സ് തുറക്കുക, വലതുവശത്ത് നമ്മുടെ പ്രൊഫൈല്‍ ചിത്രത്തില്‍ ടാപ് ചെയ്യുക. അതിന് ശേഷം മെനുവില്‍ കാണുന്ന 'ടൈംലൈന്‍' തുറക്കുക. പിന്നീട് മുകളില്‍ കാണുന്ന കലണ്ടറില്‍ ഓരോ ദിവസവും ക്ലിക് ചെയ്താല്‍ ആ ദിവസം എവിടെയൊക്കെ ഏതൊക്കെ സമയത്ത് പോയെന്ന് കാണാം. 'Places', എന്ന ടാബ് തുറന്നാല്‍ നമ്മള്‍ പോയ ഹോട്ടലുകള്‍, ഷോപ്പിങ് കേന്ദ്രങ്ങള്‍, വിമാനത്താവളങ്ങള്‍, ടൂറിസ്റ്റ് കേന്ദ്രങ്ങള്‍, സാംസ്‌കാരിക കേന്ദ്രങ്ങള്‍ എന്നിവ ലിസ്റ്റ് ചെയ്യും. 100 % കൃത്യതയുണ്ടാകില്ലെങ്കിലും ഏതാണ്ട് സമയവും സ്ഥലവും ശരിയായിരിക്കും.

ഗൂഗിള്‍ മാപ്‌സ്-സെറ്റിങ്ങ്‌സ്-പേഴ്‌സണല്‍ കണ്ടന്റ്-ലൊക്കേഷന്‍ ഹിസ്റ്റി എന്ന ഓപ്ഷന്‍ തുറന്ന് ഓണ്‍/ഓഫ് ചെയ്യാം. ലൊക്കേഷന്‍ ഹിസ്റ്ററി കളയാനായി 'Delete all Location History' എന്ന ഓപ്ഷന്‍ ഉപയോഗിക്കാം.

അതായത് സര്‍ക്കാര്‍ റൂട്ട് മാപ്പ് പ്രസിദ്ധീകരിക്കുമ്പോള്‍ ആ രോഗി സഞ്ചരിച്ച സമയത്ത് നമ്മളുണ്ടോയെന്ന് നമുക്ക് കണ്ടെത്താനാകുന്നതാണ് ഈ വഴി.