ഇറ്റലിയിൽ നിന്ന് വന്ന വിദേശിക്ക് വാഗമണിൽ റൂം കിട്ടിയില്ല... ശ്മശാനത്തിൽ കിടന്നുറങ്ങിയ ഇറ്റലിക്കാരൻ രാവിലെ കെ എസ്‌ ആർ ടി സി ബസ്സിൽ നേരെ കോട്ടയത്തേക്ക്...ഇപ്പോൾ ആളെ കാണാനുമില്ല...പരിഭ്രാന്തിയിൽ ജനങ്ങളും അധികൃതരും

ഇറ്റലിയിൽ നിന്നെത്തിയ വിദേശിക്ക് റൂം കൊടുക്കാൻ വാഗമണ്ണിലെ ഹോട്ടലുകാർ തയ്യാറായില്ല... താമസസൗകര്യം ലഭിക്കാത്തതിനെത്തുടർന്നു ശ്മശാനത്തിൽ കിടന്നുറങ്ങിയ ഇറ്റലിക്കാരൻ മടങ്ങിയതു കോട്ടയത്തേക്ക്.

ഞായറാഴ്ച പുലർച്ചെ 5.20നു കട്ടപ്പനയിൽ നിന്നു പുറപ്പെട്ട് 7നു വാഗമണ്ണിൽ എത്തിയ കെഎസ്ആർടിസി ബസിലുണ്ടായിരുന്ന വിദേശി കോട്ടയത്തേക്കു ടിക്കറ്റ് എടുത്തതായും ഇയാൾ കോട്ടയത്തെ കെഎസ്ആർടിസി ബസ് സ്റ്റാൻഡിൽ ഇറങ്ങിയതായും ബസിലെ വനിതാ കണ്ടക്ടർ പറയുന്നു. ഇതിനു ശേഷം ഇയാൾ എങ്ങോട്ടാണു പോയതെന്ന് അറിയില്ല. ശനിയാഴ്ച വൈകിട്ട് ആറിനാണു ഇറ്റലിക്കാരൻ വാഗമണ്ണിൽ എത്തിയത്. താമസസൗകര്യം തേടി മൂന്നു മണിക്കൂറോളം കറങ്ങിനടന്നു... എന്നിട്ടും ഇയാളെ കണ്ടെത്തി പരിശോധനക്ക് വിധേയനാക്കിയില്ല എന്നത് പ്രതിഷേധത്തിന് കാരണമായിട്ടുണ്ട്

രാത്രി ഒൻപത് മണിവരെ വാഗമണ്ണിൽ കറങ്ങി നടന്ന ഇയാളെ പിന്നീട് കാണാതായി. വിദേശി താമസസൗകര്യം തേടി റിസോർട്ടുകൾ കയറിയിറങ്ങുന്ന വിവരം ശനിയാഴ്ച രാത്രി തന്നെ സമൂഹമാധ്യമങ്ങളിൽ പ്രചരിച്ചിരുന്നു. ഈ വിവരം പ്രദേശവാസിയായ ടൂർ ഓപ്പറേറ്റർ വാഗമൺ പൊലീസിലും അറിയിച്ചു. പുലർച്ചെ ഒരുമണി വരെ തങ്ങൾ അന്വേഷിച്ചെങ്കിലും കണ്ടെത്താൻ കഴിഞ്ഞില്ലെന്നാണു പൊലീസിന്റെ വിശദീകരണം.

എന്നാൽ ഞായറാഴ്ച രാവിലെ ആറിനു വാഗമൺ – പുള്ളിക്കാനം റോഡിലെ ചർച്ച് ഓഫ് ക്രൈസ്റ്റ് പള്ളി ശ്മശാനത്തിൽ നിന്നു വിദേശി ഇറങ്ങിവരുന്നതു നാട്ടുകാരനായ ജസ്റ്റിൻ കണ്ടു. ഉടൻ തന്നെ പൊലീസ് സ്റ്റേഷനിൽ വിവരം അറിയിക്കുകയും ചെയ്തു. വൈകിട്ട് വെളുത്ത നിറമുള്ള ഷർട്ട് ധരിച്ചിരുന്ന ഇയാൾ മടങ്ങിപ്പോകുമ്പോൾ കാപ്പി നിറമുള്ള ഷർട്ടാണു ധരിച്ചിരുന്നത്.

ശ്മശാനത്തിൽ നിന്ന് ഒന്നരക്കിലോമീറ്റർ നടന്ന് എത്തിയ ശേഷമാണ് ഇറ്റലിക്കാരൻ കെഎസ്ആർടിസി ബസിൽ കയറി കോട്ടയത്തേക്കു പോയത്. ഈ സമയത്തു പൊലീസിന് എത്താൻ കഴിഞ്ഞില്ലെന്നു മാത്രമല്ല വിദേശി കടന്നുപോയ വിവരം സമീപത്തെ പൊലീസ് സ്റ്റേഷനുകളിൽ അറിയിക്കാനും കഴിഞ്ഞില്ല. ആറു പൊലീസ് സ്റ്റേഷനുകളുടെ പരിധിയിലൂടെയാണ് ഇയാൾ കോട്ടയത്തേക്കു പോയത്.എന്നിട്ടും ഇയാളെ കണ്ടെത്താൻ കഴിയാഞ്ഞത് ഗുരുതര വീഴ്ചയാണെന്നു നാട്ടുകാർ ആരോപിക്കുന്നു