ഏത്തമിടീക്കല്; സര്ക്കാര് നിര്ദ്ദേശങ്ങള് പാലിക്കാന് ബാധ്യതയുള്ള പൊലീസ് ഉദ്യോഗസ്ഥന് സ്വയം ശിക്ഷ നടപ്പിലാക്കാന് അധികാരമില്ല; ലോക്ക്ഡൗണ് നിര്ദ്ദേശംലംഘിച്ച് പുറത്തിറങ്ങിയവരെ കണ്ണൂര് എസ്പി യതീഷ് ചന്ദ്ര ഏത്തമിടുവിച്ച സംഭവം സംസ്ഥാന പൊലീസ് മേധാവി നേരിട്ട് അന്വേഷിക്കണമെന്ന ആവശ്യവുമായി സംസ്ഥാന മനുഷ്യാവകാശ കമ്മീഷന്
ലോക്ക്ഡൗണ് നിര്ദ്ദേശംലംഘിച്ച് പുറത്തിറങ്ങിയവരെ കണ്ണൂര് എസ്പി യതീഷ് ചന്ദ്ര ഏത്തമിടുവിച്ച സംഭവം സംസ്ഥാന പൊലീസ് മേധാവി നേരിട്ട് അന്വേഷിക്കണമെന്ന ആവശ്യവുമായി സംസ്ഥാന മനുഷ്യാവകാശ കമ്മീഷന്. സര്ക്കാര് നിര്ദ്ദേശങ്ങള് പാലിക്കാന് ബാധ്യതയുള്ള പൊലീസ് ഉദ്യോഗസ്ഥന് സ്വയം ശിക്ഷ നടപ്പിലാക്കാന് അധികാരമില്ലെന്ന് ജുഡീഷ്യല്അംഗം പി മോഹനദാസ് ഉത്തരവില് വ്യക്തമാക്കി.
എസ്പി യുടെ നിര്ദ്ദേശാനുസരണം ഏത്തമിട്ടവര് അതിന് തക്ക എന്ത് തെറ്റാണ് ചെയ്തതെന്ന് സംസ്ഥാന പൊലീസ് മേധാവി അന്വേഷിക്കണമെന്നും കമ്മീഷന് ആവശ്യപ്പെട്ടു. മൂന്നാഴ്ചക്കുള്ളില് അന്വേഷണ റിപ്പോര്ട്ട് സമര്പ്പിക്കണം. റിപ്പോര്ട്ട് ലഭിച്ച ശേഷം കേസ് കണ്ണൂരില് നടക്കുന്ന സിറ്റിംഗില് പരിഗണിക്കും. മാധ്യമ വാര്ത്തയുടെ അടിസ്ഥാനത്തില് സ്വമേധയാ രജിസ്റ്റര് ചെയ്ത കേസിലാണ് നടപടി.
കോവിഡ് ബാധയുടെ പശ്ചാത്തലത്തില് പൊലീസ് ഉദ്യോഗസ്ഥരും ആരോഗ്യപ്രവര്ത്തകരും നടത്തുന്ന മഹത്തായ സേവനം ഹൈക്കോടതി പോലും എടുത്തു പറഞ്ഞിട്ടുണ്ട്. ഒരു സാഹചര്യത്തിലും പൊലീസ് നിയമം ലംഘിക്കരുതെന്ന് ഹൈക്കോടതി ചൂണ്ടിക്കാണിച്ചിട്ടുണ്ട്. എന്നാല് കണ്ണൂര് എസ്പി യെ പോലെ ഉന്നതനായ ഒരു ഉദ്യോഗസ്ഥന് പരസ്യമായി ശിക്ഷ വിധിക്കുന്ന കാഴ്ചയാണ് കണ്ണൂരില് കണ്ടത്. നിയമം കര്ശനമായി നടപ്പിലാക്കണം. എന്നാല് ശിക്ഷ പൊലീസ് തന്നെ നടപ്പിലാക്കുന്നത് പൊലീസ് ആക്റ്റിന്റെ ലംഘനമാണ്. ശിക്ഷ വിധിക്കാന് പൊലീസിന് അധികാരമില്ല. വീട്ടില് സുരക്ഷിതരായിരിക്കണമെന്ന സര്ക്കാര് നിര്ദ്ദേശം കൃത്യമായി അനുസരിക്കണമെന്ന് കമ്മീഷന് അംഗം പി. മോഹനദാസ് ആവശ്യപ്പെട്ടു.
കേരളത്തില് കാണാത്ത തരത്തിലുള്ള ഒരു ദൃശ്യം ഇന്ന് കാണാനിടയായി എന്ന് പറഞ്ഞുകൊണ്ട് മുഖ്യമന്ത്രി വാര്ത്താ സമ്മേളനത്തില് ഇക്കാര്യം സൂചിപ്പിച്ചു. ഡിജിപിയോട് റിപ്പോര്ട്ട് ആവശ്യപ്പെട്ടതായും മുഖ്യമന്ത്രി അറിയിച്ചു. കണ്ണൂര് ജില്ലാ പോലീസ് മേധാവി ചിലരെ ഏത്തമിടുവിക്കുന്ന ദൃശ്യം കാണാനിടയായി. ഇത് സംബന്ധിച്ച് ഹോം സെക്രട്ടറി ഡിജിപിയുമായി ബന്ധപ്പെട്ട് ആവശ്യമായ റിപ്പോര്ട്ട് നല്കണമെന്ന് നിര്ദേശിച്ചിട്ടുണ്ട്. ഇത്തരം സംഭവങ്ങള് ഒരുതരത്തിലും ആവര്ത്തിക്കാന് പാടില്ല. പൊതുവെ മികച്ച പ്രവര്ത്തനം നടത്തുന്ന പോലീസന്റെ യശസ്സിനെയാണ് ഇത് പ്രതികൂലമായി ബാധിക്കുക. പല സ്ഥലങ്ങളിലും പ്രാഥമിക സൗകര്യം പോലുമില്ലാതെ ഡ്യൂട്ടി നിര്വഹിക്കുന്നവരാണ് പോലീസുകാര്. ഇതിന് നല്ല സ്വീകാര്യതയും ഉണ്ട്. അതിന് മങ്ങലേല്പ്പിക്കുന്ന സംഭവങ്ങള് ഉണ്ടാകാന് പാടില്ലെന്നാണ് സര്ക്കാര് നിലപാട് എന്നും മുഖ്യമന്ത്രി വ്യക്തമാക്കി.
കണ്ണൂര് അഴീക്കലിലാണ് ലോക്ക്ഡൗണ് നിര്ദേശങ്ങള് ലംഘിച്ചവരെ യതീഷ് ചന്ദ്ര ഏത്തമിടീച്ചത്. സംഭവം വാര്ത്തയായതോടെ ഡി.ജി.പി എസ്.പിയില് നിന്ന് വിശദീകരണം തേടിയിരുന്നു. അച്ചടക്ക നടപടി സ്വീകരിക്കുന്നത് ഉള്പ്പെടെയുള്ള കാര്യങ്ങള് യതീഷ് ചന്ദ്രയുടെ വിശദീകരണം ലഭിച്ചതിനു ശേഷമാകും തീരുമാനിക്കുക..ഇതാദ്യമായാണ് സംസ്ഥാനത്ത് ലോക്ക്ഡൗണ് നിര്ദേശങ്ങള് ലംഘിച്ചതിന് പോലീസ് പരസ്യശിക്ഷ നടപ്പാക്കിയത്. ശനിയാഴ്ച രാവിലെ 11 മണിയോടെയാണ് സംഭവം. പോലീസ് പട്രോളിങ്ങിനിടെയാണ് കടയ്ക്കു മുന്നില് ആളുകള് കൂട്ടംകൂടിയത് ശ്രദ്ധയില്പ്പെട്ടത്. പോലീസിനെ കണ്ടതും ഇവരില് ചിലര് ഓടിരക്ഷപ്പെട്ടു. ബാക്കിയുണ്ടായിരുന്നവരെ ഏത്തമിടീക്കുകയായിരുന്നു.
https://www.facebook.com/Malayalivartha
