ക്വിക്ക് ഡോക്ടറില്‍ രജിസ്റ്റര്‍ ചെയ്ത രോഗികളുടെ വിശദാംശങ്ങള്‍ ചോര്‍ത്താം ; ആരോപണവുമായി ബി.ജെ.പി. സംസ്ഥാന അദ്ധ്യക്ഷന്‍ കെ. സുരേന്ദ്രന്
ടെലി മെഡിസിന്‍പദ്ധതിയായ ക്വിക്ക് ഡോക്ടറില്‍ രജിസ്റ്റര്‍ ചെയ്ത രോഗികളുടെ വിശദാംശങ്ങള്‍ ചോര്‍ത്താം എന്ന ആരോപണവുമായി ബി.ജെ.പി. സംസ്ഥാന അദ്ധ്യക്ഷന്‍ കെ. സുരേന്ദ്രന് രംഗത്ത്. ആപ്പില്‍ രജിസ്റ്റര്‍ ചെയ്തവരുടെ പേര്, വിലാസം, ഫോണ്‍ നമ്ബര്‍, ഇ-മെയില്‍ വിലാസം, ബ്ലഡ്ഗ്രൂപ്പ് അടക്കമുള്ള വിശദാംശങ്ങള്‍ സുരക്ഷിതമല്ലെന്നാണ് ആരോപണം.
ടെലിമെഡിസിന്‍ സംവിധാനം ഉപയോഗിച്ച ആയിരക്കണക്കിന് രോഗികളുടെ വിവരങ്ങള്‍ പുറത്തായതായും രോഗികളുടെ ആരോഗ്യ വിവരങ്ങള്‍ സംസ്ഥാന സര്‍ക്കാര്‍ ലാഘവത്തോടെ കൈകാര്യം ചെയ്യുന്നുവെന്നും യുവമോര്‍ച്ച അദ്ധ്യക്ഷന്‍ സി.ആര്‍ പ്രഫുല്‍ കൃഷ്‌ണന്‍ ആരോപിച്ചു.
ആശുപത്രിയില്‍ പോകാതെ ഡോക്ടര്‍മാരുടെ സേവനം ലഭ്യമാക്കാന്‍ സര്‍ക്കാര്‍ ഒരുക്കിയ ഓണ്‍ലൈന്‍ സംവിധാനം ആയ ക്വിക് ഡോക്ടറില്‍ നിന്നുമാണ് വിവരങ്ങള്‍ ചോര്‍ന്നത്. രോഗികളുടെ വിവരങ്ങള്‍ സുരക്ഷിതമായിരിക്കും എന്ന് സര്‍ക്കാരും ക്വിക് ഡോക്ടര്‍ എന്ന സ്റ്റാര്‍ട്ട് അപ് സംരഭത്തിന്റെ മേധാവിയും അറിയിച്ചിരുന്നു . എന്നാല്‍ വിവരങ്ങള്‍ പൂര്‍ണ്ണമായും ചോര്‍ന്നുവെന്നാണ് യുവമോര്‍ച്ച ആരോപിക്കുന്നത്. പ്രവാസികള്‍ ഉള്‍പ്പെടെ ആയിരക്കണക്കിന് പേരാണ് ഈ സംവിധാനം ഉപയോഗിച്ചത്. ഇവരുടെ വിവരങ്ങള്‍ നിലവില്‍ ആര്‍ക്ക് വേണമെങ്കിലും ലഭ്യമാണെന്ന് പ്രഫുല്‍ വാര്‍ത്താസമ്മേളനത്തില്‍ ആരോപിച്ചു.
ജനങ്ങളുടെ ആരോഗ്യ വിവരങ്ങള്‍ മെഡിക്കല്‍ കമ്ബനികള്‍ അടക്കം ശേഖരിക്കുന്നുവെന്ന വസ്തുതകള്‍ നില നില്‍ക്കെയാണ് സര്‍ക്കാരിനെ പ്രതിക്കൂട്ടിലാക്കി വീണ്ടും ആരോപണങ്ങള്‍ ഉയരുന്നത് .
സര്‍ക്കാര്‍ ക്വിക് ഡോക്ടര്‍ ഹെല്‍ത്ത് കെയര്‍ എന്ന സ്വകാര്യ സ്റ്റാര്‍ട്ട്‌അപ്പുമായി ചേര്‍ന്ന് നടത്തിയ ഇടപാട് ദുരൂഹമാണ്. ടെലി മെഡിസിന്‍ ഉപയോഗപ്പെടുത്തുന്നവരുടെ സ്വകാര്യ വിവരങ്ങള്‍ വെബ്സൈറ്റില്‍ പരസ്യമാണ്. ഡേറ്റ സൂക്ഷിക്കുന്നത് സര്‍ക്കാര്‍ സെര്‍വറിലാണ് എന്ന് തെറ്റിദ്ധരിപ്പിക്കുകയാണ് കമ്ബനി ചെയ്തത്. യാതൊരു മുന്‍പരിചയവുമില്ലാത്ത കമ്ബനിക്ക് കരാര്‍ കൈമാറിയത് തന്നെ വന്‍ ഡേറ്റാ തട്ടിപ്പ് നടത്താനാണ്. ക്വിക് ഡോക്ടര്‍ സേവനം ഉപയോഗപ്പെടുത്തിയ ആയിരക്കണക്കിന് മലയാളികളുടെ സ്വകാര്യ വിവരങ്ങളാണ് പരസ്യമായിരിക്കുന്നത്. സംഭവത്തില്‍ ഉന്നതതല അന്വേഷണം വേണമെന്നും യുവമോര്‍ച്ച സംസ്ഥാന അദ്ധ്യക്ഷന്‍ ആവശ്യപ്പെട്ടു.
https://www.facebook.com/Malayalivartha
