പരീക്ഷാ നടത്തിപ്പ്: സ്‌കൂള്‍ തുറക്കാമെന്ന ഉത്തരവ് ആശയക്കുഴപ്പമുണ്ടാക്കി
പരീക്ഷാ നടത്തിപ്പിനു മാത്രം നിബന്ധനകള്‍ പാലിച്ചു വിദ്യാഭ്യാസ സ്ഥാപനങ്ങള്‍ തുറക്കാമെന്നു ചീഫ് സെക്രട്ടറി ഉത്തരവ് ഇറക്കിയത് എസ്എസ്എല്‍സി, ഹയര്‍ സെക്കന്‍ഡറി പരീക്ഷയെഴുതുന്ന ലക്ഷക്കണക്കിനു വിദ്യാര്‍ഥികളില്‍ ആശയക്കുഴപ്പമുണ്ടാക്കി. പരീക്ഷാ നടത്തിപ്പിനു നിബന്ധന പാലിച്ചു തുറക്കാമെന്നു ശനിയാഴ്ച മുഖ്യമന്ത്രി വാര്‍ത്താ സമ്മേളനത്തില്‍ പറഞ്ഞപ്പോള്‍ ത്തന്നെ ആശയക്കുഴപ്പമുണ്ടായിരുന്നു. പരീക്ഷാ ജോലികള്‍ എന്നാണ് ഉദ്ദേശിച്ചതെന്നു മുഖ്യമന്ത്രിയുടെ ഓഫിസ് വിശദീകരിച്ചു.
ഇലക്ട്രോണിക് ഉപകരണങ്ങളുടെ കാര്യക്ഷമത പരിശോധിക്കേണ്ട അധ്യാപകര്‍ക്കും വിദ്യാര്‍ഥികളുടെ പ്രമോഷന്‍ ലിസ്റ്റും മറ്റും തയാറാക്കുന്നവര്‍ക്കും കര്‍ശന നിയന്ത്രണങ്ങള്‍ പാലിച്ചു സ്‌കൂളിലെത്തി അനുമതി നല്‍കണമെന്നാണു പൊതുവിദ്യാഭ്യാസ വകുപ്പ് നല്‍കിയ നിര്‍ദേശം. എന്നാല്‍ ഇന്നലത്തെ ഉത്തരവില്‍ ഇതൊന്നും വ്യക്തമാക്കിയിട്ടില്ല.
സിബിഎസ്ഇ പരീക്ഷ ലോക്ഡൗണ്‍ പിന്‍വലിച്ചു 10 ദിവസം കഴിഞ്ഞു നടത്തുമെന്നും അതേ മാതൃക സംസ്ഥാനങ്ങള്‍ക്കും പിന്തുടരാമെന്നുമാണു കേന്ദ്ര മാനവശേഷി മന്ത്രി അറിയിച്ചിരുന്നത്. ഈ മാനദണ്ഡം പാലിച്ചാല്‍ പൊതുപരീക്ഷയ്ക്ക് 27-വരെ കാത്തിരിക്കണം. സര്‍വകലാശാലാ പരീക്ഷകള്‍ ജൂണിലേക്കു നീളാനാണു സാധ്യത. ഇതിനിടെയാണു ചീഫ് സെക്രട്ടറിയുടെ ഉത്തരവിലെ പരീക്ഷാ നടത്തിപ്പു പരാമര്‍ശങ്ങള്‍.<
അതിനിടെ ലോക്ഡൗണിനുശേഷം പരീക്ഷകള്‍ നടത്തുന്നതിനുള്ള സാധ്യത പഠിക്കാന്‍ പിഎസ്‌സി യോഗം തീരുമാനിച്ചു. മറ്റു തടസ്സങ്ങള്‍ ഇല്ലെങ്കില്‍ ജൂണില്‍ പരീക്ഷകള്‍ പുനരാരംഭിക്കാനാണ് ആലോചന. ഉദ്യോഗാര്‍ഥികളില്‍ നിന്നു കണ്‍ഫര്‍മേഷന്‍ വാങ്ങുകയും ചോദ്യക്കടലാസ് തയാറാക്കുകയും ചെയ്ത പരീക്ഷകളാകും ആദ്യം നടത്തുക. ആയിരത്തില്‍ താഴെ അപേക്ഷകരുള്ള പരീക്ഷകള്‍ പിഎസ്സിയുടെ ഓണ്‍ലൈന്‍ പരീക്ഷാ കേന്ദ്രങ്ങളില്‍ അകലം പാലിച്ചു നടത്താനാകുമോയെന്നു പരിശോധിക്കാന്‍ പരീക്ഷാ കണ്‍ട്രോളറെ ചുമതലപ്പെടുത്തി. അസി. സര്‍ജന്‍മാരുടെ തസ്തികയിലേക്കുള്ള പരീക്ഷ എന്‍ജിനീയറിങ് കോളജുകളിലെ ഓണ്‍ലൈന്‍ കേന്ദ്രങ്ങള്‍ ഉള്‍പ്പെടെ ഉപയോഗിച്ചു നടത്തുന്നതു പരിശോധിക്കും.
ജില്ലകളില്‍ എന്‍സിസി, സൈനിക് വെല്‍ഫെയര്‍ വകുപ്പില്‍ എല്‍ഡി ടൈപ്പിസ്റ്റ്/ക്ലാര്‍ക്ക് ടൈപ്പിസ്റ്റ്/ടൈപ്പിസ്റ്റ് ക്ലാര്‍ക്ക് (വിമുക്തഭടന്മാര്‍) തസ്തികയിലേക്കു സാധ്യതാ പട്ടിക പ്രസിദ്ധീകരിക്കും. മലപ്പുറം ജില്ലയില്‍ ഫുള്‍ടൈം ജൂനിയര്‍ ലാംഗ്വേജ് ടീച്ചര്‍ അറബിക് (യുപി- തസ്തികമാറ്റം); കൊല്ലം, എറണാകുളം, കാസര്‍കോട് ജില്ലകളില്‍ ആയുര്‍വേദ കോളജുകളില്‍ ഫാര്‍മസിസ്റ്റ് ഗ്രേഡ് 2 തസ്തികകളിലേക്ക് അഭിമുഖം നടത്തും.
ജനുവരിയില്‍ നടന്ന വകുപ്പുതല പരീക്ഷകളുടെ ഫലം പ്രസിദ്ധീകരിച്ചു. ജനുവരിയിലെ വിജ്ഞാപന പ്രകാരം ശേഷിക്കുന്ന പരീക്ഷകള്‍ക്ക് അപേക്ഷിച്ചവര്‍ക്ക് അടുത്ത ജൂലൈയിലെ വിജ്ഞാപനം അനുസരിച്ചു ഫീസ് ഇളവ് നല്‍കും. മെഡിക്കല്‍ വിദ്യാഭ്യാസ വകുപ്പില്‍ അസി. പ്രഫസര്‍ ഇന്‍ ഒഫ്താല്‍മോളജി തസ്തികയിലേക്കു ചുരുക്കപ്പട്ടിക പ്രസിദ്ധീകരിക്കും.
https://www.facebook.com/Malayalivartha
