ആംബുലന്‍സില്‍ ആളിനെ കടത്താനുള്ള ശ്രമം പോലീസ് പിടിക്കുന്നതായി പല ഇടങ്ങളില്‍ നിന്നും വിവരം ലഭിച്ചിട്ടുണ്ട് എന്നാല്‍ കാസര്‍കോട് ജില്ലയിലെ കുമ്പളയില്‍ നിന്നും ആംബുലന്‍സില്‍ കടത്തുകയായിരുന്ന ലഹരി ഉല്‍പന്നങ്ങള്‍ പോലീസ് പിടികൂടി എന്ന വാര്‍ത്ത പുറത്ത് വരികയാണ് . പരിശോധനക്കിടെ കുമ്പള പോലീസാണ് ഹാന്‍സ് ഉല്‍പന്നങ്ങള്‍ പിടികൂടിയത്. ശിഹാബ് തങ്ങള്‍ ചാരിറ്റബിള്‍ ട്രസ്റ്റിന്റെ പേരിലുള്ള ആംബുലന്‍സിലാണ് ഇവ കടത്തിയത്.

മുസ്ലിംലീഗ് നേതാവായിരുന്ന ശിഹാബ് തങ്ങളുടെ പേരിലുള്ള ആംബുലന്‍സില്‍ കോവിഡ് കാലത്ത് ലഹരി കടത്ത്. മട്ടന്നൂരിലെ ശിഹാബ് തങ്ങള്‍ റിലീഫ് സെന്ററിന്റെ ആംബുലന്‍സില്‍നിന്നാണ് 90 പാക്കറ്റ് നിരോധിത പുകയില വസ്തുക്കള്‍ കുമ്പള പൊലീസ് പിടികൂടിയത്. ഡ്രൈവര്‍ മട്ടന്നൂര്‍ മണ്ണൂര്‍ പൊറോറ മുര്‍ഷിദ മന്‍സിലിലെ പി പി മുസാദിഖി (29)നെ അറസ്റ്റുചെയ്തു.
രഹസ്യ വിവരത്തെതുടര്‍ന്ന് കുമ്പള എസ്ഐ എ സന്തോഷ്‌കുമാറിന്റെ നേതൃത്വത്തിലുള്ള സംഘം കുമ്പള ആരിക്കാടിയില്‍വച്ച് തിങ്കളാഴ്ച വൈകിട്ടാണ് കെഎല്‍ 58 ടി - 241 നമ്പര്‍ ആംബുലന്‍സില്‍ കടത്തുകയായിരുന്ന ലഹരിവസ്തുക്കള്‍ പിടികൂടിയത്. ഉപ്പളയില്‍നിന്നാണ് ലഹരിവസ്തുക്കള്‍ കയറ്റിയത്. പൊലീസ് കസ്റ്റഡിയിലെടുത്ത ആംബുലന്‍സിലെ രോഗികളെ മറ്റൊരു ആംബുലന്‍സില്‍ മട്ടന്നൂരിലേക്ക് അയച്ചു.
അതേസമയം പാലക്കാട് ഒറ്റപ്പാലത്ത് 108 ആംബുലന്‍സില്‍ നിന്ന് രക്ഷപ്പെടാന്‍ ശ്രമിച്ച യുവാവ് വാഹനത്തിന്റെ ചില്ല് എറിഞ്ഞു തകര്‍ത്തു. തമിഴ്‌നാട് മേട്ടുപ്പാളയം സ്വദേശി ഫക്കീര്‍ മുഹമ്മദിനെ പൊലീസ് സംരക്ഷണത്തില്‍ ജില്ലാ ആശുപത്രിയിലേക്കു മാറ്റി.

പറളിക്ക് സമീപം പാതയോരത്തു കൂടി നടന്നു പോകുകയായിരുന്ന യുവാവിനെ ഒറ്റപ്പാലം താലൂക്ക് ആശുപത്രിയില്‍ എത്തിക്കാനുള്ള ശ്രമത്തിനിടെയായിരുന്നു അതിക്രമം. മങ്കര പൊലീസ് ആംബുലന്‍സില്‍ കയറ്റി വിട്ട യുവാവ് ലക്കിടിയിലെത്തിയപ്പോഴേക്കും അക്രമ സ്വഭാവം പുറത്തെടുത്തു. രക്ഷപ്പെടാന്‍ ശ്രമിക്കുന്നതിനിടെ ആംബുലന്‍സിന്റെ ചില്ല് തകര്‍ക്കുകയായിരുന്നു. തുടര്‍ന്ന് പൊലീസ് എത്തി ആശുപത്രിയിലേക്ക് മാറ്റുകയായിരുന്നു.