സംസ്ഥാനത്ത് കൊവിഡ് രോഗപ്രതിരോധ പ്രവർത്തനങ്ങൾക്കായി കൊവിഡ് ടെസ്റ്റിങ് കിറ്റുകളും തെര്‍മല്‍ സ്‌ക്രീനിംഗ് സംവിധാനവും കോണ്‍ഗ്രസ് എം.പി ശശി തരൂര്‍ എത്തിച്ചുനല്‍കിയത് മുഖ്യമന്ത്രി പിണറായി വിജയന്‍ ഉള്‍പ്പെടെയുള്ളവരുടെ പ്രശംസ പിടിച്ചുപറ്റിയിരുന്നു. സംസ്ഥാനത്തിന് സഹായകമായ നിലപാടെടുത്തതിന് നിരവധി പേരാണ് സോഷ്യല്‍ മീഡിയയിലൂടെയും മറ്റും ശശി തരൂരിന് പ്രശംസയുമായി എത്തിയത്.

എന്നാല്‍ പതിവില്‍ നിന്നും വിരുദ്ധമായി ഇപ്പോള്‍ ഇടതുപക്ഷ ആഭിമുഖ്യമുള്ള സോഷ്യല്‍ മീഡിയ പേജുകളും അദ്ദേഹത്തിന് പ്രശംസ അറിയിച്ചുകൊണ്ട് രംഗത്ത് വന്നിരിക്കുകയാണ്. രാഷ്ട്രീയപരമായി ഭിന്നതകള്‍ ഉണ്ടെങ്കിലും 'കൊവിഡിന്റെ കാലത്ത് കോണ്‍ഗ്രസില്‍ നന്മ കണ്ടത് തരൂരില്‍ മാത്രമാണെ'ന്നാണ് ഇടതുപക്ഷ സോഷ്യല്‍ മീഡിയാ ഹാന്‍ഡിലുകള്‍ അഭിപ്രായപ്പെടുന്നത്.

കൊവിഡ് പ്രതിരോധത്തില്‍ കേരളത്തിന്റെ നേട്ടങ്ങളെ വിലയിരുത്തികൊണ്ട് ബ്രിട്ടനിലെ 'ഗാര്‍ഡിയന്‍' പത്രം ആരോഗ്യ മന്ത്രി കെ.കെ ശൈലജയുമായി നടത്തിയ അഭിമുഖം തരൂര്‍ തന്റെ ട്വിറ്റര്‍ ഹാന്‍ഡില്‍ വഴി പങ്കുവച്ചിരുന്നു. ശൈലജ ടീച്ചറെ പ്രശംസിച്ചുകൊണ്ടാണ് തരൂര്‍ ഈ അഭിമുഖം ട്വീറ്റ് ചെയ്തത്. മുന്‍പ് ശശി തരൂരിന്റെ പ്രവര്‍ത്തനങ്ങള്‍ക്ക് ഒരു ടെലിവിഷന്‍ ചാനലിലൂടെ ആരോഗ്യ മന്ത്രിയും തന്റെ നന്ദി അറിയിച്ചിരുന്നു.

രാഷ്ട്രീയ അതിരുകൾ കടന്നുള്ള തരൂരിന്റെ പ്രതികരണം വളരെ ഏറെ പ്രശംസ അർഹിക്കുന്നു. തരൂരിന് പിന്തുണയുമായി നിരവധിപേരാണ് രംഗത്തെത്തിയത്. രാഷ്ട്രീയ സിനിമാ രംഗത്തെ പ്രമുഖർ തരൂറിനെ പ്രശംസിച്ചു.

ശശി തരൂരിനെ പ്രശംസിച്ച്‌ നടി മാല പാര്‍വതിയും രംഗത്ത് വന്നിരിക്കുകയാണ്. രാഷ്ട്രീയം മാത്രം കളിക്കുന്ന പലരില്‍ നിന്ന് താങ്കള്‍ വേറിട്ട് നില്‍ക്കുന്നുവെന്നാണ് മാല പാര്‍വതി ഫേസ്ബുക്കില്‍ കുറിച്ചത്. രാഷ്ട്രീയ പകപോക്കലല്ല വേണ്ടത്, എന്ന തിരിച്ചറിവോടെ, നല്ലതിനെ നല്ലതെന്ന് പറഞ്ഞ്, തെറ്റിനെ തെറ്റ് എന്നും ചൂണ്ടി കാട്ടി താങ്കള്‍ ചെയ്യുന്ന പ്രവര്‍ത്തനം മാതൃകാപരമാണെന്നാണ് താരം കുറിക്കുന്നത്. കോണ്‍​ഗ്രസിന്റെ നേതൃത്വത്തിലേക്ക് താങ്കളെ പോലുള്ളവര്‍ ഉണ്ടാകണം എന്നാണ് ആ​ഗ്രഹിക്കുന്നതെന്നും മാല പാര്‍വതി കൂട്ടിച്ചേര്‍ത്തു. ഈ കൊറോണക്കാലത്ത് ശൈലജ ടീച്ചറോളം തന്നെ ഇഷ്ടം തോന്നിയ ഒരാളാണ് ശശി തരൂരെന്നായിരുന്നു സംവിധായകന്‍ മിഥുൻ മാനുവേലിന്റെ അഭിപ്രായം.