മലപ്പുറം കരുവാരകുണ്ട് കുണ്ടോടയില്‍ കഴിഞ്ഞ ദിവസം വൈകിട്ട് 3 മണിയോടെ ആര്‍ആര്‍ടി സംഘത്തോടൊപ്പം കാട്ടാനയെ വിരട്ടുന്നതിനിടെ പടക്കം പൊട്ടി തൊഴിലാളിയുടെ കൈപ്പത്തി തകര്‍ന്നു. കുണ്ടോട കുഴിക്കാടന്‍ അബ്ദുല്ല(48)യെ പരുക്കുകളോടെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

നിലമ്പൂരില്‍നിന്ന് ആര്‍ആര്‍ടി സംഘം കാട്ടാനയെ തുരത്താന്‍ സ്ഥലത്തെത്തിയിരുന്നു. കാട്ടാനക്കൂട്ടം വ്യാപകമായി കൃഷി നശിപ്പിച്ചതിനെത്തുടര്‍ന്നായിരുന്നു നടപടി. അബ്ദുല്ലയും കാട്ടാനക്കൂട്ടത്തെ വനത്തിലേക്ക് കയറ്റാന്‍ വനപാലകരോടൊപ്പം ഉണ്ടായിരുന്നു. പടക്കം പൊട്ടിച്ചു ആനയെ തുരത്തുന്നതിനിടെ ഗുണ്ട് കയ്യിലിരുന്ന് പൊട്ടുകയായിരുന്നു.

വലതുകയ്യിലെ ഒരു വിരല്‍ അറ്റുപോയി. കൈപ്പത്തിക്കും ഗുരുതരമായി പരുക്കേറ്റു.

ഇരുപതിലേറെ ആനകളാണ് ജനവാസ മേഖലയില്‍ ഇറങ്ങി ഭീതി പരത്തുന്നത്. ഇവിടെ കൈപ്പുള്ളി നൗഷാദ്, ഹാരിസ് എന്നിവരുടെ ആയിരത്തോളം വാഴ കാട്ടാന നശിപ്പിച്ചു.നൗഷാദിന്റെ ബൈക്കും കാട്ടാനക്കൂട്ടം തകര്‍ത്തു.