അവസാനമായി ഭാര്യയുടെ മുഖം ഒരുനോക്ക് കാണാന്‍ കൊതിച്ച് ആശങ്കകള്‍ക്കൊടുവില്‍ വിജയകുമാര്‍ നാടണഞ്ഞു. കരഞ്ഞുകലങ്ങിയ കണ്ണുകളുമായി നെടുമ്പാശ്ശേരി വിമാനത്താവളത്തിലെത്തിയപ്പോള്‍ വിട്ടുപിരിഞ്ഞ പ്രിയതമയുടെ ചാരത്തെത്താന്‍ ദുഃഖമേറെ സഹിച്ചതിന്റെ വേദന കഠിച്ചമര്‍ത്തിയിരുന്നു. മാധ്യമങ്ങളുടെയും സാമൂഹിക പ്രവര്‍ത്തകരുടെയും ഇടപെടലുകള്‍ക്കൊടുവില്‍ ശനിയാഴ്ച 6.20ന് നെടുമ്പാശ്ശേരി വിമാനത്താവളത്തിലെത്തിയ എയര്‍ ഇന്ത്യ എക്‌സ്പ്രസ് വിമാനത്തിലാണ് പാലക്കാട് കൊല്ലങ്കോട് ആനമാറി വടുകമ്പാടത്തെ വിജയകുമാര്‍ നാടണഞ്ഞത്.
ദുബൈയിലെ സ്വകാര്യ കമ്പനിയില്‍ ഇലക്ട്രിക്കല്‍ സൂപ്പര്‍വൈസറായ വിജയകുമാറിന്റെ ഭാര്യ ഗീത കഴിഞ്ഞ 10നാണ് ഹൃദയാഘാതം മൂലം നാട്ടില്‍ മരിച്ചത്. ഇതോടെ ഇന്ത്യന്‍ എംബസിയുടെ വെബ്‌സൈറ്റില്‍ അദ്ദേഹം പേര് രജിസ്റ്റര്‍ ചെയ്തു. എന്നാല്‍, സീറ്റൊഴിവില്ലെന്ന കാരണത്താല്‍ യാത്ര മുടങ്ങുകയായിരുന്നു. കരഞ്ഞുകൊണ്ട് ദുബൈ വിമാനത്താവളത്തിന് മുന്നില്‍ നിന്ന ഇദ്ദേഹത്തെ സാമൂഹിക പ്രവര്‍ത്തകരുടെ ഇടപെടലിലൂടെയാണ് നാട്ടിലേക്ക് അയക്കാന്‍ ടിക്കറ്റ് തരപ്പെടുത്തിയത്.

നെടുമ്പാശ്ശേരി വിമാനത്താവളത്തിലെത്തിയ അദ്ദേഹത്തെ പരിശോധനകള്‍ പൂര്‍ത്തീകരിച്ച് പ്രത്യേക ടാക്‌സിയില്‍ നാട്ടിലേക്ക് അയക്കുകയായിരുന്നു. നെടുമ്പാശ്ശേരിയിലെത്തിയാല്‍ നാട്ടിലേക്ക് പോകാന്‍ അനുമതി ലഭിക്കുമോ എന്ന ആശങ്കയും അദ്ദേഹത്തെ അലട്ടിയിരുന്നു. എന്നാല്‍, തടസ്സങ്ങളൊന്നുമില്ലാതെ പ്രത്യേക വാഹനത്തില്‍ പാലക്കാട്ടേക്ക് പോകാന്‍ അനുവദിക്കുകയായിരുന്നു. നാട്ടില്‍ പ്രത്യേകം ഒരുക്കിയിരിക്കുന്ന വീട്ടിലെ നിരീക്ഷണത്തിലേക്കാണ് വിജയകുമാറിനെ രാത്രി എത്തിച്ചത്. ഞായറാഴ്ച മാനദണ്ഡങ്ങള്‍ പാലിച്ച് ഭാര്യയുടെ മൃതദേഹം കാണാനുള്ള സൗകര്യമൊരുക്കും. മുടങ്ങിയ യാത്രകള്‍ക്കൊടുവില്‍ വിജയകുമാറെത്തുന്നതിനായി കാത്തുവെച്ചിരിക്കുകയായിരുന്നു ഭാര്യയുടെ മൃതദേഹം. വിജയകുമാര്‍-ഗീത ദമ്പതികള്‍ക്ക് മക്കളില്ല.