ഇത് ഇന്ത്യയാണ്. ഇന്ത്യയെ ചൊറിയാൻ വന്നാൽ കയ്യും കെട്ടി നോക്കി നിൽക്കില്ല, കൊടുക്കേണ്ടത് അങ്ങ് പാകിസ്ഥാന്റെ നെഞ്ചത്ത് കയറിയായാലും കൊടുത്തിരിക്കും.. ഭീകരതയും സൈബര്‍ ജിഹാദും കൂടാതെ കശ്മീരി യുവാക്കളെ മയക്കുമരുന്നിനടിമയാക്കാനും ശ്രമം നടത്തിയ പാകിസ്ഥാന് തക്ക തിരിച്ചടി നല്‍കിയിരിക്കുകയാണ് ഇന്ത്യന്‍ സൈന്യം.

ജമ്മു കശ്മീരിലെ കഞ്ചാവ് തോട്ടങ്ങള്‍ നശിപ്പിച്ചാണ് സൈന്യം പാകിസ്ഥാന് മറുപടി നല്‍കിയത്. കനാലുകളിലും മറ്റ് പ്രദേശങ്ങളിലും വളർത്തിയിരുന്ന കഞ്ചാവ് ചെടികളാണ് സുരക്ഷ സേനയും നാർക്കോട്ടിക്സ് കൺട്രോൾ ബ്യൂറോയും സംയുക്തമായി നശിപ്പിച്ചത്. ഭീകരരുടെ പ്രധാന വരുമാന മാർഗ്ഗങ്ങളിൽ ഒന്നാണ് കഞ്ചാവ് കച്ചവടവും കടത്തും. കഞ്ചാവ് – മയക്കു മരുന്ന് കടത്താൻ പാക് പിന്തുണയുള്ള ഭീകര സംഘടനകൾ കശ്മീരി യുവാക്കളെയാണ് ഉപയോഗിക്കുന്നത്.

നേരത്തെ തെക്കൻ കശ്മീരിലെ ചില മേഖലയിൽ മാത്രം ഉണ്ടായിരുന്ന കഞ്ചാവ് വളർത്തൽ മറ്റ് ജില്ലകളിലേക്കും വ്യാപിച്ചതായാണ് വിലയിരുത്തൽ. ഇതിനെ തുടർന്നാണ് ആന്റി നാർക്കോട്ടിക്സ് ടാസ്ക് ഫോഴ്സ് രൂപവത്കരിച്ചത്. കഞ്ചാവിൽ നിന്ന് ഹെറോയിൻ നിർമ്മിച്ച് കടത്തി പകരം ആയുധങ്ങൾ കൈക്കലാക്കുകയാണ് ഭീകര സംഘടനകൾ ചെയ്യുന്നത്. ഇറാൻ , അഫ്ഗാനിസ്താൻ , പാകിസ്താൻ എന്നിവിടങ്ങളിൽ കഞ്ചാവ് കൃഷിയും അനുബന്ധ മയക്ക് മരുന്ന് കച്ചവടവും കടത്തും വ്യാപകമാണ്.

ഭീകരതയും സൈബർ ജിഹാദും കൂടാതെ കശ്മീരി യുവാക്കളെ മയക്കുമരുന്നിനടിമയാക്കിയും ഇന്ത്യക്കെതിരെ യുദ്ധം ചെയ്യുകയാണ് പാകിസ്താൻ. കഴിഞ്ഞ രണ്ടു തലമുറകളെ ഭീകരത കൊണ്ട് നശിപ്പിച്ച പാകിസ്താൻ പുതിയ തലമുറയെ മയക്ക് മരുന്നിനടിമകളാക്കാനുള്ള ശ്രമമാണ് നടത്തുന്നതെന്നാണ്‌ റിപ്പോർട്ട്. ഇതിനെ ശക്തമായി പ്രതിരോധിക്കാനാണ് പ്രത്യേക ആന്റി നാർക്കോട്ടിക്സ് ടാസ്ക് ഫോഴ്സ് രൂപീകരിച്ചത്.

ടാസ്ക് ഫോഴ്സിന്റെ ചുമതല എസ്.പിക്കാണ്. രണ്ട് ഡി.വൈ.എസ്.പിമാരും 9 ഇൻസ്പെക്ടർമാരുമടക്കം നൂറു പേരാണ് സംഘത്തിലുള്ളത്.

അതേസമയം കഴിഞ്ഞ ദിവസം ജമ്മു കശ്മീരിൽ സുരക്ഷാ ഉദ്യോഗസ്ഥർക്ക് നേരെ ഭീകരുടെ ആക്രമണം നടന്നു. ഭീകരർ നടത്തിയ വെടിവെപ്പിൽ ഒരു പോലീസ് ഉദ്യോഗസ്ഥൻ വീര മൃത്യുവരിച്ചു. ജമ്മു കശ്മീർ പോലീസ് ഹെഡ് കോൺസ്റ്റബിൾ മുഹമ്മദ് ആമിൻ ഭഗതാണ് വീരമൃത്യുവരിച്ചത്. ജമ്മു കശ്മീരിലെ കുൽഗാമിലാണ് സംഭവം.

കുൽഗാമിലെ ഫ്രിസൽ പ്രദേശത്ത് വിന്യസിച്ചിരുന്ന സുരക്ഷാ ഉദ്യോഗസ്ഥരുടെ സംഘത്തിന് നേരെയാണ് ആക്രമണം ഉണ്ടായത്. സിആർപിഎഫ് ഉദ്യോഗസ്ഥരും ജമ്മു കശ്മീർ പോലീസ് ഉദ്യോഗസ്ഥരുമാണ് സംഘത്തിൽ ഉണ്ടായിരുന്നത്. അപ്രതീക്ഷിതമായി ഇവർക്ക് നേരെ ഭീകരർ വെടിയതിർക്കുകയായിരുന്നു. ആക്രമണത്തിൽ മുഹമ്മദ് ആമിന് ഗുരുതരമായി പരിക്കേറ്റു. തുടർന്ന് ആശുപത്രിയിലേക്ക് കൊണ്ടു പോകുന്ന വഴിയാണ് അദ്ദേഹത്തിന് ജീവൻ നഷ്ടമായത്.

ആക്രമണം ഉണ്ടായ പ്രദേശത്ത് സുരക്ഷാ സേന തെരച്ചിൽ നടത്തുകയാണ്. സംഭവത്തിൽ കേസ് എടുത്ത് അന്വേഷണം ആരംഭിച്ചതായി ബന്ധപ്പെട്ട വൃത്തങ്ങൾ അറിയിച്ചു.