ലോകത്തിനു കേരളം മാതൃകയായതെങ്ങനെ ,എന്താണ് കേരളം മോഡല്‍ എന്നീ നിരവധി ചോദ്യങ്ങള്‍ മറ്റു രാജ്യങ്ങള്‍ക്ക് കേരളത്തോട് ചോദിക്കാനുണ്ട് .ലോകം മുഴുവന്‍ പ്രതീക്ഷയുടെ പുത്തന്‍ കാലമൊരുക്കിയ ദൈവത്തിന്റെ സ്വന്തം നാട്ടിലെ ആരോഗ്യ മന്ത്രിയെ തേടി സാക്ഷാല്‍ ബി ബി സി വരെ എത്തിയിരിക്കുകയാണ് .കാര്യങ്ങള്‍ വളരെ കൃത്യതയോടെ എഴുതി തയ്യാറാകാതെ തന്നെ അവതരിപ്പിക്കാന്‍ കഴിയുന്ന ഷൈലജ ടീച്ചറുടെ വൈഭവം മലയാളികള്‍ക്കറിയാവുന്ന കാര്യമാണ് .രാജ്യം കണ്ട ഏറ്റവും മികച്ച മന്ത്രിമാരിലൊരാള്‍ എന്ന ഖ്യാതി ഇതിനോടകം തന്നെ അവര്‍ സ്വന്തമാക്കിയിരുന്നു എന്ന് തന്നെ പറയേണ്ടി വരും .ടീച്ചറുടെ സൗമ്യമായ പ്രതികരണം ആവേശത്തോടെയാണ് ബി ബി സി വരവേറ്റത് .കാര്യങ്ങള്‍ വിശദമായി പഠിച്ചു അവതരിപ്പിക്കാന്‍ പ്രത്യേക കഴിവ് തന്നെയാണ് ആരോഗ്യമന്ത്രിക്കുള്ളത്.

നിലവില്‍ കേരളത്തില്‍ രോഗികളുടെ എണ്ണത്തില്‍ മറ്റു സംസ്ഥാനങ്ങളെ അപേക്ഷിച്ച് താരതമ്യേന കുറവാണെങ്കിലും സദാ ജാഗ്രത പുലര്‍ത്തണമെന്ന അഭിപ്രായം തന്നെയാണ് ആരോഗ്യവകുപ്പ് ദിവസേന പറയുന്നത് .കേരളത്തിലെ സ്ഥിതി രാജ്യത്തിന് തന്നെ മാതൃകയാണ് എന്ന അഭിപ്രായം കേന്ദ്രനേതൃത്വവും തുറന്നു സമ്മതിക്കുമ്പോള്‍ കേരളത്തെ കുറിച്ചറിയാന്‍ കൂടുതല്‍ രാജ്യങ്ങളില്‍ നിന്നുള്ളവര്‍ സംസ്ഥാന സര്‍ക്കാരുമായി നേരിട്ട് ബന്ധപ്പെട്ടുകൊണ്ടിരിക്കുകയാണ്

കോവിഡിനെതിരായ കേരളത്തിന്റെ പ്രതിരോധം രാജ്യാന്തര മാധ്യമം ബിബിസിയില്‍ തല്‍സമയം വിശദീകരിച്ച് ആരോഗ്യമന്ത്രി കെ.കെ. ശൈലജ എത്തിയത് മലയാളി സമൂഹത്തിനു ആവേശം പടര്‍ത്തിയിരിക്കുകയാണ് . കൊറോണ വൈറസിനെ ചെറുക്കാന്‍ കേരളം എടുത്ത നടപടികളും പ്രതിരോധപ്രവര്‍ത്തനങ്ങളും സംബന്ധിച്ച് ബിബിസി വേള്‍ഡ് ന്യൂസ് അവതാരകയുടെ ചോദ്യങ്ങള്‍ക്ക് മന്ത്രി ശൈലജ മറുപടി നല്‍കി. തല്‍സമയ ചര്‍ച്ചയുടെ വിഡിയോ സമൂഹമാധ്യമങ്ങളിലും വൈറലായി.

കേരള മോഡലിന് കയ്യടിയുമായി നിരവധി പേരാണ് ഈ വിഡിയോയ്ക്ക് കമന്റുകളുമായി എത്തിയത് സംസ്ഥാന സര്‍ക്കാരിന്റെ മികവുറ്റ പ്രവര്‍ത്തങ്ങളുടെ കൂടി അംഗീകാരമാണ് . കോവിഡ് പ്രതിരോധിക്കാന്‍ വൈറസ് സ്ഥിരീകരിച്ച ആദ്യഘട്ടത്തില്‍ തന്നെ കൃത്യമായ മാര്‍ഗ നിര്‍ദേശങ്ങള്‍ നല്‍കി പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കി. വിവിധയിടങ്ങളില്‍ നിന്നും എത്തിയവരെ പരിശോധിച്ചതിനൊപ്പം രോഗലക്ഷണങ്ങള്‍ ഉള്ളവരെ ഐസലേറ്റ് ചെയ്തു. രോഗികള്‍ക്കുമേല്‍ ആരോഗ്യപ്രവര്‍ത്തകരുടെ കൃത്യമായ നിരീക്ഷണം ഏര്‍പ്പെടുത്തി. രോഗ വ്യാപനം തടയാന്‍ ഇതു സഹായിച്ചുവെന്നും മന്ത്രി വിശദീകരിച്ചു.