കൊല്ലത്തെ ആരോഗ്യ പ്രവര്‍ത്തകക്ക് കോവിഡ് ബാധിച്ചതിന്റെ ഉറവിടം കണ്ടെത്താനാകാതെ ആരോഗ്യ വകുപ്പ്. ആരോഗ്യ പ്രവര്‍ത്തകയുമായി സമ്പര്‍ക്കം പുലര്‍ത്തിയ ചാത്തന്നൂർ എം.എൽ.എ ജി.എസ് ജയലാല്‍ അടക്കമുളള ജനപ്രതിനിധികള്‍ നിരീക്ഷണത്തിലാണ്. ഡോക്ടർമാര്‍ അടക്കമുള്ള ആരോഗ്യ പ്രവർത്തകരെയും നിരീക്ഷണത്തിലാക്കി.

ഇത്തിക്കര ബ്ലോക്ക് പഞ്ചായത്ത് അംഗം കൂടിയായ ആശാ പ്രവർത്തകയ്ക്ക് കോവിഡ് ബാധിച്ചതിന്റെ ഉറവിടം കണ്ടെത്താനാവാതെ ആരോഗ്യ വകുപ്പ് കുഴങ്ങിയിരിക്കുന്നത് . നേരത്തെ ചാത്തന്നൂരിൽ രോഗം ബാധിച്ചവരുടെ ഉറവിടവും കണ്ടെത്താൻ കഴിഞ്ഞിരുന്നില്ല. മൂന്ന് ആഴ്ച മുൻപാണു ചാത്തന്നൂർ കുടുംബാരോഗ്യ കേന്ദ്രത്തിലെ 3 ആരോഗ്യ പ്രവർത്തകർക്ക് കോവിഡ് സ്ഥിരീകരിച്ചത്. കല്ലുവാതുക്കൽ ശ്രീരാമപുരം സ്വദേശിയായ അറ്റൻഡർ, മുഖത്തല സ്വദേശിയായ നഴ്സ്, ചാത്തന്നൂർ സ്വദേശിയായ ആശാ പ്രവർത്തക എന്നിവർക്കാണ് അന്നു കോവിഡ് ബാധിച്ചത്.ഈ മാസം ഒന്നാം തിയ്യതി മുതൽ കോവിഡ് പ്രതിരോധ പ്രവർത്തനങ്ങളുടെ ഭാഗമായി ഇവർ വിവിധ വീടുകൾ സന്ദർശിച്ചിരുന്നു. രോഗബാധ അവിടെ നിന്നാകാമെന്നാണ് സംശയം. ഇവരുടെ റൂട്ട്മാപ്പ് ജില്ലാഭരണകൂടം പുറത്തിറക്കി.

ആരോഗ്യപ്രവർത്തകയ്ക്ക് രോഗം ബാധിച്ചതോടെ ചാത്തന്നൂർ, കല്ലുവാതുക്കൽ പ്രദേശങ്ങളിൽ ജില്ലാഭരണകൂടം അതീവ ജാഗ്രതാ നിർദേശം നൽകിയിട്ടുണ്ട്. ഇത്തിക്കര ബ്ലോക്ക് പഞ്ചായത്ത് ഓഫീസും പാരിപ്പളളി പ്രാഥമിക ആരോഗ്യകേന്ദ്രവും അടച്ചു. കൊല്ലം ജില്ലക്കാരായ രണ്ട് പേരാണ് നിലവിൽ രോഗം ബാധിച്ച് ചികിത്സയിലുള്ളത്.

ഇതിനു പുറമേ ചാത്തന്നൂർ സ്റ്റാൻഡേർഡ് ജംക്‌ഷനിലുള്ള ഒൻപതു വയസ്സുകാരനും രോഗം ബാധിച്ചിരുന്നു. ആശാ പ്രവർത്തകയ്ക്ക് ആയിരുന്നു ആദ്യം രോഗം സ്ഥിരീകരിച്ചത്. ഇതിൽ ആരുമായി നേരിട്ടു സമ്പർക്കം ഉണ്ടായിട്ടില്ലെന്നാണ് ബ്ലോക്ക് പഞ്ചായത്ത് അംഗം പറയുന്നത്. എന്നാൽ ഒരാഴ്ച മുൻപ് ബെംഗളൂരുവിൽ നിന്നെത്തി, പാരിപ്പള്ളി തെറ്റിക്കുഴിയിലെ വീട്ടിൽ നിരീക്ഷണത്തിലായിരുന്ന യുവാവിനെ ബ്ലോക്ക് പഞ്ചായത്ത് അംഗം സന്ദർശിച്ചിരുന്നു. ഈ യുവാവിന്റെ സ്രവം ഇന്നലെ ജില്ലാ ആശുപത്രിയിൽ പരിശോധനയ്ക്ക് ശേഖരിച്ചു.

ബ്ലോക്ക് പഞ്ചായത്ത് അംഗവുമായി നേരിട്ടു സമ്പർക്കമുള്ള കല്ലുവാതുക്കൽ പഞ്ചായത്തിലെ അംഗങ്ങളിൽ 14 പേരുടെ സാംപിൾ ഇന്നലെ ജില്ലാ ആശുപത്രിയിൽ ശേഖരിച്ചു. ഇത്തിക്കര ബ്ലോക്ക് പഞ്ചായത്ത്, കല്ലുവാതുക്കൽ പഞ്ചായത്ത്, ഇളംകുളം സർവീസ് സഹകരണ ബാങ്ക്, പാരിപ്പള്ളി പിഎച്ച്സി എന്നിവിടങ്ങളിൽ അണുനശീകരണം നടത്തി. ക്വാറന്റീനിൽ കഴിയുന്ന ജീവനക്കാർക്ക് പകരം ജീവനക്കാരെ ചുമതലപ്പെടുത്തി ബാങ്കുകളുടെ പ്രവർത്തനം തുടരാൻ ആരോഗ്യ വകുപ്പ് നിർദേശിച്ചു.

കോവിഡ് പശ്ചാത്തലത്തിൽ പാരിപ്പള്ളി പിഎച്ച്സി മാത്രമാണ് അടച്ചത്. ഇതിന്റെ പ്രവർത്തനം ഇന്ന് പുനരാരംഭിക്കുമെന്ന് ബന്ധപ്പെട്ടവർ പറഞ്ഞു. സെന്റിനൽ സർവയ്‌ലൻസിന്റെ ഭാഗമായി സാംപിൾ ശേഖരിച്ചു പരിശോധിച്ചപ്പോഴാണ് ഇത്തിക്കര ബ്ലോക്ക് പഞ്ചായത്ത് മീനമ്പലം ഡിവിഷൻ അംഗത്തിനു രോഗം കണ്ടെത്തിയത്. ശനി രാത്രി പാരിപ്പള്ളി മെഡിക്കൽ കോളജ് ആശുപത്രിയിൽ പ്രവേശിപ്പിച്ച ഇവർക്ക് രോഗ ലക്ഷണങ്ങൾ ഒന്നുമില്ല. ഇന്ന് ഇവരുടെ സ്രവം വീണ്ടും പരിശോധനയ്ക്ക് അയയ്ക്കും.

ഇത്തിക്കര ബ്ലോക്ക് പഞ്ചായത്ത് അംഗം കൂടിയായ ആശാ പ്രവർത്തകയുടെ വീട്ടുകാർ ഉൾപ്പെടെ 27 പേരുടെ പരിശോധന ഫലം നെഗറ്റീവ്. ബ്ലോക്ക് പഞ്ചായത്ത് അംഗത്തിന്റെ ഭർത്താവ്, 2 മക്കൾ, പിതാവ്, പാരിപ്പള്ളി പിഎച്ച്സിയിലെ 21 ജീവനക്കാർ എന്നിവരുടെ പരിശോധന ഫലമാണ് നെഗറ്റീവ്. ഇന്നലെ വരെ എഴുപതിലധികം പേരുടെ സാംപിൾ പരിശോധനയ്ക്ക് എടുത്തിട്ടുണ്ട്. ബ്ലോക്ക് പഞ്ചായത്ത് അംഗവുമായി സമ്പർക്കത്തിൽപ്പെട്ടവരിൽ 150 പേരുടെ പരിശോധന പട്ടിക തയാറാക്കിയിട്ടുണ്ട്.