നീണ്ട നാളത്തെ ഇടവേളക്ക് ശേഷം സംസ്ഥാനത്ത് ബാർബർ ഷോപ്പുകളും സലൂണുകളും പ്രവർത്തനം ആരംഭിച്ചു. നിയന്ത്രണങ്ങൾക്ക് വിധേയമായാണ് പ്രവർത്തനം. അണുവിമുക്തമാക്കിയതിനും ശുചീകരിച്ചതിനും ശേഷമാണ് ബാർബർ ഷോപ്പുകളും സലൂണുകളും തുറന്നു പ്രവർത്തിക്കുന്നത്.

ലോക്ക് ഡൗൺ മൂലം നാളുകളായി അടഞ്ഞു കിടന്ന ബാർബർ ഷോപ്പുകളും സലൂണുകളും ബ്യൂട്ടിപാർലറുകളും ഇന്ന് പ്രവർത്തനം ആരംഭിച്ചു. നാലാംഘട്ട ലോക്ക് ഡൗണിൽ നിയന്ത്രണങ്ങളോടെയാണ് ഇളവ് അനുവദിച്ചിരിക്കുന്നത് എന്നാൽ ബാർബർ ഷോപ്പിലെത്തുന്നവർ തലമുടി വെട്ടിച്ച ശേഷം മുടി മാലിന്യങ്ങൾ വീട്ടിൽ കൊണ്ടു പോയി സംസ്കരിക്കണമെന്ന നിബന്ധനയുമായി ബാർബർ ബ്യൂട്ടീഷ്യൻ സംഘടന. ഇതു കൂടാതെ തലമുടി വെട്ടൽ, ഷേവിങ് ജോലിക്കു വരുന്നവർ വൃത്തിയുള്ള തുണി, ടവൽ തുടങ്ങിയവ കൊണ്ടു വരണം. നിർബന്ധമായും മാസ്ക് ധരിക്കണം, പനി, ചുമ, ജലദോഷം തുടങ്ങിയ അസുഖങ്ങൾ ഉള്ളവർക്കു സേവനം ലഭിക്കില്ല.

സേവനത്തിനായി വരുന്നവർ വ്യക്തി ശുചിത്വം പാലിക്കണം. അപരിചിതർക്കു സേവനം ലഭിക്കില്ല. ഞായറാഴ്ച സമ്പൂർണ ലോക്ഡൗൺ പ്രഖ്യാപിച്ചതിനാൽ ചൊവ്വാഴ്ചകളിൽ ഷോപ്പുകൾ തുറന്ന് പ്രവർത്തിക്കുമെന്നും കേരള സ്റ്റേറ്റ് ബാർബർ ബ്യൂട്ടീഷ്യൻ ഫെഡറേഷൻ പ്രസിഡന്റ് കുരീപ്പുഴ മോഹനനും സെക്രട്ടറി പ്രദീപ് തേവലക്കരയും പറഞ്ഞു.

പല സ്ഥാപനങ്ങളിലും ഇന്ന് ശുചീകരണ, അണുവിമുക്ത നടപടികൾ പുരോഗമിക്കുകയാണ്. അത് പൂർത്തിയായ പല സ്ഥാപനങ്ങളും ഇന്ന് തന്നെ പ്രവർത്തനം ആരംഭിച്ചിട്ടുണ്ട്.

ഹെയർ കട്ടിംഗ്, ഹെയർ ഡ്രസിംഗ്, ഷേവിംഗ് എന്നിവക്ക് മാത്രമാണ് അനുമതി. ഫേഷ്യൽ വസ്തുക്കൾ ഉപയോഗിക്കുന്നതിന് അനുവാദമില്ല. ടവലും തോർത്തുകളും ഉപഭോക്താവ് തന്നെ കൊണ്ടുവരണമെന്നാണ് സർക്കാർ നിർദേശം. ഇത് ഏത് രീതിയിൽ പ്രാവർത്തികമാക്കണമെന്ന് കടയുടമകൾ ആലോചിക്കുന്നുണ്ട്. നാളെ മുതൽ സംസ്ഥാനത്ത് ബാർബർ ഷോപ്പുകളുടെയും സലൂണുകളുടെയും പ്രവർത്തനം കൂടുതൽ സജീവമാകും.

മാസ്‌കും ഗ്ലൗസും ധരിച്ചേ, ജോലി ചെയ്യൂ എന്നും, ഉപഭോക്താക്കള്‍ക്കിടയില്‍ സാമൂഹികാകലം പാലിക്കപ്പെടുന്നുണ്ടെന്ന് ഉറപ്പുവരുത്തുമെന്നും ഇവര്‍ പറയുന്നു. അതോടൊപ്പം തന്നെ ഉപഭോക്താക്കള്‍ക്കായി കൃത്യമായി മാര്‍ഗനിര്‍ദേശങ്ങള്‍ എഴുതിത്തയ്യാറാക്കി പരസ്യപ്പെടുത്താനും പല കടയുടമകളും തയ്യാറായിട്ടുണ്ട്.

ബാര്‍ബര്‍ ഷോപ്പുകള്‍ ഇന്ന് മുതല്‍ തുടങ്ങിയെങ്കിലും ഇന്നത്തെ ദിവസം കടയും ഉപകരണങ്ങളുമെല്ലാം വൃത്തിയാക്കി സാനിറ്റൈസ് ചെയ്യാനാണ് മിക്കവരും ചിലവഴിച്ചത്. മുടി വെട്ടുമ്പോള്‍ ഉപയോഗിക്കുന്ന ടവല്‍ പലരും ഒരെണ്ണം തന്നെ ഉപയോഗിക്കുന്നത് വലിയ അപകടഭീഷണിയാകുമെന്ന് നേരത്തേ ആരോഗ്യപ്രവര്‍ത്തകര്‍ ചൂണ്ടിക്കാട്ടിയിരുന്നു. ദിവസങ്ങള്‍ക്ക് മുമ്പ് മദ്ധ്യപ്രദേശില്‍ ഇത്തരമൊരു സംഭവം റിപ്പോര്‍ട്ട് ചെയ്യപ്പെടുകയുമുണ്ടായി. ഒരേ ടവല്‍ ഉപയോഗിച്ചതിനെ തുടര്‍ന്ന് സലൂണിലെത്തിയ ആറ് പേര്‍ക്കാണ് മദ്ധ്യപ്രദേശിലെ ഖര്‍ഗാവോണില്‍ കൊവിഡ് 19 പിടിപെട്ടത്.

അതിനാല്‍ തന്നെ ടവലുകള്‍ ഓരോരുത്തര്‍ക്കും പ്രത്യേകം വേണമെന്ന് നിഷ്‌കര്‍ശിച്ചിട്ടുണ്ട്. ഇക്കാര്യം മുഖ്യമന്ത്രി പിണറായി വിജയന്‍ വാര്‍ത്താസമ്മേളനത്തിനിടെ എടുത്തുപറഞ്ഞതുമാണ്. അതിനാല്‍ വീട്ടില്‍ നിന്ന് ടവലുമായി എത്താന്‍ കഴിയുന്നവര്‍ പരമാവധി അങ്ങനെ ചെയ്യണമെന്നാണ് ബാര്‍ബര്‍ ഷോപ്പ് ഉടമകളും ജീവനക്കാരും പറയുന്നത്. അതിന് കഴിയാത്തവര്‍ക്ക് പണമടച്ചാല്‍ ഒരിക്കല്‍ ഉപയോഗിച്ച ശേഷം ഉപേക്ഷിക്കുന്ന തരത്തിലുള്ള ടവലുകള്‍ ബാര്‍ബര്‍ ഷോപ്പുകളില്‍ തന്നെ ഒരുക്കിയവരുമുണ്ട്.

ടവല്‍ മാത്രമല്ല, ബ്ലേഡുകളും നിര്‍ബന്ധമായി ഒരിക്കല്‍ ഉപയോഗിച്ച ശേഷം ഉപേക്ഷിക്കേണ്ടതുണ്ട്. അക്കാര്യവും തീര്‍ച്ചയായും പിന്തുടരുമെന്നും ഇവര്‍ പറയുന്നു. മിക്കവാറും സ്ഥലങ്ങളില്‍ മുന്‍കൂട്ടി ബുക്ക് ചെയ്തതിന് അനുസരിച്ചാണ് ആളുളെ എടുക്കുന്നത്. കടയ്ക്കകത്തേയും പുറത്തേയും തിരക്ക് ഒഴിവാക്കാനാണിതെന്ന് കടയുടമകള്‍ പറയുന്നു.