മദ്യം ബുക്ക് ചെയ്യാൻ സ്റ്റാർട്ടപ്പ് കമ്പനി തയാറാക്കുന്ന മൊബൈൽ ആപ്പിന്റെ കാര്യത്തിൽ അനിശ്ചിതത്വം നിലനിൽക്കെ മദ്യപന്മാർക്കു നിരാശ . പ്രഖ്യാപിച്ച് ഒരാഴ്ച കഴിഞ്ഞിട്ടും ആപ്പ് ഉപഭോക്താക്കൾക്കു നൽകാൻ കഴിഞ്ഞിട്ടില്ല. സാങ്കേതിക കാര്യങ്ങളിൽ പരിശോധന നടക്കുന്നതിനാലാണ് പ്രഖ്യാപനം വൈകുന്നതെന്നാണ് ബവ്കോ പറയുന്നത് . പ്ലേ സ്റ്റോറിൽ ആപ്പ് ഉൾപ്പെടുത്താൻ ഗൂഗിളിന്റെ അനുമതി തേടിയിട്ടുണ്ട്. ഇന്നോ നാളെയോ അനുമതി ലഭിക്കുമെന്നാണ് പ്രതീക്ഷ എന്നും അധികൃതർ പറഞ്ഞു..

സംസ്ഥാനത്ത മദ്യവിതരണത്തിന് കൂടുതൽ ബാറുകളും ബീയർ– വൈൻ പാർലറുകളും സന്നദ്ധരായിട്ടുണ്ട്. ഇവരുടെ വിവരങ്ങൾ ആപ്പിൽ ഉൾപ്പെടുത്തണമെന്നതും കാലതാമസമുണ്ടാക്കുന്നു. ഈ സാഹചര്യത്തിൽ മൊബൈൽ ആപ്പിനു പകരം വെബ്സൈറ്റും എസ്എംഎസ് സംവിധാനവും ഏർപ്പെടുത്തിയിരുന്നെങ്കിൽ കാര്യങ്ങൾ എളുപ്പമായിരുന്നു എന്ന വാദം ഒരു വിഭാഗം സാങ്കേതിക വിദഗ്ധർ ഉയർത്തുന്നു. സുരക്ഷാ പരിശോധനയും ലോഡ് ടെസ്റ്റിങ്ങുമാണ് ഇപ്പോൾ നടക്കുന്നതെന്നാണ് സ്റ്റാർട്ടപ്പ് കമ്പനി അധികൃതർ പറയുന്നത്. 35 ലക്ഷം ആളുകൾ ഒരുമിച്ച് മദ്യം ബുക്ക് ചെയ്താലും പ്രശ്നമില്ലാത്ത രീതിയിലാണ് ആപ്പ് തയാറാക്കുന്നത്.
തിരക്കുള്ള ദിവസങ്ങളിൽ 10.5 ലക്ഷം ആളുകൾ വരെയാണ് ബവ്റിജസ് ഷോപ്പുകളിലെത്തുന്നത്. ഇത്രയും ദിവസം മദ്യശാലകൾ അടഞ്ഞു കിടന്നതിനാൽ കൂടുതൽ ആളുകൾ ആപ്പ് ഉപയോഗിക്കുമെന്നാണ് അധികൃതർ കണക്കുകൂട്ടുന്നത്.അതുകൊണ്ടു തന്നെഇതിനെല്ലാം സജ്ജമാക്കാൻ അല്പം കാലതാമസം വരുന്നു എന്നത് യാഥാർഥ്യമാണ്. പ്ലേ സ്റ്റോറിലും ആപ്പ് സ്റ്റോറിലും ആപ്പ് ലഭ്യമാക്കും. ആപ്പിളിന്റെ അനുമതി ഇതുവരെ തേടിയിട്ടില്ല. ഇതിനു പുറമേ സാധാരണ ഫോണുകളിൽനിന്ന് എസ്എംഎസ് വഴിയും വെർച്വൽ ക്യൂവിൽ ബുക്ക് ചെയ്യാം. പേരും ഫോൺ നമ്പരും സ്ഥലത്തെ സൂചിപ്പിക്കുന്ന അടയാളവും (സ്ഥലപ്പേര്, പിൻകോഡ്, ലൊക്കേഷൻ എന്നിവയിലേതെങ്കിലും) നൽകിയാണ് ക്യൂവിൽ ബുക്ക് ചെയ്യേണ്ടത് . വ്യക്തിവിവരങ്ങൾ ചോദിക്കില്ല.

ആദ്യഘട്ടത്തിൽ ആപ്പ് വഴി മദ്യത്തിന്റെ ബ്രാൻഡ് തിരഞ്ഞെടുക്കാനാകില്ല. ബുക്ക് ചെയ്യുമ്പോൾ ലഭിക്കുന്ന ടോക്കൺ നമ്പർ അതിൽ പറയുന്ന സമയത്ത്, പറയുന്ന കേന്ദ്രത്തിൽ ഹാജരാക്കണം. ബ്രാൻഡ് തിരഞ്ഞെടുത്ത് പണം അടയ്ക്കാം. ബാറുകളിലും ബവ്റിജസ് ഔട്ട്ലറ്റുകളിലും ഒരേ വിലയായിരിക്കും. നിശ്ചിത അളവിലുള്ള മദ്യം മാത്രമേ ഒരു നമ്പരിൽനിന്ന് വാങ്ങാനാകൂ. ആപ്പിനായി വിവിധ പേരുകൾ പരിഗണനയിലുണ്ട്. ബവ്കോയുടെ പേരിനാണ് പ്രാമുഖ്യം. ആപ്പ് ഉപയോഗിക്കേണ്ട വിധം ബവ്കോ പ്രസിദ്ധീകരിക്കും. ഇതിനായി വിഡിയോ ഇറക്കാനും അധികൃതർ ആലോചിക്കുന്നു.

ആപ്പ് തയാറാക്കുന്നത് കൊച്ചി ആസ്ഥാനമായ ഫെയർ കോഡ് കമ്പനിയാണ് . 20 പേരടങ്ങുന്ന ടീമാണ് ആപ്പിനു പിന്നിൽ പ്രവർത്തിക്കുന്നത്. അതേസമയം, ബവ്കോയുടേതിനു സമാനമായ വ്യാജ ആപ്പുകളുടെ തട്ടിപ്പിൽ‌ വീഴരുതെന്ന മുന്നറിയിപ്പും അധികൃതർ ഇതോടൊപ്പം നൽകുന്നുണ്ട്.. ബവ്കോയുടെ ആപ്പിൽ പണം അടയ്ക്കാൻ ആവശ്യപ്പെടില്ല. പണം അടയ്ക്കാൻ ആവശ്യപ്പെടുന്ന ആപ്പുകൾ വ്യാജമാണെന്നും ബെവ്കോ അധികൃതർ വ്യക്തമാക്കി.