കൂടുതല്‍ ഇളവുകളോടു കൂടിയുള്ള ലോക്ഡൗണ്‍ നാലാം ഘട്ടത്തിലേക്കു ഇന്നു കണ്ണു തുറക്കും. ഇന്നു മുതല്‍ പുതിയ ഉണര്‍വു ലഭിക്കുമെന്ന പ്രതീക്ഷയിലാണു കച്ചവടക്കാര്‍. ഓട്ടോകളും ടാക്‌സികളും ഇന്നലെ മുതല്‍ നിരത്തിലിറങ്ങി.
നാലാംഘട്ട ലോക്ക്ഡൗണില്‍ കൂടുതല്‍ ഇളവുകള്‍ നല്‍കി കേരളം. സംസ്ഥാനത്ത് സ്വര്‍ണ്ണ കടകള്‍ക്ക് ഇന്ന് മുതല്‍ പ്രവര്‍ത്തനാനുമതി കേരളത്തില്‍ ബാര്‍ബര്‍ ഷോപ്പുകള്‍ തുറക്കും. കഴിഞ്ഞ ദിവസം കട തുറന്ന് ശുചീകരിക്കാന്‍ സര്‍ക്കാര്‍ നിര്‍ദേശം നല്‍കിയിരുന്നു ബഹുനില തുണിക്കടകള്‍ക്ക് ഇന്ന് മുതല്‍ പ്രവര്‍ത്തനാനുമതി
ജില്ലയ്ക്കുള്ളില്‍ കെഎസ്ആര്‍ടിസി ഹ്രസ്വ ദൂര ബസ് സര്‍വീസുകള്‍ തുടങ്ങും. യാത്രക്കാരും ബസ് ജീവനക്കാരും മാസക്ക് ധരിക്കുകയും സാമൂഹ്യ അകലം പാലിക്കുകയും വേണം. ആറ്റിങ്ങല്‍ - തിരുവനന്തപുരം, നെയ്യാറ്റിന്‍കര - തിരുവനന്തപുരം റൂട്ടുകളില്‍ ക്യാഷ്‌ലെസ്സ് ടിക്കറ്റ് സര്‍വീസ് കെ എസ് ആര്‍ ടി സി യുടെ പരിഗണനയില്‍.

ബിവ്‌റേജസ് ഔട്ട്ലെറ്റുകള്‍,ബാറുകള്‍ എന്നിവ വഴിയുള്ള വിദേശമദ്യവില്‍പ്പന പുനരാരംഭിക്കാന്‍ പുതിയ മൊബൈല്‍ ആപ്പ് നിലവില്‍ വരുന്നു.കൊച്ചി കാക്കനാട്ടെ ഐ ടി കമ്പനി വികസിപ്പിച്ചെടുക്കുന്ന ആപ്ലിക്കേഷന്‍ ഗൂഗിള്‍ പ്ലേ സ്റ്റോറിന്റെ അനുമതി ലഭിക്കുന്നതിലൂടെ പൂര്‍ണ്ണ തോതില്‍ പ്രവര്‍ത്തനസജ്ജമാകും
നോര്‍ക്ക റൂട്ട്‌സ് തിരുവനന്തപുരം മേഖലാ ഓഫീസില്‍ സര്‍ട്ടിഫിക്കറ്റ് അറ്റസ്റ്റേഷന്‍ ഇന്ന് മുതല്‍ പുനരാരംഭിക്കുന്നു

കെഎസ്ആര്‍ടിസി കോട്ടയം, പാലാ, ഈരാറ്റുപേട്ട, പൊന്‍കുന്നം, ചങ്ങനാശേരി, വൈക്കം ഡിപ്പോകളില്‍നിന്ന് ഇന്നു സര്‍വീസ് പുനരാരംഭിക്കും. എന്നാല്‍ ജില്ലയ്ക്കുള്ളിലെ സ്വകാര്യ ബസ് സര്‍വീസ് തുടങ്ങാന്‍ 2 ദിവസമെങ്കിലും കാത്തിരിക്കേണ്ടിവരുമെന്നു ബസ് ഓപ്പറേറ്റേഴ്‌സ് അസോസിയേഷന്‍ ഭാരവാഹികള്‍ പറഞ്ഞു.
തിങ്കളാഴ്ച കോട്ടയത്തു നിന്ന് ബംഗാളിലേക്കു പുറപ്പെട്ട സ്‌പെഷല്‍ ട്രെയിനില്‍ യാത്ര ചെയ്യുന്ന അതിഥിത്തൊഴിലാളി സലിം യാത്രാവിശേഷങ്ങള്‍ സംസാരിക്കുന്നു

ട്രെയിന്‍ ഇപ്പോള്‍ വിജയവാഡ കഴിഞ്ഞു. നാളെ കൂച്ച് ബിഹാറില്‍ എത്തും. അവിടെ നിന്നു മൂന്നു മണിക്കൂര്‍ റോഡ് മാര്‍ഗം യാത്ര ചെയ്താല്‍ മാര്‍ഡയിലെ കമാല്‍പൂര്‍ ഗ്രാമത്തിലെ എന്റെ വീട്ടിലെത്തും. ലോക്ഡൗണ്‍ മാറുകയും ട്രെയിന്‍ സര്‍വീസ് വീണ്ടും തുടങ്ങുകയും ചെയ്യുമ്പോള്‍ കേരളത്തിലേക്കു തന്നെ മടങ്ങണം എന്നാണ് ആഗ്രഹം.

ഞാനും കൂട്ടുകാരും ഈ വിശേഷങ്ങള്‍ പറയുമ്പോഴും ട്രെയിന്‍ പായുകയാണ്. എങ്ങും തന്നെ നിര്‍ത്തുന്നില്ല. ആകെ നിര്‍ത്തുന്നത് ഭക്ഷണം കയറ്റാനും വെള്ളം നിറയ്ക്കാനും മാത്രം. ഏഴു വര്‍ഷം മുന്‍പ് 15-ാം വയസ്സിലാണ് ഞാന്‍ കേരളത്തില്‍ എത്തിയത്.

ഇന്നു മുതല്‍ 102 ഓര്‍ഡിനറി സര്‍വീസുകള്‍
ന്മ ജില്ലയില്‍ ഇന്നു മുതല്‍ 102 ഓര്‍ഡിനറി സര്‍വീസുകള്‍ ആരംഭിക്കാന്‍ കെഎസ്ആര്‍ടിസി. ചങ്ങനാശേരി ഡിപ്പോയാണ് ഏറ്റവും കൂടുതല്‍ സര്‍വീസ് നടത്തുക 21 എണ്ണം. സര്‍വീസ് നിശ്ചയിച്ച് കെഎസ്ആര്‍ടിസി ഓപ്പറേഷന്‍സ് വിഭാഗം ഡിപ്പോകള്‍ക്ക് നിര്‍ദേശം നല്‍കി. എന്നാല്‍ സോണല്‍ എക്‌സിക്യൂട്ടീവ് ഡയറക്ടര്‍മാര്‍ യൂണിറ്റ് മേധാവികളുമായി ചര്‍ച്ച ചെയ്ത് അന്തിമ പട്ടിക തയാറാക്കാനും നിര്‍ദേശമുണ്ട്.

സര്‍വീസ് യാത്രക്കാരുടെ ആവശ്യം കണക്കിലെടുത്താകണമെന്നും നിര്‍ദേശം നല്‍കി. (ഡിപ്പോ, സര്‍വീസുകളുടെ എണ്ണം, ഒരു ദിവസം ആകെ ഓടുന്ന കിലോമീറ്റര്‍ ക്രമത്തില്‍)ചങ്ങനാശേരി 21 - 6409, ഈരാറ്റുപേട്ട 13 - 3707, എരുമേലി 8 - 2357, കോട്ടയം 17 - 5609, പാലാ 16 - 5539, പൊന്‍കുന്നം 12 - 3958, വൈക്കം 15 - 4799

ഓട്ടോകള്‍ വെയ്റ്റിങ്

ഇന്നലെ നിരത്തിലിറങ്ങിയ മിക്ക ഓട്ടോ ഡ്രൈവര്‍മാര്‍ക്കും കാര്യമായ ഓട്ടം ലഭിച്ചില്ല. പല സ്റ്റാന്‍ഡുകളിലും എത്തിയത് പകുതിയോളം ഓട്ടോകള്‍ മാത്രം. പല ഓട്ടോകളിലും സാനിറ്റൈസറുകള്‍ സ്ഥാപിച്ചിട്ടുണ്ട്.

സ്വകാര്യ ബസുകള്‍ ഇന്ന് ഓടില്ല

ജില്ലയിലെ സ്വകാര്യ ബസുകള്‍ ഇന്നു സര്‍വീസ് നടത്തില്ലെന്ന് ബസ് ഓപ്പറേറ്റേഴ്‌സ് അസോസിയേഷന്‍ ജില്ലാ ജനറല്‍ സെക്രട്ടറി കെ.എസ്. സുരേഷ്. അന്തര്‍ ജില്ലാ അനുമതിയും സീറ്റിങ് കപ്പാസിറ്റി കൂട്ടാനുള്ള അനുമതിയും ലഭിച്ചാലേ സര്‍വീസില്‍നിന്നു ലാഭം കിട്ടൂ എന്നു ബസ് ഉടമകള്‍ പറഞ്ഞു.

ബാര്‍ബര്‍ ഷോപ്പുകളില്‍ ശുചീകരണം

അടഞ്ഞുകിടന്ന കടകള്‍ വൃത്തിയാക്കുന്ന തിരക്കിലായിരുന്നു ഇന്നലെ ബാര്‍ബര്‍മാര്‍. ലോക്ഡൗണ്‍ കാലത്ത് സ്വന്തമായി മുടിയില്‍ മിനുക്കുപണികള്‍ ചെയ്തിട്ടുള്ളവരുടെ തലമുടി ശരിയാക്കിയെടുക്കുക എന്നതാണ് ഇന്നു മുതല്‍ പ്രധാന വെല്ലുവിളി.

പ്രതീക്ഷയോടെ ജ്വല്ലറികള്‍ കടയിലെത്തുന്നവര്‍ അകലം പാലിക്കുന്നുണ്ടെന്ന് ഉറപ്പു വരുത്തുമെന്നു ജ്വല്ലറി ഉടമകള്‍. ആഭരണങ്ങള്‍ വാങ്ങാനെത്തുന്നവര്‍ കമ്മല്‍, വള ഉള്‍പ്പെടെയുള്ളവ ഇട്ടു നോക്കുന്ന കാര്യത്തില്‍ താല്‍ക്കാലികമായി നിയന്ത്രണം ഏര്‍പ്പെടുത്താനാണ് തീരുമാനം.

വിവാഹ വിപണി സജീവമല്ല. തമിഴ്‌നാട് ,കര്‍ണാടക എന്നിവിടങ്ങളില്‍ നിന്ന് ഇപ്പോള്‍ പൂവ് എത്താത്തനിനാല്‍ പൂക്കടകള്‍ അടച്ചിട്ടിരിക്കുകയാണ്. ചില പൂക്കടക്കാര്‍ തുളസി, ആര്യവേപ്പ് തുടങ്ങിയ ഇലകള്‍ ഉപയോഗിച്ച് മാലകള്‍ നിര്‍മിക്കുന്നുണ്ട്. ചെറിയ പാര്‍ട്ടി ഓര്‍ഡറുകള്‍ ലഭിച്ചിട്ട് കാര്യമില്ലെന്ന് കേറ്ററിങ് സ്ഥാപനങ്ങള്‍ പറയുന്നു. പഴയിടം മോഹനന്‍ നമ്പൂതിരി ഉള്‍പ്പെടെ പ്രമുഖ പാചകക്കാര്‍ ഇപ്പോഴും വിശ്രമത്തില്‍ തന്നെ.

പ്രത്യേക കൗണ്ടര്‍ വഴി ഒരു സമയം 5 പേരെ ഒരു മീറ്റര്‍ അകലത്തില്‍ ക്യൂ നിര്‍ത്തി മദ്യവിതരണം നടത്തുന്നതിനാണു ബാര്‍ ഉടമകള്‍ തീരുമാനിച്ചിരിക്കുന്നത്. മാസ്‌ക് ഇല്ലാതെ എത്തുന്നവര്‍ക്കു മദ്യം നല്‍കില്ല. കൗണ്ടറിലെ ജീവനക്കാര്‍ക്കു മാസ്‌ക്കും ഗ്ലൗസും നിര്‍ബന്ധമാണ്.