കെഎസ്ആര്‍ടിസി ബസുകളില്‍ റീചാര്‍ജ് ചെയ്ത് ഉപയോഗിക്കാന്‍ കഴിയുന്ന യാത്രാ കാര്‍ഡുകള്‍ നടപ്പിലാക്കുന്നു
കെഎസ്ആര്‍ടിസി ബസുകളില്‍ റീചാര്‍ജ് ചെയ്ത് ഉപയോഗിക്കാന്‍ കഴിയുന്ന യാത്രാ കാര്‍ഡുകള്‍ നടപ്പിലാക്കുന്നതിന്റെ ട്രയല്‍ റണ്‍ സെക്രട്ടേറിയറ്റില്‍ മന്ത്രി എ.കെ.ശശീന്ദ്രന്‍ ഉദ്ഘാടനം ചെയ്തു. ഇതോടെ കറന്‍സിരഹിത യാത്രയ്ക്കുള്ള പുതുസംരംഭത്തിനു പരീക്ഷണാടിസ്ഥാനത്തില്‍ തുടക്കമായി. ഗതാഗതവകുപ്പ് പ്രിന്‍സിപ്പല്‍ സെക്രട്ടറി കെ.ആര്‍.ജ്യോതിലാല്‍ ആദ്യ കാര്‍ഡ് ഏറ്റുവാങ്ങി.
ആറ്റിങ്ങല്‍, നെയ്യാറ്റിന്‍കര എന്നിവിടങ്ങളില്‍ നിന്നുമുള്ള സെക്രട്ടേറിയറ്റ് സര്‍വീസ് ബസുകളിലാണ് പരീക്ഷണാടിസ്ഥാനത്തില്‍ ആദ്യം നടപ്പാക്കുന്നത്. വിജയമായാല്‍ എല്ലാ കെഎസ്ആര്‍ടിസി ബസുകളിലും ഇതു നിലവില്‍വരുമെന്നു മന്ത്രി പറഞ്ഞു. കോവിഡ് പശ്ചാത്തലത്തില്‍ കറന്‍സി ഉപയോഗം പരമാവധി കുറച്ച് പരസ്പര സമ്പര്‍ക്കം ഒഴിവാക്കി ഡിജിറ്റല്‍ പേമെന്റ് സിസ്റ്റത്തിലേക്കു മാറുന്നതിന്റെ ഭാഗമായാണിത്.
യാത്രക്കാര്‍ക്കും ജീവനക്കാര്‍ക്കും കറന്‍സി ഉപയോഗം പരമാവധി കുറയ്ക്കാന്‍ കഴിയുന്ന, കോവിഡ് രോഗവ്യാപന സാധ്യത ഇല്ലാത്ത അപകടരഹിത ആധുനിക കാര്‍ഡുകളാണ് നടപ്പിലാക്കുന്നത്. 'ചലോ' എന്ന കമ്പനിയാണ് കെഎസ്ആര്‍ടിസിക്ക് വേണ്ടി ഈ പ്രോജക്ട് നടപ്പിലാക്കുന്നത്. കെഎസ്ആര്‍ടിസി ചെയര്‍മാന്‍ ആന്‍ഡ് മാനേജിങ് ഡയറക്ടര്‍ എം.പി.ദിനേശ് ഉള്‍പ്പെടെയുള്ള ഉദ്യോഗസ്ഥര്‍ ചടങ്ങില്‍ പങ്കെടുത്തു.
ബസ് കണ്ടക്ടറുടെ പക്കല്‍ നിന്നു കാര്‍ഡ് വാങ്ങാം. നൂറ് രൂപ മുതല്‍ തുക നല്‍കി റീചാര്‍ജ് ചെയ്യാം. ബസ് ഡിപ്പോയില്‍നിന്നും ചാര്‍ജ് ചെയ്യാം. റീചാര്‍ജ് ചെയ്ത തുക തീരും വരെ കാലപരിമിതിയില്ലാതെ ഉപയോഗിക്കാം.
https://www.facebook.com/Malayalivartha
