ജലവിഭവ വകുപ്പ് പ്രധാന നീര്‍ച്ചാലുകളിലെ ജലത്തിന്റെ അളവ്, ഡാമിന്റെ പരിസരത്തെ മഴ, നിലവിലെ ജലനിരപ്പ്, മുന്‍വര്‍ഷം ഈ സമയത്തെ അളവ് എന്നിവയുള്‍പ്പെടെ ലഭ്യമാക്കുന്ന മൊബൈല്‍ ആപ്ലിക്കേഷന് രൂപം നല്‍കുന്നു. മഴക്കെടുതിയും പ്രളയവും നേരിടാനുള്ള മുന്നൊരുക്കത്തിന്റെ ഭാഗമായി ഡാമുകളിലെ തല്‍സ്ഥിതി പൊതുജനങ്ങള്‍ക്ക് ലഭ്യമാക്കുന്നതിനാണിത്.

നിലവിലുള്ള വെബ്‌സൈറ്റിലും ചെക്ഡാമുകളിലേയും കുളങ്ങളിലെയും ജലത്തിന്റെ സ്ഥിതി ലഭ്യമാക്കും. ഡാമുകളുടെ ആകെ സംഭരണശേഷി 1570. 99 ദശലക്ഷം ഘനമീറ്ററാണ്. നിലവില്‍ 615.35 ദശലക്ഷം ഘനമീറ്റര്‍ ജലമുണ്ട്. ജലവിഭവ വകുപ്പിന്റെ 16 ഡാമുകളും 4 ബാരേജുകളിലുമായി 163 മഴമാപിനികളും 137 റിവര്‍ഗേജ് (പുഴകളിലും തോടുകളിലെയും ഒഴുക്കിന്റെ അളവ് പരിശോധിക്കാന്‍) സ്റ്റേഷനുകളുമുണ്ട്.

നെയ്യാര്‍, മലങ്കര, ചിമ്മിനി, വാഴാനി, മലമ്പുഴ, പോത്തുണ്ടി, കാഞ്ഞിരപ്പുഴ, ചുള്ളിയാര്‍, മീങ്കര, വാളയാര്‍, കുറ്റ്യാടി, പഴശ്ശി ഡാമുകളുടെ അടിയന്തര നടപടി രേഖ കേന്ദ്ര ജലകമ്മിഷന്റെ നിര്‍ദേശമനുസരിച്ച് പ്രസിദ്ധീകരിച്ചു. കല്ലട, പീച്ചി എന്നിവയുടെ ഈ ആഴ്ച പൂര്‍ത്തിയാക്കും. 11 ഡാമുകളുടെ നടത്തിപ്പ്- പരിപാലന ചട്ടം അവസാനഘട്ടത്തിലാണെന്നു മന്ത്രി കെ. കൃഷ്ണന്‍കുട്ടി പറഞ്ഞു.

ഡാമുകളുടെ മുഴുവന്‍ സമയ നിരീക്ഷണത്തിന് ഉദ്യോഗസ്ഥരെ നിയമിക്കും. അടിയന്തര സാഹചര്യം നേരിടാനുള്ള നടപടികളും പൂര്‍ത്തിയാക്കി.