ജല അതോറിറ്റിയുടെ പൈപ്പ് മാറ്റല്‍ ജോലികള്‍ മൂലം കോട്ടയം പ്ലാന്റേഷന്‍ കോര്‍പറേഷന്‍ റെയില്‍വേ മേല്‍പാലത്തില്‍ ഗതാഗതക്കുരുക്ക്
കോട്ടയത്തെ പ്ലാന്റേഷന്‍ കോര്‍പറേഷന്‍ റെയില്‍വേ മേല്‍പാലം റോഡ് വെട്ടിപ്പൊളിച്ചതിനെത്തുടര്‍ന്ന് കെകെ റോഡില്‍ പ്ലാന്റേഷന്‍ കോര്‍പറേഷന്‍ ഭാഗത്ത് ഇന്നലെ രാവിലെ മുതല്‍ ഗതാഗതക്കുരുക്ക് രൂപപ്പെട്ടു. മേല്‍പാലത്തിലെ ജല അതോറിറ്റി പൈപ്പുകളുടെ അറ്റകുറ്റപ്പണികള്‍ക്കായി റോഡ് വെട്ടിപ്പൊളിച്ചതിനെ തുടര്‍ന്ന് പാലത്തിന്റെ ഇരുഭാഗങ്ങളിലും കുഴിയെടുത്തിരുന്നു. പണികള്‍ പൂര്‍ത്തിയാകാത്തതിനാല്‍ കുഴി താല്‍ക്കാലികമായി മൂടി. കഴിഞ്ഞ ദിവസം ശക്തമായ മഴ പെയ്തതു മൂലം ഈ കുഴികള്‍ ചെളിക്കുളമായി മാറി.
ഇന്നലെ 10- മണിയോടെ കുരുക്ക് രൂക്ഷമായതോടെ വാഹനങ്ങളുടെ നിര കഞ്ഞിക്കുഴി കലക്ടറേറ്റ് ഭാഗം വരെ നീണ്ടു. കഴിഞ്ഞ ദിവസം ഗതാഗതക്കുരുക്കിനെത്തുടര്‍ന്നു സമീപത്തെ താല്‍ക്കാലിക പാത തുറന്നു നല്‍കിയതോടെയാണു കുരുക്കിനു കുറച്ചെങ്കിലും പരിഹാരമായത്. ജല അതോറിറ്റി പുതിയ മേല്‍പാലത്തില്‍ സ്ഥാപിച്ച പൈപ്പുകളിലേക്കു പൈപ്പ്ലൈനുമായി ബന്ധിപ്പിക്കുന്ന ജോലികളാണു നടക്കുന്നത്.
അതിഥിത്തൊഴിലാളികളെ റെയില്‍വേ സ്റ്റേഷനില്‍ എത്തിക്കാന്‍ തീരുമാനിച്ചതോടെയാണ് 2 പ്രധാന പൈപ്പുകളുടെ ജോലികള്‍ പൂര്‍ത്തിയായതിനു ശേഷം തുടങ്ങിയ 250 എംഎം പൈപ്പ് ഘടിപ്പിക്കുന്ന ജോലികള്‍ ഒഴിവാക്കേണ്ടി വന്നതെന്ന് അസി. എക്‌സിക്യൂട്ടീവ് എന്‍ജിനീയര്‍ അറിയിച്ചു.
ഇന്നലെ വൈകിട്ട് ഏഴോടെ ഈ ജോലികള്‍ പുനരാരംഭിച്ചിട്ടുണ്ടെന്നും ഇന്നു പുലര്‍ച്ചെ പൂര്‍ത്തിയാക്കാന്‍ സാധിക്കുമെന്നു കരുതുന്നതായും അദ്ദേഹം അറിയിച്ചു. ജലവിതരണം ഇന്നു മുതല്‍ പൂര്‍ണ തോതില്‍ നടക്കുമെന്നും അദ്ദേഹം അറിയിച്ചു.
https://www.facebook.com/Malayalivartha
