യുദ്ധസമാനമാണ് സാഹചര്യം. 45 പേരടങ്ങുന്ന 41 സംഘം. നാവികസേനയുടെ ഡൈവര്‍മാര്‍. രക്ഷിക്കേണ്ടത് ലക്ഷങ്ങളെ. രാജ്യം കരുതലോടെ മുന്നോട്ട് മുന്നിലുള്ളത് ഉംഫന്‍. അതും കോവിഡിനൊപ്പം. ഉംപുന്‍ ചുഴലിക്കൊടുങ്കാറ്റ് കരയില്‍ പ്രവേശിച്ചെന്ന് കാലാവസ്ഥാ വകുപ്പ്. രണ്ടരയോടെതന്നെ കാറ്റ് ബംഗാള്‍ തീരത്തു വീശിയടിച്ചു തുടങ്ങിയിരുന്നു. പൂര്‍ണമായി കരയില്‍ത്തൊടാന്‍ നാലു മണിക്കൂറോളമെടുക്കുമെന്നാണ് കാലാവസ്ഥാ വകുപ്പ് അധികൃതര്‍ പറയുന്നത്.

അതിശക്തമായ മഴയാണ് ബംഗാള്‍, ഒഡീഷ സംസ്ഥാനങ്ങളുടെ തീരത്ത്. ബംഗാളിലെ സുന്ദര്‍ബാനിലായിരിക്കും ചുഴലിക്കാറ്റ് കരതൊടുക. നാലു ലക്ഷത്തോളം ആളുകളെ ഇതുവരെ മാറ്റിപ്പാര്‍പ്പിച്ചിട്ടുണ്ടെന്നാണ് കണക്ക്. ബുധനാഴ്ച രാവിലെയായപ്പോള്‍ ചുഴലിക്കാറ്റിന്റെ വേഗം അല്‍പം കുറഞ്ഞത് ആശ്വാസമാണെങ്കിലും തീവ്രതയില്‍ കുറവു വന്നിട്ടില്ലെന്നത് ആശങ്കയുളവാക്കുന്നു. ഒഡീഷയിലെ പുരി, ഖുര്‍ദ, ജഗത്സിങ്പുര്‍, കട്ടക്, കേന്ദ്രപ്പാറ, ജജ്പുര്‍, ഗന്‍ജം, ഭന്ദ്രക്, ബാലസോര്‍ ജില്ലകളില്‍ അതിശക്തമായ മഴയാണ് രേഖപ്പെടുത്തിയിരിക്കുന്നത്. ഇന്നു രാവിലെ മുതല്‍ ബംഗാളിന്റെ തലസ്ഥാനമായ കൊല്‍ക്കത്തയിലും മഴ പെയ്യുന്നുണ്ട്. ഏതു സാഹചര്യത്തെ നേരിടാനുമായി ദേശീയ ദുരന്ത നിവാരണസേന രണ്ടു സംസ്ഥാനങ്ങളിലുമായി 45 പേരടങ്ങുന്ന 41 സംഘത്തെ തയാറാക്കി നിര്‍ത്തിയിരിക്കുകയാണ്. അഗ്‌നിരക്ഷാ സേനയും പൂര്‍ണസജ്ജരാണ്. നാവികസേനയുടെ ഡൈവര്‍മാര്‍ പ്രത്യേക സുരക്ഷാ ഉപകരണങ്ങളുമായി ഒഡീഷയിലെ സൗത്ത് പര്‍ഗാനാസിലെ ഡയമണ്ട് ഹാര്‍ബറില്‍ തയാറാണ്. വിശാഖപട്ടണത്തും പാരദീപിലും ഗോലാപുരിലുമുള്ള ഡോപ്ലര്‍ വെതര്‍ റഡാര്‍ ഉപയോഗിച്ച് ചുഴലിക്കാറ്റിനെ നിരന്തരം നിരീക്ഷിക്കുന്നുണ്ട്.

ദിംഗയില്‍ അടക്കം ശക്തമായ മഴയാണ് രാവിലെ മുതല്‍ ലഭിക്കുന്നത്. പതിനാറടി ഉയരത്തില്‍ തിരമാലകളുണ്ടാവുമെന്ന് മുന്നറിയിപ്പുണ്ട്. ഒഡീഷയില്‍ കനത്ത കാറ്റും മഴയുമുണ്ട്. കാറ്റിന്റെ ശക്തി ഇനിയും കൂടുമെന്നാണ് മുന്നറിയിപ്പ്. ബംഗാളില്‍ നിന്ന് മാത്രം മൂന്ന് ലക്ഷത്തിലേറെ പേരെ മാറ്റിപാര്‍പ്പിച്ചു.
ഉംപുന്‍ ചുഴലിക്കാറ്റിനെ തുടര്‍ന്ന് കേരളത്തില്‍ മഴയ്ക്കും കാറ്റിനും സാധ്യതയുണ്ട്. സംസ്ഥാനത്തുടനീളം കനത്ത മഴ ലഭിക്കുമെന്നാണ് പ്രവചനം. കഴിഞ്ഞ ദിവസങ്ങളിലും സംസ്ഥാനത്ത് അങ്ങോളമിങ്ങോളം സാമാന്യം ഭേദപ്പെട്ട രീതിയില്‍ മഴ ലഭിച്ചിരുന്നു.

തായ്ലന്‍ഡ് ആണ് ചുഴലിക്കാറ്റിനു ഉംപുന്‍ എന്ന പേരിട്ടത്. മലയാളത്തില്‍ 'ആംഫന്‍' എന്ന് തെറ്റായി ഉച്ചരിച്ചിരുന്നു. എന്നാല്‍, പേര് നല്‍കിയ തായ്ലന്‍ഡ് തന്നെ ഇതിന്റെ ഉച്ചാരണം ' ൗാുൗി' എന്നാണെന്ന് വ്യക്തമാക്കിയിട്ടുണ്ട്. ലോക കാലാവസ്ഥാ സംഘടനയാണ് ചുഴലിക്കാറ്റുകള്‍ക്ക് പേര് തീരുമാനിക്കുന്നതിനായി രാജ്യങ്ങള്‍ക്ക് ചുമതല നല്‍കുന്നത്. വടക്കേ ഇന്ത്യന്‍ മഹാസമുദ്രത്തോട് ചേര്‍ന്ന് കിടക്കുന്ന രാജ്യങ്ങള്‍ 2004 ല്‍ ഇങ്ങനെ തയ്യാറാക്കിയ പട്ടികയിലെ അവസാന പേരാണ് 'ഉംപുന്‍'. എട്ട് രാജ്യങ്ങള്‍ ചേര്‍ന്ന് തയ്യാറാക്കിയ 64 പേരുകളില്‍ അവസാനത്തേത്. അന്ന് സംഘടനയുടെ പാനലിലുണ്ടായിരുന്ന എട്ട് രാജ്യങ്ങള്‍ എട്ട് പേര് വീതം നിര്‍ദേശിക്കുകയായിരുന്നു. ഇപ്പോള്‍ 13 രാജ്യങ്ങളാണ് ചുഴലിക്കാറ്റുകള്‍ക്ക് പേരിടുന്ന പാനലിലുള്ളത്. 13 രാജ്യങ്ങള്‍ 13 പേരുകള്‍ വീതം 169 പേരുകളാണ് ഇപ്പോള്‍ തയ്യാറാക്കിയിരിക്കുന്നത്.