ലോകത്തിനു മുന്നില്‍ കൊവിഡ് പ്രതിരോധ പ്രവര്‍ത്തനങ്ങളില്‍ മാതൃകയായ കേരളം. വരുംദിവസങ്ങളില്‍ രോഗികളെ കൊണ്ട് നിറയും എന്നകാര്യം സര്‍ക്കാരിന് അറിയാമായിരുന്നു. ഇതു സംബന്ധിച്ച് സംസ്ഥാന സര്‍ക്കാര്‍ ആ ഉദ്യമത്തിനായി കാലെടുത്ത് വച്ചപ്പോള്‍ തന്നെ വ്യക്തമാക്കിയതാണ്. പ്രവാസികളും വിദ്യാര്‍ത്ഥികളും നാട്ടിലെത്തിയപ്പോഴാണ് ആദ്യ ഘട്ടത്തിലും രണ്ടാം ഘട്ടത്തിലും കൊവിഡ് കേരളത്തിലെത്തിയത്, ഇപ്പോഴിതാ മൂന്നാം ഘട്ടം കേരളം രണ്ടും കല്‍പ്പിച്ചു തന്നെയാണ്. വിദേശത്തുനിന്നും മറ്റുസംസ്ഥാനങ്ങളില്‍നിന്നും ആളുകള്‍ എത്തുന്നതോടെ കോവിഡ് ബാധിതരുടെ എണ്ണം കുതിച്ചുയരുമെന്ന് മന്ത്രിസഭായോഗം വിലയിരുത്തി. വരുംമാസങ്ങളില്‍ ഇത് 2000 വരെയെങ്കിലും ഉയരുമെന്നാണ് വിദഗ്ധരുടെ വിലയിരുത്തല്‍. 16 പേര്‍ ചികിത്സയിലുണ്ടായിരുന്നതില്‍നിന്ന് ഇപ്പോള്‍ 161-ല്‍ എത്തിനില്‍ക്കുകയാണ്. ഈ വര്‍ധന മനസ്സിലാക്കിയാണ് രോഗനിര്‍വ്യാപന തന്ത്രങ്ങള്‍ ആവിഷ്‌കരിച്ചിട്ടുള്ളതെന്നും മുഖ്യമന്ത്രി പറഞ്ഞു. മേയ് എട്ടിനാണ് കേരളത്തില്‍ 16 രോഗികളിലേക്ക് എത്തിയത്. പിന്നീടുള്ള ദിവസങ്ങളില്‍ രോഗികളുടെ എണ്ണം വലിയതോതില്‍ കൂടുകയായിരുന്നു.

അധികനാള്‍ സംസ്ഥാനം മുഴുവന്‍ അടച്ചിടാന്‍ കഴിയില്ല. കോവിഡിനൊപ്പം ജാഗ്രതയോടുകൂടിയ ജീവിതംമാത്രമാണ് മുന്നിലുള്ള മാര്‍ഗമെന്നു മുഖ്യമന്ത്രി പിണറായി വിജയന്‍ പറഞ്ഞു. അയല്‍സംസ്ഥാനങ്ങളില്‍നിന്നെത്തുന്ന തീവണ്ടികള്‍ക്ക് എല്ലാ ജില്ലാ ആസ്ഥാനങ്ങളിലും സ്റ്റോപ്പ് അനുവദിക്കണമെന്ന് കേന്ദ്രത്തോട് ആവശ്യപ്പെടുമെന്നും മുഖ്യമന്ത്രി വ്യക്തമാക്കി.

രോഗികളുടെ എണ്ണം ഉയര്‍ന്നാല്‍ ഗുരുതര സാഹചര്യമായിരിക്കും നേരിടേണ്ടിവരുകയെന്ന് അവലോകന യോഗവും വിലയിരുത്തി. കണ്ടെയ്ന്‍മെന്റ് സോണുകളില്‍ ഒരിളവും അനുവദിക്കില്ല. കര്‍ക്കശനടപടികളുണ്ടാകും. നിരീക്ഷണത്തിലുള്ളവര്‍ പുറത്തിറങ്ങരുത്. വീട്ടില്‍ മറ്റുള്ളവരുമായി ഇടപഴകരുത്. മുറിയില്‍ത്തന്നെ കഴിയണം. ഒരാള്‍മാത്രമാകണം ഭക്ഷണം എത്തിക്കേണ്ടത്. ഹോം ക്വാറന്റീന്‍ ഫലപ്രദമായി നടപ്പാക്കിയ സംസ്ഥാനമാണ് നമ്മുടേതെന്നും യോഗം വിലയിരുത്തി.

രോഗികളുടെ ഇതുവരെയുള്ള വര്‍ധനവ് നമുക്ക് നോക്കാം. വിദേശത്തുനിന്ന് വിമാനങ്ങള്‍ എത്തിത്തുടങ്ങിയത് മേയ് ഏഴിന്. എട്ടിന് ഒരാള്‍ക്ക് രോഗം. അന്ന് ആകെ ചികിത്സയിലുള്ളവരുടെ എണ്ണം 16. മേയ് 13-ന് പുതിയ രോഗികളുടെ എണ്ണം 10. പതിന്നാലിന്-26, പതിനഞ്ചിന്-16, പതിനാറിന്-11, പതിനേഴിന്-14, പതിനെട്ടിന്-29, ചൊവ്വാഴ്ച-12, ബുധനാഴ്ച-24 (ചികിത്സയിലുള്ളത് 161 പേര്‍).


അതേസമയം കോവിഡ് രോഗികളുടെ എണ്ണം ഇപ്പോഴത്തെ നിലയില്‍ വര്‍ധിച്ചാല്‍ ഗുരുതര സാഹചര്യം ഉണ്ടാകുമെന്ന് മുഖ്യമന്ത്രി പിണറായി വിജയന്‍. വിപത്തിനെ നാടൊന്നാകെ നേരിടണമെന്നും അദ്ദേഹം പറഞ്ഞു.മലയാളികളുടെ തിരിച്ചുവരവു തുടര്‍ന്നാല്‍ സംസ്ഥാനത്തെ കോവിഡ് ബാധിതരുടെ എണ്ണം വരുംമാസങ്ങളില്‍ 2000 വരെ എത്താമെന്നു മന്ത്രിസഭാ യോഗം വിലയിരുത്തിയിരുന്നു.സംസ്ഥാനം മുഴുവന്‍ അധിക നാള്‍ അടച്ചിടാനാവില്ല. രോഗവിവരം മറച്ചുവച്ച് എത്തുന്നവര്‍ക്കെതിരെ നടപടി സ്വീകരിക്കാനും യോഗം തീരുമാനിച്ചു. പിന്നീടു കലക്ടര്‍മാര്‍ ഉള്‍പ്പെടെ ജില്ലാതല ഉദ്യോഗസ്ഥരുടെ വിഡിയോ കോണ്‍ഫറന്‍സിലെ വിവരങ്ങള്‍ കൂടി കണക്കിലെടുത്താണു മുഖ്യമന്ത്രി രോഗവ്യാപന മുന്നറിയിപ്പു നല്‍കിയത്. എന്നാല്‍ കേരളത്തില്‍ ഇതുവരെ സമൂഹ വ്യാപനം ഉണ്ടായതായി കണ്ടെത്തിയിട്ടില്ലെന്നും മുഖ്യമന്ത്രി പറഞ്ഞു.

ലോക്ഡൗണില്‍ ഇളവുകള്‍ വരുത്തിയെങ്കിലും പ്രത്യേക മേഖലകളില്‍ കടുത്ത നിയന്ത്രണം വേണ്ടിവരുമെന്ന് അദ്ദേഹം പറഞ്ഞു. മോശം സാഹചര്യം വന്നാല്‍ നേരിടാനുള്ള തയാറെടുപ്പു നടത്തിയിട്ടുണ്ട്. സമ്പര്‍ക്കം ഒഴിവാക്കിയേ വ്യാപനം തടയാന്‍ കഴിയൂ. പുറത്തു നിന്നു വരുന്ന ചിലരില്‍ രോഗം ഉണ്ടാകും. അതു മറ്റുള്ളവരിലേക്കു പടരാതിരിക്കാന്‍ എല്ലാവരും ഒരുമിച്ചു നില്‍ക്കണം. പ്രവാസികള്‍ അകറ്റി നിര്‍ത്തേണ്ടവരല്ല. അവരുടെ സംരക്ഷണവും ഇവിടെയുള്ളവരുടെ സുരക്ഷയും ഒരുപോലെ ഉറപ്പാക്കേണ്ടതുണ്ട്.

പുറത്തു നിന്നു വന്നവര്‍ നിശ്ചിത ദിവസം ക്വാറന്റീനില്‍ കഴിയേണ്ടതു ചുമതലയായി കാണണം. ക്വാറന്റീനില്‍ കഴിയുന്നവര്‍ വീട്ടിനകത്തെ മുറിയില്‍ തന്നെ കഴിയണം. രോഗലക്ഷണമില്ലെങ്കില്‍ ഹോം ക്വാറന്റീന്‍ ആണു നിര്‍ദേശിച്ചിട്ടുള്ളത്. ഒട്ടേറെപ്പേര്‍ സര്‍ക്കാര്‍ ക്വാറന്റീന്‍ മതി എന്നു പറയുന്നു. സ്വന്തം വീട്ടില്‍ സൗകര്യമില്ലാത്തവര്‍ക്കു മാത്രമേ സര്‍ക്കാര്‍ ക്വാറന്റീന്‍ സൗകര്യമുള്ളൂ. ക്വാറന്റീനില്‍ കഴിയേണ്ടവരെ വീട്ടിലേക്കു കൊണ്ടുപോകുന്നവര്‍ക്കെതിരെ കര്‍ശന നടപടി ഉണ്ടാകും.ക്വാറന്റീന്‍ സംവിധാനം വിജയിപ്പിക്കുന്നതിനു വാര്‍ഡ് തല സമിതിക്കൊപ്പം സമീപവാസികളും റസിഡന്റ്സ് അസോസിയേഷനുകളും രംഗത്തുണ്ടാകണം.