കടലുണ്ടിപ്പുഴയുടെ തീരത്ത് മണ്ണിടിച്ചില്‍ തുടരുന്നു. കഴിഞ്ഞ കാലവര്‍ഷത്തില്‍ പുഴയുടെ തീരമിടിഞ്ഞ് വെളളം സമീപത്തെ പ്രദേശങ്ങളിലേക്ക് എത്തിയിരുന്നു. വിവിധ പഞ്ചായത്തുകളിലായി ഏക്കര്‍ കണക്കിനു ഭൂമിയാണ് പുഴയെടുത്തത്. കരിങ്കല്‍ ഉപയോഗിച്ച് പുഴയോരം കെട്ടിയുറപ്പിക്കാന്‍ ഇറിഗേഷന്‍ വകുപ്പിനോട് ആവശ്യപ്പെട്ടിട്ടും നടപടിയുണ്ടായില്ലെന്നാണ് പരാതി. അതേസമയം, നേരത്തെ ടെന്‍ഡര്‍ നല്‍കിയതിനെ തുടര്‍ന്ന് ചില ഭാഗങ്ങളില്‍ അരികു കെട്ടിയിട്ടുമുണ്ട്.

പുഴയോരത്ത് കയര്‍ ഭൂവസ്ത്രം പദ്ധതി പരീക്ഷണാടിസ്ഥാനത്തില്‍ നടപ്പാക്കണമെന്ന് പഞ്ചായത്തുകള്‍ ആവശ്യപ്പെട്ടതിനെ തുടര്‍ന്ന് അധികൃതര്‍ സ്ഥലപരിശോധന നടത്താമെന്ന് പറഞ്ഞെങ്കിലും ലോക്ഡൗണ്‍ വന്നതോടെ ഇതു മുടങ്ങി. 2 അട്ടിയില്‍ കയര്‍ ഭൂവസ്ത്രം പദ്ധതി നടപ്പാക്കാനായിരുന്നു ഉദ്ദേശം. മുകള്‍ ഭാഗത്ത് ചെറിയ മുള, ചരിവ് പ്രദേശത്ത് പുല്ല് വച്ചുപിടിപ്പിക്കല്‍, താഴെ വെള്ളമുള്ള ഭാഗത്ത് കൈത വച്ചുപിടിപ്പിക്കല്‍ എന്നിവയും നടപ്പാക്കാന്‍ പദ്ധതിയുണ്ടായിരുന്നു.

വിവിധ ഭാഗങ്ങളില്‍നിന്ന് വെള്ളത്തിലൂടെ ഒഴുകിവന്ന് കരയ്ക്കടിഞ്ഞ മരവും കടപുഴകിയ മരങ്ങളും ഇപ്പോഴും വെള്ളത്തില്‍ കിടക്കുകയാണ്. അവ പുഴയില്‍ കിടന്ന് നശിക്കുകയാണ്. വനം വകുപ്പിന്റെ അനുമതി ലഭിച്ചാല്‍ മാത്രമേ പഞ്ചായത്തുകള്‍ക്ക് ഇത് നീക്കാന്‍ കഴിയൂ. കാലവര്‍ഷം വീണ്ടും എത്തുന്നതിനു മുന്‍പേ പുഴയോരം സംരക്ഷിക്കാന്‍ നടപടി വേണമെന്നാണ് ആവശ്യം.