പെരുമ്പാവൂര്‍ അല്ലപ്രയില്‍ വാടകയ്ക്കു താമസിക്കുന്ന അന്‍വര്‍ (19) എന്ന യുവാവിനെ തട്ടിക്കൊണ്ടു പോയി മര്‍ദിച്ച് മോചന ദ്രവ്യം ആവശ്യപ്പെട്ട കേസില്‍ 3 പേര്‍ അറസ്റ്റിലായി. ചൊവ്വാഴ്ച വൈകിട്ട് 7-നാണ് തമിഴ്‌നാട് സ്വദേശിയായ യുവാവിനെ തട്ടിക്കൊണ്ടുപോയത്.

ഒന്നാം മൈല്‍ മൂക്കട സലാം( 48), പോഞ്ഞാശേരി പത്തുമാലില്‍ ബിനു(21), പെരുമ്പാവൂര്‍ പുത്തന്‍പുരയ്ക്കല്‍ ബേബി(48) എന്നിവരാണ് പിടിയിലായത്.

പ്രതികള്‍ ഒട്ടേറെ ക്രിമിനല്‍ കേസുകളില്‍പ്പെട്ടവരാണെന്ന് പൊലീസ് അറിയിച്ചു. സലാം പെരുമ്പാവൂര്‍ സ്റ്റേഷനിലെ കെഡി ലിസ്റ്റില്‍പ്പെട്ടയാളും കാപ്പ,ഗുണ്ട നിയമപ്രകാരം നടപടി നേരിട്ടയാളും 22ല്‍ പരം കേസുകളില്‍ പ്രതിയുമാണ്.

യുവാവിനെ തട്ടിക്കൊണ്ടു പോയതിനു ശേഷം അയാളുടെ ഫോണില്‍ നിന്നും സഹോദരനെ വിളിച്ച് 12000 രൂപ മോചന ദ്രവ്യം ആവശ്യപ്പെടുകയും പണം നല്‍കിയില്ലെങ്കില്‍ കൊല്ലുമെന്നു ഭീഷണിപ്പെടുത്തുകയും ചെയ്തു. ഇക്കാര്യം സഹോദരന്‍ പൊലീസിനെ അറിയിച്ചു. പൊലീസ് നടത്തിയ അന്വേഷണത്തില്‍ പോഞ്ഞാശേരി മടത്തിപ്പടി റോഡില്‍ സലാം വാടകയ്‌ക്കെടുത്ത വീട്ടില്‍ നിന്നു യുവാവിനെ കണ്ടെത്തി.

സംഘം പൊലീസിന് ആക്രമിക്കാന്‍ ശ്രമിച്ചെങ്കിലും ബലപ്രയോഗത്തിലൂടെ കീഴടക്കി. എസ്എച്ച്ഒ സി.ജയകുമാര്‍, എഎസ്‌ഐ ശിവപ്രസാദ്, ഷാജി, സിപിഒമാരായ ഷിബു, റെജിമോന്‍ എന്നിവര്‍ ചേര്‍ന്നാണ് പ്രതികളെ പിടികൂടിയത്.