ബവ് ക്യൂ മൊബൈൽ ആപ്ലിക്കേഷൻ: വിൽപ്പനയിൽ ഇടിവ് ഉണ്ടാകുമോ എന്ന് ഭയന്ന് സർക്കാരും ബവ്റേജ് കോർപ്പറേഷനും; മോഷണം നടത്താതിരിക്കാൻ പോലീസിന്റെ സഹായം അഭ്യർത്ഥിച്ച് ബെവ്കോ
ബവ് ക്യൂ മൊബൈൽ ആപ്ലിക്കേഷൻ അടുത്തയാഴ്ച പ്രവർത്തന സജ്ജമാകുമെന്ന് പ്രതീക്ഷിക്കവേ വിൽപ്പനയിൽ വൻ ഇടിവ് ഉണ്ടാകുമോ എന്ന് ഭയന്ന് സർക്കാരും ബവ്റേജ് കോർപ്പറേഷനും.
കർണാടകത്തിൽ മദ്യ വില്പനയിൽ 60 ശതമാനം ഇടിവുണ്ടായ സാഹചര്യത്തിലാണ് കേരളവും ഭയക്കുന്നത്. കർണാടകത്തിൽ മദ്യത്തിന്റെ വില വൻതോതിൽ വർധിപ്പിച്ചിരുന്നു. തമിഴ്നാട്ടിലും ഇതായിരുന്നു സ്ഥിതി. തമിഴ്നാട്ടിലും കാര്യമായ വിൽപ്പനക്കുറവുണ്ടായിട്ടുണ്ട് .
അതേസമയം കർണാടകത്തിലും തമിഴ്നാട്ടിലും മദ്യത്തിന് കേരളത്തിലേത് പോലെ വിലക്കൂടുതലില്ല. ഒരു സാധാരണ മദ്യം തമിഴ്നാട്ടിൽ ഫുള്ളിന് 200 രൂപക്ക് ലഭിക്കുമ്പോൾ കേരളത്തിലെ വില 500 ന് പുറത്താണ്. കേരളത്തിൽ മദ്യത്തിന്റെ നികുതി കൂടിയതാണ് കാരണം.
പൊതുവേ ഉയർന്ന വിലയിൽ നിന്നാണ് കേരളത്തിൽ വൻതോതിൽ വില വർധിപ്പിച്ചത്. ഇത് കുടിയൻമാർക്ക് താങ്ങാൻ കഴിയുന്നതല്ലെന്നാണ് പറയുന്നത്.
ലോക്ക് ഡൗൺ കാലത്ത് കേരളത്തിൽ വൻതോതിലാണ് ജനങ്ങൾ വാറ്റി തുടങ്ങിയത്. ഒരു പ്രഷർ കുക്കറും കുറച്ച് പഴങ്ങളും ഉണ്ടെങ്കിൽ മദ്യം വാറ്റി തുടങ്ങാം. ഇത്തരത്തിൽ ഉണ്ടാക്കുന്ന മദ്യത്തിൽ 60 ശതമാനം അൽക്കഹോൾ ഉണ്ടാകും. സാധാരണ മദ്യത്തെക്കാൻ വീര്യം വീട്ടിലുണ്ടാക്കുന്ന മദ്യത്തിന് ഉണ്ടെന്നാണ് അനുഭവസ്ഥർ പറയുന്നത്.
വൈദ്യശാലകളിൽ വിൽക്കുന്ന അരിഷ്ടങ്ങളിൽ ലഹരിക്ക് മികച്ച സ്കോപ്പുണ്ട്. സംസ്ഥാനത്തെ വൈദ്യശാലകളിൽ അരിഷ്ടം വിൽപ്പന തകൃതിയായാണ് നടക്കുന്നത്. അരിഷ്ടത്തിന്റെ വിലയിൽ വലിയ വർദ്ധനവാണ് വൈദ്യാശാലകൾ അടുത്ത കാലത്ത് വരുത്തിയത്. കച്ചവടം കുറവായിരുന്ന വൈദ്യശാലകളിൽ വൻ തോതിലാണ് അരിഷ്ടങ്ങൾ വിറ്റുപോകുന്നത്. ചില തട്ടുകടകൾ വൈദ്യശാലകളായി പരിണമിക്കുകയും ചെയ്തു.
വരും ദിവസങ്ങളിൽ അരിഷ്ടവും സ്വന്തം വാറ്റും നടത്തി മദ്യത്തിന്റെ കുറവ് പരിഹരിക്കാമെന്നാണ് മദ്യപൻമാരുടെ ചിന്ത. കൂടിയ വിലയ്ക്ക് മദ്യം വാങ്ങുന്നതിനെക്കാൾ നല്ലത് സ്വന്തം നിർമ്മിതിയാണെന്ന് കുടിയൻമാർ കരുതുന്നു. കർണാടകത്തിലും തമിഴ്നാട്ടിലും ഇതാണ് അവസ്ഥ.വാറ്റ് ചാരായത്തിന്റെ നിർമ്മിതിയാണ് ഇതര സംസ്ഥാനങ്ങളിൽ നടക്കുന്നത്. അതും വരും ദിവസങ്ങളിൽ കേരളത്തിലുണ്ടാകും. ഉദ്യോഗസ്ഥർ കണ്ണടച്ച് കൊടുക്കുന്നുണ്ട്
അതിനിടെ ബവ്കോ വെയർഹൗസുകളോട് തയ്യാറാകാൻ ബവ്കോ എം ഡി നിർദ്ദേശം നൽകിയിട്ടുണ്ട്. വെയർഹൗസുകളിൽ ജീവനക്കാർ മോഷണം നടത്താതിരിക്കാൻ പോലീസിന്റെ സഹായം തേടിയിട്ടുണ്ട്. അടുത്തയാഴ്ച വിൽപ്പന പുനരാരംഭിക്കുമെന്നാണ് ബവ്കോ ഉന്നതർ പറയുന്നത് .
https://www.facebook.com/Malayalivartha