കോവിഡ് കാലത്തിനിടയിലും നാടിനെ നടുക്കിയ ഉത്രയുടെ മരണവുമായി ബന്ധപ്പെട്ട അന്വേഷണം പരിസമാപ്തിയിലേയ്ക്ക് എന്ന് പറയാന്‍ കഴിയുന്ന തരത്തിലുള്ള തെളിവുകള്‍ ക്രൈം ബ്രാഞ്ചിന് ലഭിച്ചതായി റിപ്പോര്‍ട്ട് വന്നിരിക്കുകയാണ് .മരണവുമായി ബന്ധപ്പെട്ട് ഉത്രയുടെ മാതാപിതാക്കള്‍ സംശയിക്കുന്നത് സൂരജിനെയാണ് .മകള്‍ക്ക് വിവാഹസമ്മാനമായി നല്‍കിയ സ്വര്‍ണാഭരണങ്ങള്‍ ഒന്നും തന്നെ കാണാന്‍ ഇല്ല എന്നായിരുന്നു മാതാപിതാക്കളുടെ പരാതി .മാത്രമല്ല സൂരജിന്റെ പെരുമാറ്റത്തില്‍ പന്തികേട് തോന്നിയിരുന്നതായും സാഹചര്യ തെളിവുകളെ ആസ്പദമാക്കി നോക്കിയാല്‍ സൂരജ് എല്ലാ തരത്തിലും ഈ സംഭവുമായി നേരിട്ട് ബന്ധമുള്ളതായി തോന്നും എന്നതുമായ ആരോപണങ്ങള്‍ പോലീസ് ഇതിനോടകം തന്നെ രേഖപ്പെടുത്തി കഴിഞ്ഞിരുന്നു .

ഉത്രയുടെ മരണം ഭര്‍തൃ ഗൃഹത്തില്‍ വച്ചല്ലായിരുന്നല്ലോ എന്ന കാര്യം മാത്രമാണ് സൂരജ് പ്രതിരോധത്തിനായി ഉപയോഗിക്കുന്ന വാക്യം .എന്നാല്‍ അതിനുള്ള മറുപടി കൂടി പോലീസിന് ലഭിച്ചതോടെ കാര്യങ്ങള്‍ കൃത്യമായി വിശകലനം ചെയ്തിരിക്കുകയാണ് .ഉത്രയുടെ മരണത്തില്‍ സൂരജിന് പങ്കില്ലെങ്കില്‍ പിന്നെ ബാങ്ക് ലോക്കര്‍ തുറന്നതെങ്ങനെ .പാമ്പുപിടിത്തക്കാരുമായി ബന്ധപ്പെടേണ്ട കാര്യം തുടങ്ങിയവ പരിശോധനയില്‍ ഉണ്ട് .
ശാസ്ത്രീയമായ രീതിയിലുള്ള അന്വേഷണമാണ് നിലവില്‍ നടക്കുന്നത് .പോസ്റ്റ് മോര്‍ട്ടം റിപ്പോര്‍ട്ടിനോടൊപ്പം ഫോറന്‍സിക് പരിശോധന കൂടി നടത്തിയ ശേഷമാകുംകേസിനു അന്ത്യം കുറിക്കുക എന്ന് തന്നെ വ്യക്തമായിട്ടുണ്ട് .സ്വന്തം വീട്ടിലെ കിടപ്പു മുറിയില്‍ വെച്ചാണ് മൂര്‍ഖന്‍ പാമ്പിന്റെ കടിയേറ്റു ഉത്രയെന്ന 25 കാരി മരിച്ചത് .യുവതി മരിച്ച സംഭവത്തില്‍ പൊലീസ് നടത്തുന്നത് ശാസ്ത്രീയ അന്വേഷണം തന്നെയാണ് എന്ന വ്യക്തമായതോടെ അന്വേഷണം തൃപ്തികരം എന്നാണ് ബന്ധുക്കളും നാട്ടുകാരും പറയുന്നത് . ഉടന്‍ കൃത്യമായ നിഗമനത്തില്‍ എത്താനാകും എന്ന പ്രതീക്ഷയിലാണ് അന്വേഷണ ഉദ്യോഗസ്ഥര്‍.

ഭര്‍ത്താവ് അടൂര്‍ പറക്കോട് സ്വദേശി സൂരജ് ചില പാമ്പ് പിടുത്തക്കാരുമായി നിരന്തരം ഫോണില്‍ ബന്ധപ്പെട്ടിരുന്നതായി സൈബര്‍ സെല്‍ കണ്ടെത്തി. പാമ്പ് പിടുത്തക്കാരും സൂരജിന്റെ ചില സഹായികളും നിരീക്ഷണത്തിലാണ്.തുറന്നിട്ട ജനാലയില്‍ കൂടി കയറിയ മൂര്‍ഖന്‍ പാമ്പ് ഉത്രയെ കടിച്ചെന്നാണു സൂരജിന്റെ വാദം. ഇതു ശരിയാണോ എന്നറിയാന്‍ കൂടുതല്‍ ശാസ്ത്രീയ പരിശോധന ആവശ്യമാണ്. തറ നിരപ്പില്‍നിന്ന് പാമ്പിന് എത്ര ഉയരാന്‍ കഴിയും എന്നതാണു പ്രധാനമായി കണ്ടെത്തേണ്ടത്. ഇക്കാര്യത്തില്‍ ജന്തുശാസ്ത്ര വിദഗ്ധരുടെയും പാമ്പ് പിടുത്തക്കാരുടെയും അറിവ് തേടുന്നുണ്ട്. ഉറക്കത്തില്‍ വിഷപ്പാമ്പിന്റെ കടിയേറ്റാല്‍ ഉണരുമെന്നാണ് ഈ രംഗത്തു പ്രവര്‍ത്തിക്കുന്നവര്‍ പറയുന്നത്. എന്നാല്‍ ഉത്ര ഉണര്‍ന്നില്ല. അതിന്റെ കാരണം പോസ്റ്റ്‌മോര്‍ട്ടം റിപ്പോര്‍ട്ടില്‍ അറിയാന്‍ കഴിയുമെന്ന പ്രതീക്ഷയിലാണു പൊലീസ് . റിപ്പോര്‍ട്ട് കിട്ടാന്‍ വൈകുന്നത് അന്വേഷണത്തെ ബാധിക്കുന്നുണ്ട്. എന്നാല്‍ എത്ര വൈകിയാലും സത്യം വെളിച്ചത്തു വരും എന്ന പ്രതീക്ഷയാണ് ഏവര്‍ക്കും ഉള്ളത് മാര്‍ച്ച് 2നു സൂരജിന്റെ വീട്ടില്‍ വച്ച് ഉത്രയ്ക്കു പാമ്പ് കടിയേറ്റിരുന്നു. അതിന്റെ ചികിത്സ തുടരുന്നതിന് ഇടയ്ക്കാണു കഴിഞ്ഞ 7നു സ്വന്തം വീട്ടില്‍ വീണ്ടും പാമ്പ് കടിയേല്‍ക്കുന്നത്. 2 പ്രാവശ്യവും സൂരജ് സമീപത്ത് ഉണ്ടായിരുന്നു. ഉത്രയുടെ സ്വര്‍ണാഭരണങ്ങള്‍ സൂക്ഷിച്ചിരുന്ന ബാങ്ക് ലോക്കര്‍ മാര്‍ച്ച് 2നു രാവിലെ തുറന്നതായി പൊലീസ് കണ്ടെത്തി. ഉത്രയുടെയും സൂരജിന്റെയും സംയുക്ത അക്കൗണ്ടിലാണ് ലോക്കര്‍. മകള്‍ക്ക് വിവാഹ സമ്മാനമായി നല്‍കിയ സ്വര്‍ണാഭരണങ്ങള്‍ നഷ്ടമായതായി രക്ഷിതാക്കള്‍ പൊലീസില്‍ നല്‍കിയ പരാതിയില്‍ പറയുന്നു.