പാപമോചനത്തിന്റെയും പശ്ചാത്താപത്തിന്റെയും നാളുകളിലൂടെ സ്ഫുടം ചെയ്ത മനസ്സും ശരീരവുമായി വിശ്വാസികള്‍ക്ക് ഞായറാഴ്ച ചെറിയ പെരുന്നാള്‍ (ഈദുല്‍ ഫിത്ര്‍). റമദാന്‍ മുപ്പതുനാള്‍ പൂര്‍ത്തിയാക്കിയാണ് ഇത്തവണ പെരുന്നാള്‍ വന്നെത്തിയത്. മഹാമാരിയായ കോവിഡ് സൃഷ്ടിച്ച ഗുരുതര പ്രതിസന്ധി ഘട്ടത്തിലാണ് വിശുദ്ധ റമദാന്‍ കടന്നുപോയത്. ആരാധനകളാല്‍ രാപ്പകല്‍ പ്രശോഭിതമാവേണ്ട പള്ളികളൊക്കെയും കോവിഡിനെ പ്രതിരോധിക്കാനായി അടഞ്ഞുകിടക്കുകയായിരുന്നു.
റമദാനിലെ ആരാധനയും പ്രാര്‍ഥനകളുമെല്ലാം വീടുകളില്‍ തന്നെയാക്കി. പൊലിമയില്ലാതെയാണ് വിശ്വാസികള്‍ ഈ പെരുന്നാളിനെ വരവേല്‍ക്കുന്നത്. പള്ളികളും ഈദ്ഗാഹുകളും തക്ബീര്‍ ധ്വനികളാല്‍ മുഖരിതമാവില്ല. വീടുകളില്‍ വെച്ച് തന്നെയാവും പെരുന്നാള്‍ നമസ്‌കാരവും മറ്റു പ്രാര്‍ഥനകളും. പെരുന്നാള്‍ ആശംസകള്‍ ഫോണും സമൂഹ മാധ്യമങ്ങളും വഴി ഒതുങ്ങും.