പന്തല്ലൂര്‍, ചേരമ്പാടിക്കടുത്ത് വെള്ളിയാഴ്ച രാത്രി കാട്ടാന ഇറങ്ങി. വൈകുന്നേരങ്ങളില്‍, മഴവന്‍ ചേരമ്പാടി പ്രദേശം കാട്ടാനകള്‍ കയ്യടക്കുകയാണ്.

കുടിവെള്ള പൈപ്പില്‍ നിന്നു വെള്ളം ശേഖരിക്കുകയായിരുന്ന ശേഖറിന്റെ ഭാര്യ കനകേശ്വരി റോഡിലൂടെ വരുന്ന ആനയെ കണ്ട് ഓടി വീണ് പരുക്കേറ്റു. ഇവരെ പന്തല്ലൂര്‍ താലൂക്ക് ആശുപത്രിയില്‍ പ്രവേശിപ്പിച്ചു.

മഴവന്‍ ചേരമ്പാടിയിലെ ആറുമുഖന്റെ വീട് ആന തകര്‍ത്തു. വീട് ഇടിക്കുന്ന ശബ്ദം കേട്ട് ആറുമുഖവും കുടുംബവും തൊട്ടടുത്ത വീട്ടിലേക്ക് ഓടി രക്ഷപ്പെട്ടു.

അതുപോലെ തന്നെ ചെല്ലങ്കോട്, ചോലാടി മേഖലകളിലും കാട്ടാനശല്യം രൂക്ഷമാണ്. ഏറെ നാളായി കാട്ടാനക്കൂട്ടം ഈ മേഖലകളില്‍ വിളകള്‍ നശിപ്പിക്കുന്നുണ്ട്. പകല്‍ പോലും കാട്ടാനക്കൂട്ടം എത്തുന്നതായി നാട്ടുകാര്‍ പറഞ്ഞു. കഴിഞ്ഞദിവസം ഊട്ടി - കോഴിക്കോട് പാതയോരത്തെ ചിത്രഗിരി എല്‍പി സ്‌കൂളിനു സമീപം വരെ കാട്ടാനക്കൂട്ടം എത്തി.

വനാതിര്‍ത്തിയിലെ ഫെന്‍സിങ് തകര്‍ന്നതോടെയാണു കാട്ടാനകള്‍ ജനവാസ കേന്ദ്രങ്ങളിലെത്താന്‍ തുടങ്ങിയത്. ഒട്ടേറെത്തവണ പരാതിപ്പെട്ടിട്ടും അധികൃതര്‍ തിരിഞ്ഞുനോക്കിയില്ലെന്നു നാട്ടുകാര്‍ പറഞ്ഞു. കാട്ടാനക്കൂട്ടം നശിപ്പിച്ച വിളകള്‍ക്ക് അര്‍ഹമായ നഷ്ടപരിഹാരം ലഭ്യമാക്കാന്‍ നടപടിയില്ലെന്നും പരാതിയുണ്ട്. കാട്ടാനശല്യത്തിന് ഉടന്‍ പരിഹാരം കാണണമെന്നും അല്ലെങ്കില്‍ സമരവുമായി രംഗത്തിറങ്ങുമെന്നും നാട്ടുകാര്‍ മുന്നറിയിപ്പു നല്‍കി.

ഗൂഡല്ലൂരില്‍ ഇന്നലെ രാവിലെ ദേവര്‍ഷോല സസെക്സ്സ് കമ്പനി തോട്ടത്തില്‍ തേയിലയ്ക്കു മരുന്ന് തളിച്ചു കൊണ്ടിരുന്ന തോട്ടം തൊഴിലാളിക്കു കാട്ടാനയുടെ ആക്രമണത്തില്‍ പരുക്ക്. ദേവര്‍ഷോല സ്വദേശി രാജേന്ദ്രനാണു (55) പരുക്കേറ്റത്. ഓടിയെത്തിയ കാട്ടാന രാജേന്ദ്രനെ തൂക്കിയെറിഞ്ഞു. ഒപ്പമുണ്ടായിരുന്നവര്‍ ബഹളം വെച്ചതോടെ കാട്ടാന പിന്‍വാങ്ങി. പരുക്കേറ്റ രാജേന്ദ്രനെ ഊട്ടി ജില്ലാ ആശുപത്രിയില്‍ പ്രവേശിപ്പിച്ചു.