ഗള്‍ഫില്‍ കുടുങ്ങിയ പ്രവാസികളെ നാട്ടിലേക്ക്​ മടക്കിയെത്തിക്കുന്നതിനായുള്ള മൂന്നാം ഘട്ട വിമാന സര്‍വീസുകള്‍ക്ക്​ മെയ്​ 26ന്​ ആരംഭിക്കും. ​ മൂന്നാം ഘട്ടത്തില്‍ ഒമാനില്‍ നിന്ന്​ കേരളത്തിലേക്ക്​ പത്ത്​ സര്‍വീസുകളാണ് ഉണ്ടാവുക. ഇതില്‍ മൂന്നെണ്ണം സലാലയില്‍ നിന്നും മറ്റ്​ സംസ്​ഥാനങ്ങളിലേക്കായി ഒമാനില്‍ നിന്ന്​ അഞ്ച്​ സര്‍വീസുകളും ഉണ്ടാകും.

മസ്​കത്തില്‍ നിന്ന്​ കോഴിക്കോടിനും കൊച്ചിക്കും തിരുവനന്തപുരത്തിനും രണ്ട്​ വിമാനങ്ങള്‍ വീതവും കണ്ണൂരിന്​ ഒരു വിമാനവുമാണ്​​ ഉള്ളത്​. സലാലയില്‍ നിന്നുള്ള മൂന്ന്​ സര്‍വീസുകളും കണ്ണൂരിനാണ്​. ജയ്​പൂര്‍, അഹമ്മദാബാദ്​, ശ്രീനഗര്‍, ഭുവനേശ്വര്‍, ചെന്നൈ എന്നിവിടങ്ങളിലേക്കും മസ്​കത്തില്‍ നിന്ന്​ വിമാനങ്ങള്‍ ഉണ്ടാകും. മെയ്​ 28നാണ്​ ഒമാനില്‍ നിന്നുള്ള സര്‍വീസുകള്‍ തുടങ്ങുക. കോഴിക്കോടിനുള്ള ആദ്യ വിമാനം മസ്​കത്തില്‍ നിന്ന്​ ഉച്ചക്ക്​ രണ്ടിന്​ പുറപ്പെടും. സലാല കണ്ണൂര്‍ വിമാനവും അന്നുണ്ട്​. ഇത്​ വൈകുന്നേരം 3.10നാണ്​ പുറപ്പെടുക. 29ന്​ കൊച്ചിക്കാണ്​ അടുത്ത വിമാനം. ഇത്​ വൈകുന്നേരം 3.45ന്​ മസ്​കത്തില്‍ നിന്ന്​ പുറപ്പെടും. മെയ്​ 30നുള്ള തിരുവനന്തപുരം സര്‍വീസ്​ വൈകുന്നേരം 3.40നാകും മസ്​കത്തില്‍ നിന്ന്​ പുറപ്പെടുക. മെയ്​ 31നുള്ള കണ്ണൂര്‍ വിമാനം സലാലയില്‍ നിന്ന്​ വൈകുന്നേരം 3.10ന്​ പുറപ്പെടും. ജൂണ്‍ ഒന്നിന്​ മസ്​കത്തില്‍ നിന്ന്​ കോഴിക്കോടിനും സലാലയില്‍ നിന്ന്​ കണ്ണൂരിനും വിമാനങ്ങളുണ്ട്​. യഥാക്രമം ഉച്ചക്ക്​ രണ്ടിനും വൈകുന്നേരം 3.10നുമാണ്​ ഇൗ വിമാനങ്ങള്‍ പുറപ്പെടുക. അടുത്ത വിമാനം ജൂണ്‍ മൂന്നിന്​ മസ്​കത്തില്‍ കണ്ണൂരിനാണുള്ളത്​. ഇത്​ വൈകുന്നേരം 4.15ന്​ മസ്​കത്തില്‍ നിന്ന്​ പുറപ്പെടും. അവസാന ദിനമായ ജൂണ്‍ നാലിന്​ മസ്​കത്ത്​-തിരുവനന്തപുരം വിമാനം വൈകുന്നേരം 3.40നും മസ്​കത്ത്​-കൊച്ചി വിമാനം വൈകുന്നേരം 3.45നും പുറപ്പെടും.

ഗര്‍ഭിണികള്‍, അടിയന്തിര ചികിത്സ ആവശ്യമുള്ളവര്‍, ജോലി നഷ്​ടപ്പെട്ടവര്‍, മുതിര്‍ന്ന പൗരന്മാര്‍ എന്നിവര്‍ക്കായിരിക്കും മുന്‍ഗണന. നേരത്തേ രജിസ്​റ്റര്‍ ചെയ്​തവരുടെ പട്ടികയില്‍ നിന്നാണ്​ എംബസി യാത്രക്കാരുടെ മുന്‍ഗണനാ പട്ടിക തയാറാക്കുക. ഇവരെ ടെലിഫോണ്‍/ഇമെയില്‍ മുഖേന ബന്ധപ്പെട്ട്​ വിവരമറിയിക്കും. ഇൗ പട്ടിക എയര്‍ഇന്ത്യ ഒാഫീസിന്​ കൈമാറുമെന്നും ടിക്കറ്റ്​ ബുക്കിങ്ങിനായി ഇവരെ എയര്‍ഇന്ത്യ ഒാഫീസില്‍ നിന്ന്​ ബന്ധപ്പെടുമെന്നും ഇന്ത്യന്‍ എംബസി അറിയിച്ചു.