'ബെവ് ക്യു' ആപ്ലിക്കേഷന് ഗൂഗിള്‍ അനുമതി; ഒരു ദിവസത്തിനകം പ്ലേസ്റ്റോറില്‍ ലഭ്യമാകും; മദ്യവില്‍പന ഈയാഴ്ച തന്നെ
മദ്യം വാങ്ങാനുള്ള വെര്‍ച്വല്‍ ക്യൂവിനായുള്ള ബെവ് ക്യൂ മൊബൈല്‍ ആപ്ലിക്കേഷന് ഗൂഗിളിന്റെ അനുമതി. ഒരു ദിവസത്തിനകം ആപ്പ് പ്ലേ സ്റ്റോറില് ലഭ്യമാകും. രണ്ട് ദിവസത്തിനകം മദ്യ വില്‍പ്പന തുടങ്ങുമെന്നാണ് അറിയുന്നത്.
മദ്യ ഉപയോക്താക്കള്‍ രണ്ടുദിവസം കൊണ്ട് വരുമെന്ന് പ്രതീക്ഷിച്ച ആപ്ലിക്കേഷന് പക്ഷെ പണികള്‍ കഴിയാന്‍ സമയമെടുക്കുകയായിരുന്നു. ആദ്യത്തെ 15 മിനിറ്റില്‍ തന്നെ 20 ലക്ഷം ഉപയോക്താക്കളെ പ്രതീക്ഷിക്കുന്ന ആപ്ലിക്കേഷന് വേണ്ടത്ര സന്നാഹപ്പെടുത്താതെ പുറത്തിറക്കാനാകില്ല എന്നതായിരുന്നു ആപ്പ് നിര്‍മാണ് ഏല്‍പ്പിക്കപ്പെട്ട ഫെയര്‍കോഡ് ടെക്നോളജീസിന്റെ നിലപാട്.
ആപ്പ് വൈകുന്നത് പ്ലേ സ്റ്റോറില് നിന്നും മറുപടി ലഭിക്കാത്തത് കൊണ്ടെന്ന് ആപ്പ് നിര്‍മ്മിക്കുന്ന ഫെയര്‍കോഡ് ടെക്നോളജീസ് ഇന്നലെ പറഞ്ഞിരുന്നു. പ്ലേ സ്റ്റോറില് അപ്ലോഡ് ചെയ്ത ശേഷമുള്ള സ്വാഭാവിക കാലതാമസമാണ് ഇതെന്നും കമ്പനി അറിയിച്ചിരുന്നു.
കഴിഞ്ഞ ശനിയാഴ്ചയാണ് പ്ലേ സ്റ്റോറില് ആപ്പ് അംഗീകാരത്തിനായി നല്‍കിയത്. കഴിഞ്ഞ തിങ്കളാഴ്ച ആപ്പ് പബ്ലിഷ് ചെയ്യുന്ന വിവരം സര്‍ക്കാര്‍ ഗൂഗിളിനെ അറിയിക്കുകയും കാലതാമസമില്ലാതെ പബ്ലിഷ് ചെയ്യുന്നതിന് അഭ്യര്‍ഥിക്കുകയും ചെയ്തിരുന്നു.
ഈയാഴ്ച തന്നെ മദ്യവിതരണവും ആരംഭിക്കുമെന്നാണ് വിവരം. എക്സൈസ് മന്ത്രി ടിപി രാമകൃഷ്ണന്‍ ഇന്ന് എക്സൈസ് കമ്മീഷണറുമായി ചര്‍ച്ച നടത്തും. ബെവ്കോ മാനേജിങ് ഡയറക്ടറുമായും ചര്‍ച്ച നടക്കും. ഈ ചര്‍ച്ചകളില്‍ എന്നുമുതല്‍ മദ്യവിതരണം ആകാമെന്നതില്‍ വ്യക്തത വരും.
സര്‍ക്കാര്‍ തലത്തിലുള്ള ആപ്പ് ആണെന്നു വിശദീകരിച്ചാണ് പ്ലേ സ്റ്റോറിന് ആപ്പ് സമര്‍പ്പിച്ചിട്ടുള്ളത്. പ്ലേ സ്റ്റോറിന്റെ ക്ലിയറന്‍സ് ലഭിച്ച് പബ്ലിഷ് ചെയ്താലും ഏതാനും ദിവസം കൂടി വൈകിയ ശേഷമേ ആപ്പ് പൊതുജനങ്ങള്‍ക്ക് ഉപയോഗിക്കാന്‍ ലഭിക്കൂ എന്നാണ് കമ്പനി വ്യക്തമാക്കുന്നത്.
പ്ലേ സ്റ്റോറില് ഔട്ട്‌ലെറ്റുകള്‍ ഉള്‍പ്പെടുത്തി സാങ്കേതിക പരിശോധനകള്‍ നടത്തേണ്ടതുണ്ട്. വിജയകരമെന്ന് ഉറപ്പിച്ച ശേഷമായിരിക്കും പൊതുജനങ്ങള്‍ക്ക് ലഭ്യമാകുക.ഒരേ സമയം നിരവധി ആളുകള്‍ പ്രവേശിക്കുമ്പോള്‍ തകരാറിലാകാതിരിക്കാന്‍ ലോഡിങ് ടെസ്റ്റ് നടത്തും. ഹാക്കിങ് ഉണ്ടാകാതിരിക്കാന്‍ സുരക്ഷാ പരിശോധനയും നടത്തും. ഇതുരണ്ടും ഒരേ സമയം നടത്താന്‍ സാധിക്കുമെന്നാണ് നിര്‍മാതാക്കള്‍ അറിയിച്ചിട്ടുള്ളത്,'എന്നാണ് റിപ്പോർട്ടുകൾ .
അതേസമയം, മദ്യ വിതരണത്തിന് ഔട്ട്‌ലെറ്റുകളും മദ്യശാലകളും എല്ലാം അണുനശീകരണ ജോലികള്‍ പൂര്‍ത്തിയാക്കി തയാറായിക്കഴിഞ്ഞു.
ഉപയോഗിക്കുന്ന ആളുടെ പിന്‍കോഡ് അനുസരിച്ചായിരിക്കും ആപ്പിലെ പ്രവര്‍ത്തനങ്ങള്‍. ഇതിലൂടെ ലഭിക്കുന്ന ഇ-ടിക്കറ്റില്‍ ഏത് മദ്യഷാപ്പില്‍ എപ്പോള്‍ വരണമെന്ന് അറിയിക്കും. അതനുസരിച്ച് ഉപഭോക്താക്കള്‍ എത്തിയാല്‍ മദ്യം വാങ്ങാം. ഇ-ടിക്കറ്റിലെ ക്യൂ ആര്‍ കോഡ് മദ്യശാലകളില്‍ സ്‌കാന്‍ ചെയ്ത് പരിശോധിച്ച് ഉറപ്പുവരുത്തുകയും ചെയ്യും. ഒരാള്‍ക്ക്‌ പരമാവധി മൂന്ന് ലിറ്റര്‍ മദ്യമേ ലഭിക്കൂ. നാല് ദിവസത്തിനുള്ളില്‍ ഒരു തവണ മാത്രമേ മദ്യം നല്‍കൂ
https://www.facebook.com/Malayalivartha
