ശബരിമല തീർത്ഥാടന കാലത്ത് നിലയ്ക്കലിലെ തിരക്ക് കുറയ്ക്കാൻ പുതിയ രണ്ടു റോഡുകൾ നിർമ്മിക്കണമെന്ന നിർദ്ദേശവുമായി പൊലീസ്. നിലയ്ക്കൽ പാർക്കിംഗ് ഗ്രൗണ്ടിൽ നിന്നും കെ.എസ്.ആർ.ടി.സി സ്റ്റാൻഡിൽ നിന്നും പുറത്തേക്കു കടക്കാനായി പര്യാപ്തമായ രീതിയിലാണ് നിർമ്മിക്കേണ്ടത്. ഇക്കാര്യം ദേവസ്വം ബോർഡിനെ അറിയിക്കുകയും ചെയ്തു.

മണ്ഡലപൂജ, മകര വിളക്ക് കാലത്ത് വാഹനങ്ങൾ തിങ്ങി ഗതാഗതം മണിക്കൂറുകളോളം സ്തംഭിക്കുന്ന സാഹചര്യമുണ്ട്. ഇതൊഴിവാക്കാനാണ് പൊലീസിന്റെ ശ്രമം. പ്ലാൻ ബി എന്ന നിലയിലാണ് ഇത് സമർപ്പിച്ചത്. നിലവിൽ മാസ പൂജ സമയങ്ങളിലും ശബരിമലയിൽ വൻ തിരക്കേറുന്നുണ്ട്. വരുന്ന മണ്ഡല, മകരവിളക്ക് കാലത്ത് ഭക്തജനത്തിരക്ക് കഴിഞ്ഞ സീസണേക്കാൾ കൂടുമെന്നാണ് പൊലീസിന്റെയും ദേവസ്വം ബോർഡിന്റെയും വിലയിരുത്തലുകളുള്ളത്.

വാഹനങ്ങൾ സുഗമമായി നിലയ്ക്കലിൽ നിന്ന് കടത്തിവി‌ടാനാണ് പുതിയ റോഡ് നിർമ്മിക്കണമെന്ന് പൊലീസ് ആവശ്യപ്പെട്ടിട്ടുണ്ടായിരുന്നത്. ഈ മാസം 17ന് തീർത്ഥാടന ഒരുക്കങ്ങളുടെ അവലോകന യോഗത്തിനെത്തുന്ന മുഖ്യമന്ത്രിക്ക് മുന്നിൽ പുതിയറോഡുകളുടെ നിർദ്ദേശം പൊലീസ് ഉദ്യോഗസ്ഥർ വിശദീകരിക്കുകയും ചെയ്യും.