കൂടുതൽ ജാഗ്രത ; കോവിഡ് പരിശോധനകള് ശക്തമാക്കുന്നതിന്റെ ഭാഗമായി സംസ്ഥാനത്ത് 150 താത്ക്കാലിക തസ്തികകള് സൃഷ്ടിച്ചു
കോവിഡ് പരിശോധനകള് ശക്തമാക്കുന്നതിന്റെ ഭാഗമായി സംസ്ഥാനത്തെ കോവിഡ്-19 ലബോറട്ടറികളില് ആരോഗ്യ വകുപ്പ് എന്എച്ച്എം വഴി 150 താത്ക്കാലിക തസ്തികകള് സൃഷ്ടിച്ചു. 19 റിസര്ച്ച് ഓഫീസര്, 65 ലാബ് ടെക്നീഷ്യന്, 29 ലാബ് അസിസ്റ്റന്റ്, 17 ഡേറ്റ എന്ട്രി ഓപ്പറേറ്റര്, 20 ക്ലീനിംഗ് സ്റ്റാഫ് എന്നിങ്ങനെയാണ് തസ്തികകള് സൃഷ്ടിച്ചത്.
തിരുവനന്തപുരം മെഡിക്കല് കോളജ് 7, തൃശൂര് മെഡിക്കല് കോളജ് 14, കോഴിക്കോട് മെഡിക്കല് കോളജ് 16, തിരുവനന്തപുരം സ്റ്റേറ്റ് പബ്ലിക് ഹെല്ത്ത് ലാബ് 11, തിരുവനന്തപുരം രാജീവ് ഗാന്ധി സെന്റര് ഫോര് ബയോടെക്നോളജി 8, തിരുവനന്തപുരം ശ്രീചിത്ര ഇന്സ്റ്റിറ്റ്യൂട്ട് 13, കോട്ടയം ഇന്റര് യൂണിവേഴ്സിറ്റി സെന്റര് ഫോര് ബയോമെഡിക്കല് റിസര്ച്ച് 14, മലബാര് കാന്സര് സെന്റര് 12, കാസര്ഗോഡ് സെന്റര് യൂണിവേഴ്സിറ്റി 12, എറണാകുളം മെഡിക്കല് കോളജ് 10, മഞ്ചേരി മെഡിക്കല് കോളജ് 15, കണ്ണൂര് മെഡിക്കല് കോളജ് 2, കോട്ടയം മെഡിക്കല് കോളേജ് 16 എന്നിങ്ങനേയാണ് തസ്തികകള് സൃഷ്ടിച്ചത്. സംസ്ഥാനത്തിന് പുറത്തുനിന്ന് എത്തുന്നവരുടെ എണ്ണവും കോവിഡ് രോഗികളുടെ എണ്ണവും കൂടിയ സാഹചര്യത്തിലാണ് പരിശോധനകള് ശക്തിപ്പെടുത്താന് തീരുമാനിച്ചത്. 14 സര്ക്കാര് ലാബുകളിലും ആറ് സ്വകാര്യ ലാബുകളിലുമുള്പ്പെടെ 20 സ്ഥലങ്ങളിലാണ് കോവിഡ്-19 പരിശോധിക്കാനുള്ള സംവിധാനങ്ങളുള്ളത്.
മൂന്നു മാസത്തിനുള്ളിലാണ് ഈ 20 ലാബുകള് പ്രവര്ത്തനസജ്ജമാക്കാന് സാധിച്ചത്. 10 റിയല് ടൈം പിസിആര് മെഷീനുകളും അധികമായി ലഭ്യമാക്കിയിരുന്നു. തുടക്കത്തില് 100 പരിശോധനകള് മാത്രം നടത്താന് കഴിഞ്ഞ ലാബുകളില് പരിശോധനകള് ഇരട്ടിയിലധികമാക്കാന് സാധിച്ചു. എല്ലാ സര്ക്കാര് ലാബുകളിലും കൂടി ദിനംപ്രതി 3000 പരിശോധനകള് നടത്താന് കഴിയുന്നതാണ്. അത്യാവശ്യ ഘട്ടങ്ങളില് അത് 5,000 ത്തോളമായി ഉയര്ത്താനുമാകും.
കോവിഡ് പ്രതിരോധ പ്രവര്ത്തനങ്ങളുടെ ഭാഗമായി അടുത്തിടെ 6700 താത്ക്കാലിക തസ്തികകളാണ് ആരോഗ്യ വകുപ്പില് അടുത്തിടെ സൃഷ്ടിച്ചത്. നേരത്തെ 276 ഡോക്ടര്മാരെ പിഎസ്സി. വഴി അടിയന്തരമായി നിയമിച്ചിരുന്നു. കാസര്ഗോഡ് മെഡിക്കല് കോളജ് ആശുപത്രിക്കായി 273 തസ്തികകള് സൃഷ്ടിച്ച് നിയമനം നടത്തി വരുന്നു. 980 ഡോക്ടര്മാരെ മൂന്ന് മാസക്കാലയളവിലും നിയമിച്ചു. അഡ്ഹോക്ക് നിയമനവും നടത്തി. ഇതുകൂടാതെയാണ് ലാബുകളില് താത്ക്കാലിക ജീവനക്കാരെ നിയമിക്കുന്നത്. ഇതോടെ സ്ഥിരവും താത്ക്കാലികവുമായ 8379 ലധികം തസ്തികകളാണ് ഈ കാലയളവില് സൃഷ്ടിച്ചത്.
https://www.facebook.com/Malayalivartha