കണ്ണൂര്‍ മാടായി പഞ്ചായത്ത് പരിധിയില്‍ നിരീക്ഷണത്തിലിരിക്കെ മരിച്ച യുവാവിന് കോവിഡ് ഇല്ലെന്ന് സ്ഥിരീകരിച്ചു. മുട്ടം വെള്ളച്ചാല്‍ സ്വദേശിയും മാടായി വാടിക്കല്‍ കടവിന് സമീപത്തെ വാടക ക്വാര്‍ട്ടേഴ്‌സില്‍ താമസക്കാരനുമായ റിബിന്‍ ബാബുവിന്റെ (18) സ്രവ പരിശോധനയിലാണ് രോഗമില്ലെന്ന് കണ്ടെത്തിയത്. ഫലം നെഗറ്റിവ് ആയതിനാല്‍ മൃതദേഹം സംസ്‌കാരത്തിന് ബന്ധുക്കള്‍ക്ക് വിട്ടുകൊടുത്തു. തുടര്‍ന്ന് ചൊവ്വാഴ്ച ഉച്ചയോടെ വെങ്ങര സമുദായ ശ്മശാനത്തില്‍ സംസ്‌കരിച്ചു. ചെന്നൈയില്‍നിന്ന് മേയ് 21നാണ് റിബിന്‍ നാട്ടിലെത്തിയത്. മാടായി പുതിയങ്ങാടിയിലെ ക്വാറന്റീന്‍ സന്റെറില്‍ നിരീക്ഷണത്തിലായിരുന്നു.

ഇതിനിടെ ശനിയാഴ്ച പനിയും ഛര്‍ദിയും ഉണ്ടായതിനെ തുടര്‍ന്ന് പരിയാരത്തെ കണ്ണൂര്‍ ഗവ. മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇവിടെ ചികിത്സയിലിരിക്കെ ഞായറാഴ്ചയായിരുന്നു മരണം. നിരീക്ഷണ കേന്ദ്രത്തില്‍നിന്ന് ആശുപത്രിയില്‍ എത്തിയപ്പോള്‍ നടത്തിയ സ്രവ പരിശോധനയില്‍ ഫലം നെഗറ്റിവ് ആയിരുന്നുവെങ്കിലും മരണപ്പെട്ടതോടെ വീണ്ടും സ്രവ പരിശോധന നടത്തുകയായിരുന്നു. ഈ ഫലവും നെഗറ്റിവ് ആയി. ഹൃദയസംബന്ധമായ അസുഖങ്ങളുള്ള യുവാവിന് തലച്ചോറിലുള്ള അണുബാധയാണ് മരണകാരണമെന്നാണ് പരിയാരം മെഡിക്കല്‍ കോളജ് ആശുപത്രി അധികൃതരില്‍നിന്നുള്ള വിശദീകരണം.