ഏത് മഴക്കാലത്തും വെള്ളക്കെട്ട് ഒരുകാരണവശാലും ഉണ്ടാകാൻ പാടില്ലാത്ത നഗരമാണ് കൊച്ചി. കാരണം കൊച്ചിയിലെ മഴവെള്ളം എത്രയും പെട്ടെന്ന് തന്നെ കായലിൽ എത്തിച്ചേരാൻ സാധിക്കുന്ന തരത്തിൽ നിരവധി കനാലുകൾ കൊച്ചി നഗരത്തിന് ഹൃദയ ഭാഗങ്ങളിലൂടെ പതിറ്റാണ്ടുകൾക്ക് മുമ്പ് തന്നെ നിർമ്മിച്ചിരുന്നു. ഇടപ്പള്ളി കനാൽ, തേവര പേരാവൂർ കനാൽ, ചിലവന്നൂർ തോട്, തേവര കനാൽ, മാർക്കറ്റ് കനാൽ , മുല്ലശ്ശേരി കനാൽ, പാണ്ടിച്ചിറ തോട്, പഴ്ണി തോട്, മന്ത്ര കനാൽ, രാമേശ്വരം കനാൽ, പള്ളിച്ചൽ തോട് അങ്ങനെ പോകുന്നു കൊച്ചി നഗരത്തിലെ വെള്ളക്കെട്ട് ഉണ്ടാകാതിരിക്കാൻ പതിറ്റാണ്ടുകൾക്കപ്പുറം ശാസ്ത്രീയമായ രീതിയിൽ നിർമ്മിച്ച ആഴമേറിയ കനാലുകൾ. ഇതിൽ മുല്ലശേരി കനാലിന് 12 മീറ്റർ വീതിവരെയുള്ള സ്ഥലങ്ങൾ ഉണ്ട് ഏറ്റവും കുറവ് 4മീറ്ററും. എന്നാൽ പല ഇടത്തും ഇതിന്റെ പകുതിയോളം പോലുമില്ല. ഇങ്ങനെ കൊച്ചിയിലെ മിക്ക കനാലുകളും കൈയേറിയതാണ് ഒറ്റ മഴ പെയ്താൽ കൊച്ചിയെ വെള്ളത്തിനടിയിൽ ആക്കുന്നത്.

സെന്റർ ഫോർ കൺസ്യൂമർ എഡ്യൂക്കേഷൻ മാനേജിങ് ട്രസ്റ്റിയായ ജെയിംസ് വടക്കൻ കൊച്ചി കോർപ്പറേഷനിലെ വെള്ളക്കെട്ടിന് ശാശ്വത പരിഹാരം ആവശ്യപ്പെട്ട് കേരള ഹൈക്കോടതി നേരിട്ട് നിരീക്ഷിക്കുന്ന ഓപ്പറേഷൻ ബ്രേക്ക് ത്രൂ ഹർജിയിൽ ഉപ ഹർജി നൽകി. 2007ൽ താൻ മാനേജിങ് ട്രസ്റ്റി ആയ സെന്റർ ഫോർ കൺസ്യൂമർ എഡ്യൂക്കേഷൻ നൽകിയ റിട്ട് ഹർജി 2 അഭിഭാഷക കമ്മീഷണർമാരെ നിയമിച്ച് നാല്പതോളം റെയിൽവേ കോർപ്പറേഷൻ കൽവർട്ടുകളിലെ മലിനജലം നീക്കം നടത്തിയിരുന്നു.

അന്ന് മാലിന്യ ശുചീകരണത്തിൽ മേൽനോട്ടം വഹിച്ചിരുന്നത് സീനിയർ അഡ്വക്കേറ്റ് ആയിരുന്ന( അന്തരിച്ച ) ജേക്കബ് വർഗീസും അഭിഭാഷകനായ സഹസ്രനാമവും ആയിരുന്നു. 22 -1 -2007 അന്നത്തെ ചീഫ് ജസ്റ്റിസ് വി കെ ബാലിയും ജസ്റ്റിസ് രാമനും അടങ്ങുന്ന ഡിവിഷൻ ബെഞ്ച് അഭിഭാഷക കമ്മീഷൻ മാരെയും ഹർജിക്കാരായ സെന്റർ ഫോർ കൺസ്യൂമർ എജുക്കേഷൻ ഹർജിക്കാരൻ അഭിഭാഷകനായ ജോൺസൺ മനിയാനിയെയും മുക്തകണ്ഠം പ്രശംസിച്ചിരുന്നു. അതുകൂടാതെ ഇനി വെള്ളക്കെട്ടോ മറ്റ് പ്രശ്നങ്ങളോ ഉണ്ടായാൽ ഏതു സമയത്തും ഹർജിക്കാരന് ഹൈക്കോടതിയെ സമീപിക്കാൻ സ്വാതന്ത്ര്യവും നൽകിയിരുന്നു.

22- 10 -2019ലും കഴിഞ്ഞ 25 2020 ലും ഉണ്ടായ കടുത്ത മഴയിൽ എറണാകുളം സൗത്ത് ജംഗ്ഷൻ ഭാഗത്തും കടുത്ത വെള്ളക്കെട്ടിലായി. ഓടകളിൽ മാലിന്യം നീക്കാത്തതു കൊണ്ടും കാരിക്കാമുറി ചാവറ കൾച്ചറൽ സെന്റർ സമീപത്തുള്ള കനാലുകളിലെ മാലിന്യം നീക്കാത്തതും വെള്ളക്കെട്ടിന് പ്രധാനകാരണമെന്ന് ഹർജിക്കാരൻ ഹർജിയിൽ ആരോപിക്കുന്നു. ഓടയിലെ മാലിന്യവും അനധികൃത കയ്യേറ്റവും നീക്കണം എന്നാണ് ഹർജിക്കാരന്റെ ആവശ്യം. ഹർജിക്കാരൻ അഭിഭാഷകനായ ജോൺസൺ മനിയാനി വഴി സ്ഥലവാസിയായ മേട്ടേക്കാട്ട് ടി. കെ. ബാലചന്ദ്രനും ഇതേ ആവശ്യം ഉന്നയിച്ച് മറ്റൊരു ഹർജി നൽകിയിട്ടുണ്ട്. രണ്ടു ഹർജികളും ജസ്റ്റിസ് ദേവൻ രാമചന്ദ്രൻ 29- 5- 2020 ന് വാദം കേൾക്കും.