സര്ക്കാരിന് പൊങ്കാല; ശിവകാശി ഓലപ്പടക്കം ഉണ്ടാക്കുന്നവന് ബാലിസ്റ്റിക് മിസൈല് ഉണ്ടാക്കിയതോ; ബെവ്ക്യു എന്ന ആപ്പിന്റെ പ്രവര്ത്തനം ജനങ്ങളെ ബുദ്ധിമുട്ടിക്കുന്നതും നിലവാരമില്ലാത്തതുമാണെന്ന് ആക്ഷേപം
സംസ്ഥാനത്ത് മദ്യം വിതരണം ചെയ്യാനുള്ള ആപ്പ് നിര്മ്മിച്ച കമ്പനിക്കെതിരെ വന് പ്രതിഷേധം. ബെവ്ക്യു എന്ന ആപ്പിന്റെ പ്രവര്ത്തനം ജനങ്ങളെ ബുദ്ധിമുട്ടിക്കുന്നതും നിലവാരമില്ലാത്തതുമാണെന്നാണ് ആക്ഷേപം. ഇതോടെ ആപ്പ് നിര്മ്മാതാക്കളായ ഫെയര്കോഡ് കമ്പനിയുടെ ഫേസ്ബുക്ക് പേജില് വലിയ പ്രതിഷേധമാണ് അരങ്ങേറുന്നത്. ശിവകാശിയില് ഓലപ്പടക്കമുണ്ടാക്കുന്നവനെ ബാലിസ്റ്റിക് മിസൈല് ഉണ്ടാക്കാന് ഏര്പ്പാടാക്കിയ പോലെയായി കാര്യങ്ങളെന്നാണ് പരിഹാസം ഉയരുന്നത്.
രജിസ്റ്റര് ചെയ്ത് ബുക്ക് ചെയ്തതിനു ശേഷം കൃത്യമായി ഓടിപി വരാത്തതാണ് ഉപഭോക്താക്കളെ ബുദ്ധിമുട്ടിക്കുന്നത്. ചിലര്ക്ക് കിലോമീറ്ററുകള് ദൂരത്തെ മദ്യശാലയിലാണ് ടോക്കണ് ലഭിച്ചതെന്നും ആരോപണം ഉയരുന്നുണ്ട്. രജിസ്റ്റര് ചെയ്യാന് കാത്തിരുന്ന് ജിയോ അനുവദിച്ച ഡേറ്റ തീര്ന്നുപോയെന്ന കമന്റുകളും കാണാം. പാട്ടി അനുഭാവികളും കമന്റിട്ട് പ്രതിഷേധിക്കുന്നുണ്ട്. സിപിഎം സൈബര് തൊഴിലാളികളുടെ കമ്പനിയായ ഫെയര്കോഡിനാണ് സര്ക്കാര് ആപ്പുണ്ടാക്കാനുള്ള കരാര് നല്കിയത്. സാമൂഹ്യ മാദ്ധ്യമങ്ങളില് പാര്ട്ടിയെ പിന്തുണയ്ക്കുന്നവരും പാര്ട്ടിയുടെ പ്രവര്ത്തകരുമാണ് കമ്പനിയുടെ ഡയറക്ടര്മാര്. ഫെയര് കോഡ് കമ്പനിക്ക് ആപ്പ് നിര്മ്മിക്കാനുള്ള അനുമതി നല്കിയത് ചട്ടം ലംഘിച്ചാണെന്ന ആരോപണം നേരത്തെ ഉയര്ന്നു കഴിഞ്ഞിരുന്നു. പ്രതിപക്ഷവും ഇതിനെതിരെ പ്രതിഷേധവുമായി രംഗത്തെത്തിയിട്ടുണ്ട്. അതിനിടയില് ആപ്പ് നിലവാരമില്ലാത്തതുമായതോടെ നിര്മ്മിക്കാനുള്ള കമ്പനിയെ തെരഞ്ഞെടുത്തതിന്റെ മാനദണ്ഡം എന്താണെന്നാണ് ചോദ്യം ഉയരുന്നത്.
പാലക്കാട് സ്വദേശിയും സിപിഎം സൈബര് തൊഴിലാളിയുമായ രജിത് രാമചന്ദ്രന് ഡയറക്ടറായ കമ്പനിയാണ് ഫെയര് കോഡ്. കഴിഞ്ഞ വര്ഷം ആരംഭിച്ച സ്റ്റാര്ട്ടപ്പ് കമ്പനിയാണിത്. ഇയാള്ക്കൊപ്പമുള്ള മറ്റ് ഡയറക്ടര്മാരും പാര്ട്ടി അനുഭാവികളാണെന്ന് സൂചനയുണ്ട്. പിണറായി സര്ക്കാര് അധികാരമേറ്റതിനു ശേഷം സൈബര് മേഖലയിലെ കുഴലൂത്തുകാരെല്ലാം സ്റ്റാര്ട്ടപ്പ് കമ്പനി തുടങ്ങുകയും അതിന് ഐടീയുമായി ബന്ധപ്പെട്ട കരാറുകള് കിട്ടുന്നതും ഇപ്പോള് സ്ഥിരം സംഭവമായിട്ടുണ്ടെന്നാണ് ആരോപണം ഉയര്ന്നത്.
നേരത്തെ സോഷ്യല് മീഡിയയില് സര്ക്കാരിന്റെ പ്രവര്ത്തനങ്ങളെക്കുറിച്ച് പ്രചാരണം നടത്താന് ലക്ഷക്കണക്കിന് രൂപ നല്കിയ ഗ്ലോബല് ഇന്നോവേറ്റീവ് ടെക്നോളജീസ് എന്ന കമ്പനി കോഴിക്കോട് ജില്ലാ സെക്രട്ടറി പി. മോഹനന്റെ മകന് ബന്ധമുള്ള കമ്പനിയാണ്. ഇത് വലിയ വിവാദമായിരുന്നു. ഇതുപോലെ തന്നെയുള്ള മറ്റൊരു അഴിമതിയാണ് മദ്യക്യൂവിനുള്ള ആപ്പ് നിര്മ്മിക്കാനുള്ള കരാര് എന്നാണ് ആരോപണം.
https://www.facebook.com/Malayalivartha