സംസ്ഥാനത്ത് വരും ദിവസങ്ങളിള്‍ കാലവര്‍ഷം ശക്തമായി തുടരുമെന്ന് കാലാവസ്ഥ നിരീക്ഷണകേന്ദ്രം മുന്നറിയിപ്പ് നല്‍കി. ബുധനാഴ്ച മുതല്‍ വെള്ളിയാഴ്ച വരെ ഒറ്റപ്പെട്ട പ്രദേശങ്ങളില്‍ കനത്തതോ അത്യന്തം കനത്തതോ ആയ മഴയ്ക്ക് സാധ്യതയുണ്ടെന്നും അറിയിച്ചു . 24 മണിക്കൂറില്‍ ഏഴു മുതല്‍ 20 വരെ സെന്റിമീറ്റര്‍ അതിശക്തമായ മഴയ്ക്കാണ് സാധ്യത. ഇതു കണക്കിലെടുത്ത് കോട്ടയം, എറണാകുളം, ഇടുക്കി, മലപ്പുറം, കോഴിക്കോട്, കണ്ണൂര്‍, കാസര്‍ഗോഡ് ജില്ലകളില്‍ ബുധനാഴ്ചയും പാലക്കാട്, വയനാട് ഒഴികെയുള്ള ജില്ലകളില്‍ വ്യാഴം, വെള്ളി ദിവസങ്ങളിലും യെല്ലോ അലര്‍ട്ട് പ്രഖ്യാപിച്ചു .

അതിതീവ്ര മഴയ്ക്കു സാധ്യതയുള്ളതിനാല്‍ ഇടുക്കി ജില്ലയില്‍ വെള്ളിയാഴ്ച ഓറഞ്ച് അലര്‍ട്ടും പ്രഖ്യാപിച്ചിട്ടുണ്ട് . കാലവര്‍ഷം മൂന്നാഴ്ച പിന്നിടുമ്പോള്‍ സംസ്ഥാനത്ത് 10 ശതമാനം മഴക്കുറവാണ് ഇന്നലെ വരെ രേഖപ്പെടുത്തിയിട്ടുള്ളത് . 46.31 സെന്റിമീറ്റര്‍ മഴയാണ് ഇന്നലെ വരെ സംസ്ഥാനത്തു പെയ്യേണ്ടിയിരുന്നത് .
എന്നാല്‍ പെയ്തത് 41.86 സെന്റിമീറ്ററാണ്. ഇക്കാലയളവില്‍ സംസ്ഥാനത്ത് ഏറ്റവും കൂടുതല്‍ മഴ പെയ്തത് കോഴിക്കോട് ജില്ലയിലാണ്, 55 ശതമാനം അധിക മഴ . കണ്ണൂര്‍ ജില്ലയില്‍ 34 ശതമാനവും തിരുവനന്തപുരത്ത് 28 ശതമാനവും കാസര്‍ഗോഡ് അഞ്ചു ശതമാനവും അധിക മഴ പെയതെന്നാണ് കണക്കുകള്‍.