കണ്ണൂരിലെ ഇരിട്ടി നഗരത്തില്‍ കൊറോണ മാനദണ്ഡങ്ങളും ട്രാഫിക് നിയമങ്ങളും പാലിക്കാത്തവര്‍ക്കെതിരെ കര്‍ശന നടപടിയുമായി പൊലീസ്. സാമൂഹിക അകലം പാലിക്കാത്തതിന് 20 വ്യാപാര സ്ഥാപനങ്ങള്‍ക്ക് താക്കീത് നല്‍കി. അനധികൃത പാര്‍ക്കിങിന് നൂറിലധികം വാഹന ഉടമകള്‍ക്ക് മുന്നറിയിപ്പ് നല്‍കി. അനധികൃത പാര്‍ക്കിങ്ങിന് 15 പേര്‍ക്കെതിരെയും മാസ്‌ക് ധരിക്കാത്തതിന് 5 പേര്‍ക്കെതിരെയും കേസെടുത്തു. മുന്നറിയിപ്പ് നല്‍കിയിട്ടും നിയമ ലംഘനം നടത്തിയവര്‍ക്കെതിരെ കേസെടുത്തു.

ജനം ബസ് കാത്തിരിപ്പു കേന്ദ്രത്തിനു പുറത്ത് മഴയത്ത് ബസ് കാത്തു നില്‍ക്കുന്നത് പരിശോധനയില്‍ കണ്ടെത്തിയ പോലീസ് ബസ് കാത്തിരിപ്പു കേന്ദ്രത്തിനുള്ളിലെ ഇരുചക്ര വാഹനം മാറ്റാനാവശ്യപ്പെട്ടു. പുതിയ ബസ് സ്റ്റാന്‍ഡിനുള്ളിലെ ബസ് കാത്തിരിപ്പു കേന്ദ്രത്തിനുള്ളില്‍ ഇരു ചക്ര വാഹനങ്ങള്‍ പാര്‍ക്ക് ചെയ്തിരിക്കുന്നതിനാലാണ് ജനത്തിന് പുറത്തുനില്‍ക്കേണ്ടി വന്നത്. ഇരുചക്ര വാഹനം മാറ്റാനാവശ്യപ്പെട്ട പൊലീസുമായി ഒരു യുവാവ് വാഗ്വാദത്തിലും ഏര്‍പ്പെട്ടു. പ്രധാന നിരത്തിലും ബസ് സ്റ്റാന്‍ഡ് അപ്രോച്ച് റോഡിലും തലങ്ങും വിലങ്ങും അപകടമുണ്ടാക്കുന്ന വിധത്തില്‍ പാര്‍ക്ക് ചെയ്തിരുന്ന വാഹനങ്ങളും പൊലീസ് നീക്കി.

ഇരിട്ടി നഗരസഭാ സുരക്ഷാ സമിതി ,ഇളവുകള്‍ നല്‍കി നഗരം തുറക്കാന്‍ അനുവാദം നല്‍കിയപ്പോള്‍ അനധികൃതമായി പാര്‍ക്ക് ചെയ്യരുതെന്നും സാമുഹിക അകലം പാലിക്കണമെന്നും കര്‍ശനമായി നിര്‍ദേശിച്ചിരുന്നു. അനധികൃത പാര്‍ക്കിംഗ് ഒഴിവാക്കാന്‍ നഗരസഭയുടെ ടൗണിലെ ഓപ്പണ്‍ ഓഡിറ്റോറിയം 1 മാസത്തേക്ക് പേ പാര്‍ക്കിങ്ങ് കേന്ദ്രമായും അനുവദിച്ചിരുന്നു. നിലവിലുള്ള പേ പാര്‍ക്കിങ്ങ് സൗകര്യത്തിനു പുറമെയാണിത്.

ഇവിടങ്ങളില്‍ വാഹനം പേ ചെയ്യാതെയാണ് നോ പാര്‍ക്കിങ്ങ് ബോര്‍ഡിന്റെ കീഴില്‍ പോലും കൊണ്ടുവന്നിടുന്നത്. എസ്‌ഐമാരായ ദിനേശന്‍ കൊതേരി, വി.ജെ.ജോസഫ്, റജി സ്‌കറിയ എന്നിവരുടെ നേതൃത്വത്തില്‍ 3 സംഘങ്ങളായാണ് നഗരത്തില്‍ പരിശോധന നടത്തിയത്. നിയമം പാലിക്കാത്തവര്‍ക്കെതിരെ പരമാവധി നടപടി ഉറപ്പു വരുത്തുന്ന രീതിയില്‍ കേസ് എടുക്കും. സാമുഹിക അകലം ഉറപ്പാക്കിയില്ലെങ്കില്‍ പകര്‍ച്ച വ്യാധി നിയന്ത്രണ നിയമ പ്രകാരവും കേസെടുക്കും. പയഞ്ചേരിയില്‍ 100 മീറ്റര്‍ ചുറ്റളവില്‍ കണ്ടെയ്ന്‍മെന്റ് സോണില്‍ പരിശോധനയ്ക്കായി ബൈക്ക് പെട്രോള്‍ ടീമിനെയും നിയോഗിച്ചു.