തലസ്ഥാനത്ത് സമൂഹവ്യാപനമോ എന്നുള്ള ചോദ്യത്തിന് ഇല്ല എന്നുള്ള ഒരു ഉത്തരം ഒരിക്കലും പറയാന്‍ കഴിയില്ല. അത്രമേല്‍ ഗുരുതരമാണ് നിലവിലെ സ്ഥിതിഗതികള്‍. ഉറവിടമില്ലാത്ത കേസുകള്‍ വര്‍ധിക്കുകയാണ്. ഈ സാഹചര്യത്തില്‍ തിരുവനന്തപുരത്ത് ഇന്ന് മുതല്‍ നിയന്ത്രണങ്ങള്‍ ശക്തമാകുമെന്ന മുന്നറിയിപ്പാണ് സംസ്ഥാന സര്‍ക്കാര്‍ നല്‍കുന്നത്. സമൂഹവ്യാപനം തടയാന്‍ ജില്ലാ അതിര്‍ത്തികളിലും തീരപ്രദേശങ്ങളിലും പരിശോധന വര്‍ധിപ്പിക്കും. സ്ഥിതി വിലയിരുത്താന്‍ വിഡിയോ കോണ്‍ഫറന്‍സിലൂടെ ഇന്ന് തദ്ദേശസ്ഥാപനങ്ങളുടെ യോഗവും വിളിച്ചിട്ടുണ്ട്.

പുതിയ നിയന്ത്രണങ്ങളുടെ പശ്ചാത്തലത്തില്‍ ജില്ലയിലെ പ്രധാനചന്തകളില്‍ അന്‍പത് ശതമാനം കടകള്‍ മാത്രമേ തുറക്കുകയുള്ളൂ. ഓട്ടോയിലും ടാക്സിയിലും യാത്ര ചെയ്യുന്നവര്‍ വണ്ടിയുടെ നമ്പറും ഡ്രൈവറുടെ പേരും കുറിച്ചെടുക്കണം. നഗരസഭയില്‍ പരാതിയുമായി വരുന്നവര്‍ക്കും, ആശുപത്രികളില്‍ സന്ദര്‍ശകര്‍ക്കും വിവാഹ മരണാനന്തര ചടങ്ങുകള്‍ക്കും നിയന്ത്രണം ഉണ്ട്.

മണക്കാട് സ്വദേശിയായ ഓട്ടോ ഡ്രൈവര്‍ക്ക് പിന്നാലെ മെഡിക്കല്‍ കോളേജ് ആശുപത്രിയിലെ സുരക്ഷാ ജീവനക്കാരനും ഇന്നലെ കോവിഡ് സ്ഥിരീകരിച്ചതോടെ തിരുവനന്തപുരം നഗരം സാമൂഹികവ്യാപനം നടന്നോ എന്ന ആശങ്കയിലാണ്. നേരത്തെ രോഗം സ്ഥിരീകരിച്ച ഓട്ടോറിക്ഷാ ഡ്രൈവര്‍ രോഗലക്ഷണം വന്നതിനും ശേഷവും നഗരത്തില്‍ പലയിടത്തും കറങ്ങിയതും സീരിയല്‍ ഷൂട്ടിംഗിനടക്കം പോയതും സ്ഥിതി വഷളാക്കി.

തിരുവനന്തപുരം നഗരത്തിലെ സാഹചര്യം ഗൗരവകരമാണെന്ന് പൊലീസ് സ്പെഷ്യല്‍ ബ്രാഞ്ചും സര്‍ക്കാരിന് റിപ്പോര്‍ട്ട് നല്‍കിയതോടെയാണ് കടുത്ത നിയന്ത്രണങ്ങളേര്‍പ്പെടുത്താന്‍ സര്‍ക്കാര്‍ തീരുമാനിച്ചത്. ചെന്നൈയും ദില്ലിയും മുംബൈയും പോലെ തിരുവനന്തപുരത്തേയും രോ?ഗവ്യാപനകേന്ദ്രമാക്കാന്‍ ചിലര്‍ ബോധപൂര്‍വ്വം ശ്രമിക്കുന്നതായുള്ള മന്ത്രി കടകംപള്ളി സുരേന്ദ്രന്റെ പ്രസ്താവനയും വലിയ ചര്‍ച്ചയായിരുന്നു.

ലോകത്തെയൊട്ടാകെയും ആശങ്കയിലാഴ്ത്തിക്കൊണ്ട് കടന്നുവന്ന കൊറോണ വൈറസ് എന്ന രോഗകാരിയുടെ ആക്രമണം തുടരുക തന്നെയാണെന്ന് വ്യക്തമാക്കി ലോകാരോഗ്യ സംഘടന. ഇന്ത്യയുള്‍പ്പെടെ പല രാജ്യങ്ങളിലും പ്രതിരോധ നടപടിയെന്നോണം ഏര്‍പ്പെടുത്തിയ ലോക്ഡൗണ്‍ അടക്കമുള്ള നിയന്ത്രണങ്ങള്‍ പിന്‍വലിക്കപ്പെടുമ്പോള്‍ ജാഗ്രത കൈവിടരുതെന്നാണ് വിദഗ്ധര്‍ നല്‍കുന്ന മുന്നറിയിപ്പ്. 'കൊവിഡ് 19 എന്ന മഹാമാരിയുടെ യാത്ര മുന്നോട്ട് തന്നെയാണ്. ആരോഗ്യരംഗം നേരിടുന്ന പ്രതിസന്ധി എന്നതില്‍ക്കവിഞ്ഞ് സാമൂഹികവും സാമ്പത്തികവും രാഷ്ട്രീയവുമായ പ്രതിസന്ധികളിലേക്കാണ് കൊറോണ വൈറസ് മഹാമാരി നമ്മളെ നയിക്കുന്നത്. ദശാബ്ദങ്ങളോളം ഇതിന്റെ പരിണിതഫലങ്ങള്‍ നമ്മള്‍ നേരിടേണ്ടിവരും...'- ലോകാരോഗ്യ സംഘടന ഡയറക്ടര്‍ ജനറല്‍ ഡോ. ടെഡ്രോസ് അദാനോം പറയുന്നു.

ഇതുവരെ 4,65,000 പേര്‍ക്കാണ് കൊവിഡ് 19 മൂലം ജീവന്‍ നഷ്ടമായിരിക്കുന്നത്. വിവിധ രാജ്യങ്ങളിലായി 90 ലക്ഷം പേരെ രോഗം ബാധിച്ചു. ഓരോ രാജ്യങ്ങളും ഓരോ ശക്തിയായി ഒറ്റപ്പെട്ട് നിന്ന് പോരാടുന്നതിന് പകരം ലോകം ഒരുമിച്ച് നിന്നാണ് ഈ ആപത്ഘട്ടം അഭിമുഖീകരിക്കേണ്ടതെന്നും ഡോ. ടെഡ്രോസ് അദാനോം ഓര്‍മ്മിപ്പിക്കുന്നു. കൊവിഡിനെ രാഷ്ട്രീയവത്കരിക്കുന്നത് വലിയ തീവ്രതയുള്ള അപകടമാണെന്നും പല രാജ്യങ്ങളും നിലവില്‍ ഇതുമൂലം ദുരവസ്ഥയിലായിട്ടുണ്ടെന്നും അദ്ദേഹം ചൂണ്ടിക്കാട്ടുന്നു