സ്വര്‍ണക്കടത്തു കേസില്‍ പെട്ട് എം. ശിവശങ്കറെ വെളുപ്പാന്‍ കാലത്തോളം കസ്റ്റംസ് ചോദ്യം ചെയ്യുമ്പോള്‍ മലയാളികളുടെ മനസില്‍ ഓടിയെത്തുന്ന ഒരാളാണ് ജനപ്രിയ താരം ദിലീപ്. കൊച്ചിയില്‍ നടി ആക്രമിക്കപ്പെട്ട കേസില്‍ തന്റെ ഭാഗം ന്യായീകരിച്ച് ന്യായീകരിച്ച് എല്ലാവരും ദിലീപിന്റെ പക്ഷത്തായിരിക്കെയാണ് മാരത്തോണ്‍ ചോദ്യം ചെയ്യല്‍ നടന്നത്. ചോദ്യം ചെയ്യല്‍ പാതിരാത്രി വരെ നീണ്ടപ്പോള്‍ നടന്‍ സിദ്ധിക്ക് ഉള്‍പ്പെടെയുള്ളവര്‍ സ്ഥലത്തെത്തി രംഗം കൊഴുപ്പിച്ചു. അവസാനം ഉന്നത തലത്തിലിടപെട്ട് അന്ന് ദിലീപിനെ മോചിപ്പിച്ചുവെങ്കിലും അധികം വൈകാതെ ദിലീപ് കുടുങ്ങി. ഇതുപോലെയാണ് ശിവശങ്കറെ കഴിഞ്ഞ ദിവസം ചോദ്യം ചെയ്തത്. വെളുക്കുവോളം ചോദ്യം ചെയ്‌തെങ്കിലും അവസാനം വിട്ടയച്ചു. എന്നാല്‍ കൂടുതല്‍ കുരുക്ക് മുറുകുകയും ചെയ്യുന്നു. ശിവശങ്കറെ വീണ്ടും ചോദ്യം ചെയ്യേണ്ടി വരുമെന്നാണ് കസ്റ്റംസുകാര്‍ പറയുന്നത്.

ശിവശങ്കറിന്റെ ഫ്‌ളാറ്റ് കേന്ദ്രീകരിച്ചുള്ള അന്വേഷണമാണ് ശിവശങ്കറെ കുടുക്കിയത്. അതിനാലാണ് വീണ്ടും ഫ്‌ളാറ്റ് പരിശോധിച്ചത്. സ്വപ്ന തിരുവനന്തപുരം വിടുന്നതിന് മുമ്പ് ഈ ടവര്‍ ലൊക്കേഷന്‍ കേന്ദ്രീകരിച്ചാണുള്ളത്. അതിന് ശേഷം പൂജപ്പുരയും കാണിക്കുന്നുണ്ട്. രണ്ടര മണിക്കൂറോളം സ്വപ്ന ഈ ഫ്‌ളാറ്റിലുണ്ടായിരുന്നു എന്നാണ് ടവര്‍ ലൊക്കേഷന്‍ കാണിക്കുന്നത്. ഇതോടൊപ്പം ഫ്‌ളാറ്റിന് മുമ്പുള്ള ഫൈവ് സ്റ്റാര്‍ ഹോട്ടല്‍ കേന്ദ്രീകരിച്ചും അന്വേഷണം നടക്കുന്നുണ്ട്.

അതേസമയം സ്വര്‍ണക്കടത്തു കേസ് പ്രതികളുമായി എം. ശിവശങ്കറിനുള്ള ബന്ധത്തെ സൗഹൃദം മാത്രമായി ഒതുക്കാനാകില്ലെന്ന വിലയിരുത്തലിലാണ് അന്വേഷണ ഏജന്‍സികള്‍ തുടര്‍നീക്കം നടത്തുന്നത്. സ്വപ്നയെയും സരിത്തിനെയും സന്ദീപ് നായരെയും ചോദ്യം ചെയ്തു പരമാവധി തെളിവുകളിലേക്കു പോകുന്നതിലാണ് എന്‍ഐഎ നിലവില്‍ ശ്രദ്ധിക്കുന്നത്. എം.ശിവശങ്കറിലേക്ക് എന്‍ഐഎ അന്വേഷണം കടന്നിട്ടില്ലെന്നാണ് അന്വേഷണ സംഘം നല്‍കുന്ന സൂചന. അതിനു മുന്‍പു കസ്റ്റംസിന്റെ നടപടികള്‍ പൂര്‍ത്തിയാക്കും.

സന്ദീപ് നായരാണ് ഈ സംഘത്തിലെ സുപ്രധാന കണ്ണിയെന്ന രീതിയിലാണ് എന്‍ഐഎ അന്വേഷണം പോകുന്നത്. കൊടുവള്ളി സംഘമുള്‍പ്പെടെ കേരളത്തിലെ ശക്തമായ കള്ളക്കടത്തു സംഘങ്ങളുമായെല്ലാം സന്ദീപിനു വര്‍ഷങ്ങള്‍ നീണ്ട ബന്ധമുണ്ട്. സ്വപ്നയുടെ സുഹൃത്തെന്ന നിലയില്‍ മാത്രമാണു സന്ദീപിനെ അറിയുന്നതെന്നാണു ശിവശങ്കര്‍ ചോദ്യങ്ങളോടു പ്രതികരിച്ചത്. ഈ മൊഴിക്കു വിരുദ്ധമായി ഇവര്‍ തമ്മിലുള്ള അടുപ്പം തെളിയിക്കുന്ന ഫോട്ടോകളോ ഫോണ്‍ വിളികളോ കണ്ടെത്താനായാല്‍ ശിവശങ്കറിനു മേലുള്ള പിടിമുറുകും. അതിലേക്കാണ് എന്‍ഐഎ അന്വേഷണം.

ഹോട്ടലുകളിലും ഫ്‌ളാറ്റിലും പ്രതികള്‍ക്കൊപ്പം ഉണ്ടായിരുന്നതും ഇവര്‍ക്കു ഫ്‌ളാറ്റ് എടുത്തു നല്‍കിയതുമൊക്കെ ശിവശങ്കറിനെതിരെ നിര്‍ണായകമാകുമെങ്കിലും എന്‍ഐഎ ശക്തമായ തെളിവാണു തേടുന്നത്. സ്വര്‍ണം ദുബായില്‍ നിന്ന് ഇങ്ങോട്ടു കയറ്റി അയച്ച ശേഷം പ്രതികളുടെയും ശിവശങ്കറിന്റെയും യാത്രകളും ഫോണ്‍വിളികളും പരിശോധിക്കുകയാണ് അന്വേഷണ സംഘം. അതിനു ശേഷം എല്ലാവരും കൂടിക്കാഴ്ച നടത്തിയോ, ശിവശങ്കറിന്റെ ഫ്‌ളാറ്റില്‍ ഈ സമയം ആരൊക്കെയെത്തി എന്നതും പരിശോധിക്കുന്നുണ്ട്. ശിവശങ്കര്‍ ഉപയോഗിക്കുന്ന വാഹനങ്ങളുടെ യാത്രാരേഖകളും പരിശോധിക്കുന്നുണ്ട്.

സന്ദീപും സ്വപ്നയും സരിത്തും ഈ ഓപ്പറേഷനു വേണ്ടി മാത്രം പുതിയ സിം കാര്‍ഡുകള്‍ തരപ്പെടുത്തിയെന്നും സംശയിക്കുന്നു. അവസാനം രക്ഷപെടും മുന്‍പ് സ്വപ്ന നടത്തിയ ഫോണ്‍ വിളികളും പരിശോധിക്കുന്നു. സ്വിച്ച് ഓഫ് ചെയ്തു തിരുവനന്തപുരം നഗരം വിടും മുന്‍പു പൂജപ്പുര ഭാഗത്തായിരുന്നു ഇവരുടെ ഫോണിന്റെ ടവര്‍ ലൊക്കേഷന്‍ എന്നാണു വിവരം. എന്തായാലും ശിവശങ്കറെ സംബന്ധിച്ചുള്ള നിര്‍ണായക ദിനങ്ങളാണ് കടന്ന് പോകുന്നത്.