സ്വപ്ന കൊട്ടാരങ്ങള്‍ തകരുമ്പോള്‍... ഒരിക്കലും തെളിയില്ലെന്ന് കരുതിയ ബാലഭാസ്‌കറിന്റെ മരണത്തിന്റെ സംശയങ്ങള്‍ ഒന്നൊന്നായി പുറത്ത് വരുമ്പോള്‍ സിബിഐയ്ക്ക് ജോലിയെളുപ്പം; അന്നും ഇന്നും ബാലഭാസ്‌കറിന്റെ ജീവനായി ഉറച്ച നിലപാടുമായി കലാഭവന്‍ സോബി
വയലിനിസ്റ്റ് ബാലഭാസക്‌റിന്റെയും മകള്‍ തേജസ്വിനിയുടെയും മരണം മലയാളികള്‍ അത്രപെട്ടന്നൊന്നും മറക്കില്ല. ഒരു പക്ഷെ മരണ ശേഷം ഇത്രയും നെഞ്ചിലേറ്റിയ മറ്റൊരു കലാകാരന്‍ ഉണ്ടെന്നു തന്നെ വരില്ല. അത്രയ്ക്കാണ് അദ്ദേഹം സമ്മാനിച്ച വയലിന്‍ അനുഭവങ്ങള്‍. ദേശീയപാതയില്‍ പള്ളിപ്പുറം സി.ആര്‍.പി.എഫ് ക്യാമ്പിന് സമീപത്ത് വച്ച് 2018 സെപ്തംബര്‍ 25ന് പുലര്‍ച്ചെയാണ് ബാലഭാസ്‌കറിന്റെ കാര്‍ അപകടത്തില്‍പെട്ടത്. അപകടം നടന്ന് രണ്ട് വര്‍ഷം കഴിയുമ്പോള്‍ സിബിഐ എത്തുന്നതോടെ എല്ലാം പകല്‍ പോലെ വ്യക്തമാകുകയാണ്. സ്വര്‍ണക്കടത്ത് കേസിന് പുറകേയും ബാലഭാസ്‌കറുമായി ബന്ധപ്പെട്ട പല കാര്യങ്ങളാണ് പുറത്ത് വരുന്നത്. അതിലേറ്റവും പ്രധാനമാണ് നടന്‍ കലാഭവന്‍ സോബിന്റെ തുറന്ന് പറച്ചില്‍
അപകട സമയത്ത് സ്വര്‍ണക്കടത്ത് കേസിലെ ഒന്നാംപ്രതിയായ പി.എസ്.സരിത്തിനെ സംഭവ സ്ഥലത്ത് കണ്ടതായി അന്നും കലാഭവന്‍ സോബിന്‍ പറഞ്ഞിട്ടും ആരും സൗകര്യപൂര്‍വം മൈന്‍ഡ് ചെയ്തില്ല. എന്നാല്‍ ഇപ്പോള്‍ സോബിന്‍ പറഞ്ഞതിലേക്കാണ് കാര്യങ്ങള്‍ പോകുന്നത്. വീണ്ടും വെളിപ്പെടുത്തല്‍ നടത്തുകയാണ് സോബിന്‍.
അപകടം നടന്ന് അഞ്ച് മിനിട്ടിന് ശേഷമാണ് താന്‍ പള്ളിപ്പുറത്ത് എത്തിയതെന്നാണ് സോബിന്‍ പറയുന്നത്. മറ്റൊരിടത്തേക്ക് പോകുന്ന വഴിയായിരുന്നു. കാര്‍ മരത്തില്‍ ഇടിച്ചത് കണ്ട് ഇറങ്ങിനോക്കി. അപ്പോള്‍ അസ്വാഭാവിക സാഹചര്യത്തില്‍ ചിലരെ അവിടെ കണ്ടു. ഒരാള്‍ സംഭവസ്ഥലത്ത് നിന്ന് ഓടിപ്പോകുന്നതും മറ്റൊരാള്‍ ബൈക്ക് ഉരുട്ടി മാറ്റുന്നതുമാണ് കണ്ടത്. മറ്റൊരാള്‍ തികച്ചും സൈലന്റായി അവിടെ നില്‍പുണ്ടായിരുന്നു. ചുവപ്പില്‍ നീല വരയുള്ള ടീഷര്‍ട്ടും ബര്‍മുഡയുമാണ് അയാള്‍ ധരിച്ചിരുന്നത്. യാതൊരു ഭാവഭേദവും ഇല്ലാതെ നില്‍ക്കുന്നതിനാല്‍ തന്നെ അയാളുടെ മുഖം ഓര്‍മ്മയിലുണ്ട്. വിമാനത്താവളം വഴിയുള്ള സ്വര്‍ണക്കടത്ത് കേസില്‍ സരിത്ത് അറസ്റ്റിലായതിന് പിന്നാലെ ചിത്രങ്ങള്‍ ചാനലുകളിലും മറ്റും വന്നപ്പോഴാണ് കാറപകട സ്ഥലത്ത് കണ്ടത് സരിത്താണെന്ന് മനസിലായത്. ഇക്കാര്യം കേസ് അന്വേഷിച്ച ക്രൈംബ്രാഞ്ചിനെ അറിയിച്ചിരുന്നു. പക്ഷേ, അവര്‍ പിന്നീട് തന്നെ ബന്ധപ്പെട്ടില്ല.കേസ് സി.ബി.ഐ ഏറ്റെടുത്തത് അറിഞ്ഞു.
അന്വേഷണത്തില്‍ സത്യം പുറത്തുവരുമെന്നാണ് കരുതുന്നത്. ചോദ്യം ചെയ്യലിനായി സി.ബി.ഐ വിളിപ്പിച്ചാല്‍ അറിയാവുന്ന കാര്യങ്ങള്‍ തുറന്നു പറയുമെന്നും സോബി പറഞ്ഞു. സരിത്തിനെ കണ്ടെന്ന വെളിപ്പെടുത്തലിന് പിന്നാലെ തന്റെ നാളുകള്‍ എണ്ണപ്പെട്ടുവെന്നും സി.ബി.ഐയ്ക്ക് മൊഴി കൊടുക്കാന്‍ താന്‍ ഉണ്ടാവില്ലെന്ന് ചിലര്‍ ഭീഷണിപ്പെടുത്തിയതായും സോബി പറഞ്ഞു.
അതേസമയം ബാലഭാസ്‌കറിന്റെ മരണത്തില്‍ ദുരൂഹതയില്ലെന്നാണ് ക്രൈംബ്രാഞ്ച് റിപ്പോര്‍ട്ട് നല്‍കിയത്. ഫോറന്‍സിക് പരിശോധന മുതല്‍ അപകടത്തിന്റെ പുനരാവിഷ്‌കാരം വരെ നടത്തിയാണ് ക്രൈംബ്രാഞ്ച് ഈ നിഗമനത്തിലെത്തിയത്. സോബിയുടെ മൊഴി ശരിയല്ലെന്ന നിഗമനത്തിലാണ് ക്രൈംബ്രാഞ്ച് എത്തിയത്. മാത്രമല്ല, സോബിയുടെ മൊഴി തെളിയിക്കാനുള്ള തെളിവുകള്‍ ഒന്നുംതന്നെ കിട്ടിയില്ലെന്നും ക്രൈംബ്രാഞ്ച് വ്യക്തമാക്കി. കാറോടിച്ചിരുന്നത് അര്‍ജ്ജുന്‍ ആണെന്നും ക്രൈംബ്രാഞ്ച് കണ്ടെത്തി.ഇതില്‍ സംശയം ശക്തമായതോടെയാണ് അന്വേഷണം സിബിഐയ്ക്ക് വിട്ടത്.
അപകടക്കേസ് സി.ബി.ഐ അന്വേഷിക്കാന്‍ കഴിഞ്ഞ ഡിസംബര്‍ അഞ്ചിനാണ് സംസ്ഥാന സര്‍ക്കാര്‍ വിജ്ഞാപനമിറക്കിയത്. ഏഴുമാസം തീരുമാനമുണ്ടായില്ല. സ്വര്‍ണക്കടത്ത് കേസ് സജീവമായതിനു പിന്നാലെ, കഴിഞ്ഞ ഒമ്പതിന് അപകടമരണവും അതുമായി ബന്ധപ്പെട്ട് ഉന്നയിക്കപ്പെടുന്ന ദുരൂഹതകളും ആരോപണങ്ങളും അന്വേഷിക്കാന്‍ കേന്ദ്രം ഉത്തരവിറക്കുകയായിരുന്നു. ഡിവൈ.എസ്.പി ടി.പി.അനന്തകൃഷ്ണന്റെ പ്രത്യേക സംഘവും രൂപീകരിച്ചു.എഫ്.ഐ.ആര്‍ സമര്‍പ്പിച്ചുഅപകടത്തില്‍ ബാലഭാസ്‌കറിന്റെ ഡ്രൈവര്‍ അര്‍ജ്ജുന്‍ കെ.നാരായണനെ പ്രതിയാക്കി സി.ബി.ഐ പ്രാഥമിക അന്വേഷണ റിപ്പോര്‍ട്ട് കോടതിയില്‍ സമര്‍പ്പിച്ചു.
2018 സെപ്തംബര്‍ 25ന് പള്ളിപ്പുറത്തുണ്ടായ അപകടത്തിന്റെ ചുരുളഴിക്കുക, സ്വര്‍ണക്കടത്തുകാര്‍ക്ക് അപകടത്തില്‍ ബന്ധമുണ്ടോയെന്ന് കണ്ടെത്തുക, അപകടസ്ഥലത്ത് സരിത്തിനെ കണ്ടതായ വെളിപ്പെടുത്തലിലെ സത്യം അറിയുക, ബാലഭാസ്‌കര്‍ ജീവിച്ചിരിക്കെ സംഘം സ്വര്‍ണം കടത്തിയോ എന്ന് അന്വേഷിക്കുക, ബാലുവിന്റെ സാമ്പത്തിക ഇടപാടുകളിലെ ദുരൂഹത നീക്കുക എന്നതാണ് സിബിഐയുടെ അന്വേഷണത്തിന്റെ പ്രധാന ലക്ഷ്യം.
https://www.facebook.com/Malayalivartha
